1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27
पापेन आडेकि ऎड़वेन कुद दिनेद्
1 आरोनेकि तंग़ादेरिनो इव्रेर यॆहोवाद् तमेन उकम ननलाद् आ पाकबलो चिचे कीदोति यॆहोवा अटगि तुक्रयार अदेनो पिटुव्रयार अदि क़ॊक़, यॆहोवाद् मूसा गुनि पॆड़क़ाद्। 2 आद् अहिन अवडयाद्, चॆंग़ज-कन्डो मॆचे बादेलिनो एन एत्रेन; अनि निंगडो आरोने कॆयलोह् अदिक, पाक-जगेनो परदाकि उले ओकु सुन्दुके मॆचे बॆहु चॆंग़ज-कन्डो अगदु तान उगलेयिह् आ गोट पहरानो बरोमा आञ्य अहिन अवडा। 3 आरोनेक पाक-जगेक कोरोति इन्देकि हि बॆहिद्: चुम्बाड़ेये ऎड़व लग्केह् मक़ोन्द बड़दे-मक़ोन, अन्ते क़ोसत्र ऎड़व लग्केह् मक़ोन्द मरगो बेडिन ओन्द्र क़ॊक़ अहिक कोरोति बॆहिद्। 4 आह् पाक मॆहिन् मेरुतानि अंगान अतकेह्, मॆहिन् मेरुतानि उलति-चुयपोन तंग्कि गन्डिनो चुयान्देह्, मॆहिन् मेरुतानि कड़म-गटान चोन्जकेह् मॆहिन् मेरुतानि पागेन अतान्देह्; ईव ईवेद् तो पाक अंगा गहन्डिद्। आह् अमुनो अमचकेह् आव आवेन अत-चुयान्देह्।
5 अदि क़ॊक़ आह् इस्राएल मलेरकि तुन्ग़र्पेरिन्ते चुम्बाड़ेये ऎड़व लग्केह् मक़िस बोकड़ा एड़ेन, अन्ते क़ोसत्र ऎड़व लग्केह् मक़ोन्द मरगो बेडिन क़क़ान्देह्। 6 अन्ते आरोने तंग लग्केह्, तंग अडा-मलेरि लग्केह् पापेन आडेकि ऎड़वेन कुदोति तंग्कि चुम्बाड़ेये ऎड़व चोव बड़दे-मक़ोन मॊचकेह् ऎड़वान्देह्। 7 अदि क़ॊक़ आह् आ मक़िस बोकड़ा एड़ेन ओन्द्रकेह् बॆटार नक़ेकि तम्बुकि कोरपोनो यॆहोवाकि क़न-सरि इलदान्देह्; 8 अन्ते आरोने आ मक़िस बोकड़ा एड़े पन्तेनो चिटिन बिच्रकेह्, मक़ोन्देन यॆहोवा लग्केह् अन्ते ननेन पापेन क़ेन्दु लग्केह् क़ाड़ान्देह्। 9 अन्ते यॆहोवा लग्कि चिटिन बिच्रेनो क़ाड़ग़र्प एड़ेन चुम्बाड़ेये ऎड़व चोव मॊचकेह् ऎड़वोति बॆहिद्; 10 जे पापेन क़ेन्दु एड़े लग्कि चिटिन बिच्रनो क़ाड़ग़र्प एड़ेन यॆहोवा क़न-सरि उजनि इलदोति बॆहिद्; आद् पापेन आडेकि ऎड़वेन कुदोति डडेनो पापेन क़ेन्दु एड़े चोव तॆयुव्रोति बॆहु एड़ेद्।
11 अदि क़ॊक़, आरोने तंग लग्केह् अन्ते तंग अडा-मलेरि लग्केह् पापेन आडेकि ऎड़वेन कुदोति तंग्कि चुम्बाड़ेये ऎड़व चोव बड़दे-मक़ोन ओन्द्रान्देह्; आह् अदे तंग लग्केह् तंग्कि चुम्बाड़ेये ऎड़व चोव पिटान्देह्। 