रंगो-रंगि पाप लग्कि कीदपोद्
1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27
1 इकेह् गोटे तंग्कि टुन्डप बा आग़प इन्द्र-बॆडि सबा पन्तेनो गोहायिन चियोति उकम ननपेन मॆननो गोटे, आह् अदि पन्तेनो तॆंग़ोमलाह् अन्ते पापेन कुदिह् तानि, आह् सजान क़क़ोति जोकेरेह्। 2 बा, इकेह् गोटे क़ाजग़र सपाबलो आनुव्रु इकु क़व्र सावज गोटेकि कॆयप गन्डिन, बा क़ाजग़र सपाबलो आनुव्रु इक रुवे गोटेकि कॆयप गन्डिन, बा क़ाजग़र सपाबलो आनुव्रु इक पॊकु-पोच्रुकि कॆयप गन्डिन, ई चोव क़ाजग़र सपाबलो आनुव्रु इकुन गोटे काना-बेलि कपिह् तानि हों, आह् कसुरताव मॆनेह्। 3 बा, इकेह् गोटे तंगेन क़ाजग़र सपाबलो ननु मल-सपाबलो इन्द्रे गोटेन काना-बेलि कपिह्, अन्ते क़ॊक़ आह् अदे आग़िह् अदेनो हों, आह् कसुरताव मॆनेह्।* 4 बा, इकेह् गोटे उम्बरि सुम्बरि मॆन्जेकेह् क़दक़ोडिह्, आह् एड़ुन बा डग्रहान कुदोति उगलेयाबलो दिबिन चियिह्, अन्ते क़ॊक़ आह् अदे आग़िह् अदेनो हों, आह् अदि पन्तेनो कसुरताव मॆनेह्।
5 इकेह् गोटे ईव ईवेकि इन्द्र गोटेनो कसुरताव मॆननो, आह् तान कुदयाह् आ पापेन कबुलारान्देह्। 6 अन्ते आह् तान कुदयाह् आ पाप लग्केह् सजा-आकेन, चुम्बाड़ ऎड़व चोव मक़ोन्द डडि बेडि-मक़ोन बा एड़ेन गहन्डिन्ते यॆहोवा बहाक ओन्द्रान्देह्, अन्ते ऎड़वुह् अहिकि कुदप पाप लग्केह् अहिक पापेन आडोति कुदपोन कुदान्देह्। 7 जे आह् बेडि-मक़ोन ओन्द्रोति पारयोमलाह् तानि, आह् तान कुदयाह् आ पाप लग्केह् सजा-आकेन, मक़िस पुरेन बा मक़िस पॆरवा मक़ोन ओन्द्रान्देह्, मक़ोन्देन चुम्बाड़ ऎड़व चोव, ननेन क़ोसत्र-ऎड़व चोव यॆहोवा बहाक ओन्द्रान्देह्। 8 आह् आव आवेन ऎड़वु बहाक ओन्द्रान्देह्; ऎड़वुह् मक़ोन्देन चुम्बाड़ ऎड़व चोव ऎड़वकेह्, आ पुजकि कुके अदिकि क़स्रेन्ते मॊड़चकेह्, अदे टुकड़िस ननाबलो कीदान्देह्; 9 अन्ते अदिकि क़ेसन्ते रेकोन्देन ओचेकेह् ऎड़व-पिन्डाकि बजोन्देनो चिटयान्देह् अन्ते ऎंगर्प क़ेसे ऎड़व-पिन्डाकि पिसि चतत्रान्देह्। ईद् चुम्बाड़ ऎड़वेद्। 10 अन्ते दूसरान अवडप सहि उकम चोव क़ोसत्र ऎड़व चोव ऎड़वान्देह्, अन्ते ऎड़वुह् अहिकि कुदप पाप लग्केह् अहिक पापेन आडोति कुदपोन कुदान्देह् अन्ते आह् माप ननुव्रेह्।
11 जे आह् मक़िस पुरेन बा मक़िस पॆरवा मक़ोन ओन्द्रोति पारयोमलाह् तानि, आह् तंग्कि कुदप पाप लग्केह् किलयोन्द* कटप एड़ु आटान चुम्बाड़ ऎड़व लग्केह् ओन्द्रान्देह्; आह् आद् चुम्बाड़ ऎड़वेद् आ लग्केह् अदेनो इसग़ने पुदयोमान्देह् अन्ते दुमेनिन कीदोमान्देह्। 12 अन्ते आह् अदे ऎड़वु बहाक ओन्द्रान्देह्, अन्ते ऎड़वुह् अदेन्ते मुटोन्द आटान अदिकि उगलार्पो चोव ओचेकेह्, यॆहोवाक कीदप क़ोसत्र ऎड़व चोव अदे ऎड़व-पिन्डा मॆचे क़ोसत्रान्देह्; ईद् गा चुम्बाड़ ऎड़वेद्। 13 इन्देके ईव ईव सबानो इन्द्रे गोटेनो अहिकि कुदप पाप लग्केह् अहिक ऎड़वुह् पापेन आडोति कुदपोन कुदान्देह् अन्ते आह् माप ननुव्रेह्। आ आटाकि ऎंगर्पेद्, दानेकि कीदपो चोव, ऎड़वु लग्कि मॆनेनिद्।
किरत्र-ऎड़वेद्
14 यॆहोवाद् मूसान अदो अवडयाद्, 15 इकेह् गोटे यॆहोवा बागु इन्द्र-बॆडि पाक आकेनो एलपेन कुदकेह् काना-बेलि पापेन कुदिह् तानि, आह् गहन्डिन्ते मक़ोन्द मरगो बेडिन यॆहोवा बहाक सजा-आकेद् आनकेह् ओन्द्रान्देह्; आद् टडाबलो, पाक-अडाकि सेकेल लॆकयप चोव नीन अहि मॆचे टहरेत्रने आ सहि लॆकयप रुपानो मॆनान्देद्; आद् गा किरत्र ऎड़वेद्*। 16 अन्ते आह् पाक आकेनो तंग्कि कुदप एलप चोव नुकसानेन हों चियान्देह्, अन्ते अदि गुनि अदिकि दामेकि पचमा बक्रान जॊड़चकेह् ऎड़वुक चियान्देह्; अन्ते ऎड़वुह् अहि लग्केह् आ किरत्र ऎड़वपो मरगो बेडित पापेन आडोति कुदपोन कुदान्देह्, अन्ते आह् माप ननुव्रेह्। 17 इकेह् गोटे यॆहोवाद् कुदोति बॆहोमलाद् आनकिद् उकम ननयाद् आव आवेकि इन्द्रद् गोटेन कुदकेह् पापेन कुदिह् तानि, आह् अदे काना-बेलि कुदनो गोटे, आह् कसुरताव मॆन्जेकेह् सजान क़क़ जोकेर मॆनेह्। 18 आह् किरत्र ऎड़व चोव नीन टहरेत्रने आ सहि लॆकयप चोव मक़ोन्द टडाबलो मरगो बेडिन गहन्डिन्ते ऎड़वु बहाक ओन्द्रान्देह्, अन्ते अहिकि काना-बेलि कुदप एलपे लग्केह् ऎड़वुह् पापेन आडोति कुदपोन कुदान्देह्, अन्ते आह् माप ननुव्रेह्। 19 ईद् गा किरत्र ऎड़वेद्; आह् यॆहोवा क़न-सरि एलपेन कुदकेह् कसुरताव मॆन्जाह्।
*५:३ १२–१४ मूलि गहन्डिन पड़चके टुन्डा