12 अन्ते आह् यॆहोवा क़न-सरि ओकु ऎड़व-पिन्डान्ते चिचेत दुमेनिन एदु कटोरिन निन्दकेह्, अन्ते आह् टॆटिस अनोन्द कसत्रप महमहरो दुमेनिन परदा उले अदे ओन्द्रान्देह्; 13 अन्ते तान कॆयलोह्, अन्ते दुमेनित चोयु दुमेनि-मोग़ेद् सबा-कुमेकि सुन्दुके मॆचे बॆहु चॆंग़ज-कन्डोन बास उटलिद् अदिक, आह् यॆहोवा क़न-सरि चिचनो आ दुमेनिन बिच्रान्देह्। 14 अन्ते आह् बड़दे-मक़ोकि क़ेसन्ते रेकोन्देन ओचेकेह् तंग्कि अंगलित चॆंग़ज-कन्डोकि अगरते बजे चिटयान्देह्, अदि क़ॊक़ आह् बड़दे-मक़ोकि क़ेसन्ते रेकोन्देन तंग्कि अंगलित सत केप चॆंग़ज-कन्डो अगदु चिटयान्देह्।
15 अदि क़ॊक़, आह् मलेरि लग्कि चुम्बाड़ेये ऎड़वेकि एड़ेन पिटान्देह्, अन्ते अदिकि क़ेसे परदा उले ओन्द्रकेह्, बड़दे-मक़ोकि क़ेसे चिटचाह् आ चोवहि अदिकि क़ेसे हों चॆंग़जो-कन्डो मॆचे अन्ते अदि अगदु चिटयान्देह्। 16 इस्राएलेरकि सप्पाबलो लग्केह् अन्ते आबेरकि गोट चोव पापेत मॆनु एलपे लग्केह् आह् पाक-जगे लग्केह् पापेन आडेकि ऎड़वेन इन्देकेह् कुदान्देह्; अन्ते आबेरि मजि आबेरकि सप्पाबलोनो ओकु बॆटार नक़ेकि तम्बु लग्के हों आ चोवहि कुदान्देह्। 17 आरोने पापेन आडेकि ऎड़वेन कुदोति पाक-जगेक कोरिह् अदेनो, अन्ते तंग लग्केह्, तंग अडा-मलेरि लग्केह्, अन्ते इस्राएलेकि गोट तुन्ग़र्पेरि लग्के हों पापेन आडेकि ऎड़वेन कुदकेह् आटिन्ते उरक़िह् आ पहरा अमट बॆटार नक़ेकि तम्बुनो नेह् गोटे डॊकोमान्देह्। 18 अदि क़ॊक़ आह् यॆहोवा क़न-सरि ओकु ऎड़व-पिन्डाक उरक़्क़ेह् एक्केह् अदि लग्के पापेन आडेकि ऎड़वेन इन्देकेह् कुदान्देह्; अन्ते बड़दे-मक़ोकि क़ेसन्ते अन्ते एड़ेकि क़ेसन्ते हों रेकोन्देन ओचेकेह् ऎड़व-पिन्डाकि गोट मरगु मॆचे लेपयान्देह्। 19 अन्ते आह् तंग्कि अंगलित आ क़ेसन्ते ओचेकेह् सत केप ऎड़व-पिन्डा मॆचे चिटयान्देह्, अन्ते अदे इस्राएल मलेरकि सप्पाबलोन्ते सप्पा ननकेह् पाक ननान्देह्।
पापेन क़ेन्दु एड़ेद्
20 अन्ते इन्देकेह् पाक-जगे, बॆटार नक़ेकि तम्बु अन्ते ऎड़व-पिन्डा लग्केह् पापेन आडेकि ऎड़वेन कुद क़चकेह् आह् पापेन क़ेन्दु उजनि एड़ेन यॆहोवा क़न-सरि ओन्द्रेह्; 21 अन्ते आरोने तंग्कि टॆटिसेन आ उजनि एड़ेकि कुकनो कीदान्देह्, अन्ते अदि मॆचे इस्राएलेरकि गोट डग्रहा गहन्डिन, आबेरकि गोट एलपे गहन्डिन, अन्ते आबेरकि गोट पाप गहन्डिन कबुलारकेह् आव आवेन आ एड़े मॆचे ऒन्दान्देह्, अन्ते आ एड़ेन डडेक ओयोति टहरेत्रप मल बहानो सोपचकेह् डडेक तॆयान्देह्। 22 आ एड़ेद् आबेरकि गोट पाप गहन्डिन तंग मॆचे क़ेन्दकिद् एलि जगेक एकान्देद्; आ मलेह् आ एड़ेन डडेनो अम्बान्देह्।
23 अदि क़ॊक़ आरोने बॆटार नक़ेकि तम्बुक बरचकेह्, तान पाक-जगेक कोरचाह् अदेनो अतयाह् आव आव मॆहिन् मेरुतानि अंगा गहन्डिन इचेकेह् अनोहि आव आवेन बॆहत्रान्देह्। 24 अन्ते आह् जगोन्द पाक-जगेनो अमुनो अमचकेह् तंग्कि दिनानेकि लुगान अतान्देह्, अन्ते आह् दुवारिक उरक़्क़ेह् तंग्कि क़ोसत्र ऎड़वेन अन्ते मलेरकि क़ोसत्र ऎड़वेन हों कीदकेह्, तंग अन्ते मलेरि लग्केह् पापेन आडेकि ऎड़वेन कुदान्देह्। 25 अन्ते आह् चुम्बाड़ेये ऎड़वेकि नॆञ्यान ऎड़व-पिन्डा मॆचे क़ोसत्रान्देह्। 26 पापेन क़ेन्दु एड़ेन डडेक ओचाह् आ मलेह् तंग्कि लुगान कजकेह् अमुनो अमयान्देह्; अन्ते अदि क़ॊक़ आह् बेड़यप तुन्ग़र्पेक किरकेह् बरान्देह्। 27 पापेन आडेकि ऎड़व लग्कि पाक-जगेक क़ेसे आरोने ओन्द्रयाह् आ चुम्बाड़ेये ऎड़वेकि बड़दे-मक़ोद् अन्ते चुम्बाड़ेये ऎड़वेकि एड़ेद् हों बेड़यप तुन्ग़र्पेकि दुवारिक ओयुव्रान्देद् अन्ते आटिनो आव आवेकि चमेद्, माकु अन्ते गोबेरिद् चिचनो क़ोसुव्रान्देद्। 28 अन्ते ईव ईवेन क़ोसत्रयाह् आह् तंग्कि लुगान कजकेह् अमुनो अमयान्देह्; अन्ते अदि क़ॊक़ आह् बेड़यप तुन्ग़र्पेक किरकेह् बरान्देह्।
पापेन आडेकि ऎड़वेद् 29 अन्ते ईदि से निमे जुगा-जुगि नियमेद्: सतमा मॆहनाकि सतमा दिनेनो, निम मजि डॊकु इस्राएल देसि-मलेह् मॆननो हों बा परिदेसि-मलेह् मॆननो हों, गोटेरिक तमेन तुवकेर उगोसोति बॆहिद् अन्ते इन्द्र-बॆडि काजेन कुदोति बॆहोमलाद्। 30 इकनिकि आ दिनेनो निम लग्कि पापेन आडेकि ऎड़वेद् कुदुव्रिद्; अन्ते नीम नमकि गोट पाप गहन्डिन्ते यॆहोवाकि क़न-सरि सप्पा मॆनेर। 31 आ दिनेद् गा निमे असोल सब्त दिनेद्, अन्ते आ दिनेनो निमे निमेनहि तुवकेर उगोसोति बॆहिद्; ईद् जुगा-जुगि उकमेद्। 32 अन्ते आसिक ननके टहरेत्रेप ऎड़वु अन्ते तम्बाकोकि जगेनो ऎड़वु काजेन कुदोति पाक ननुव्रप ऎड़वु दूरेहि पापेन आडेकि ऎड़वेन कुदान्देह्; आह् पाक अंगा गहन्डि आनुव्रु मॆहिन् मेरुतानि अंगा गहन्डिन अतकेह्, 33 पाक-अडा लग्केह्, बॆटार नक़ेकि तम्बु लग्केह्, ऎड़व-पिन्डा लग्केह्, ऎड़वुरि लग्केह् अन्ते तुन्ग़र्पेकि गोट मलेरि लग्केह् पापेन आडेकि ऎड़वेन कुदान्देह्। 34 इन्देके बचेरिनो केपोन्द इस्राएल मलेरि लग्कि, आबेरकि गोट पाप गहन्डि लग्केह् पापेन आडेकि ऎड़वेन कुदेद् निमे जुगा-जुगि उकम मॆनान्देद्; अन्ते यॆहोवाद् मूसान उकम ननयाद् आ चोवहि आरोने कुदयाह्।