क़ोसत्रे ऎड़वेद्
1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27
1 यॆहोवाद् बॆटार नक़ेकि तम्बुन्ते मूसान बीक्किद् अहिन अवडयाद्, 2 इस्राएल मलेरिन नीन ईञ्य अवडा: निमेन्ते नेह् गोटे यॆहोवाक जानवरकि कीदपोन ओन्द्रिह् अदेनो, आह् ऒयु-गहन्डिन्ते बा बेडि-गहन्डिन्ते मक़ोन्द जानवरेन अदकेह् ओन्द्रान्देह्। 3 अहिकि कीदपेद् ऒयु-गहन्डिन्ते ओन्द्रपेद् तानि, आह् टडाबलो बड़देन ओन्द्रान्देह्; आह् यॆहोवाकि क़न-सरि ईन्जुव्रलेह् अदिक, आह् अदे बॆटार नक़ेकि तम्बुकि कोरपोनो कीदान्देह्; 4 अन्ते आह् आ क़ोसत्रे ऎड़वप मॆचे तंग्कि टॆटुन कीदान्देह्, अन्ते आद् अहि लग्कि पापेन आडोति कुदपोद् आञ्य ईन्जुव्रेनिद्। 5 अन्ते आह् आ बड़देन यॆहोवाकि क़न-सरि पिटान्देह्; अन्ते आरोनेकि तंग़ाद ऎड़वुर अदिकि क़ेसे ओचेकेर, अदे बॆटार नक़ेकि तम्बुकि कोरपोनो ओकु ऎड़व-पिन्डा मॆचे चारा-कूटि चिटयान्देर। 6 अदि क़ॊक़ आह् आ क़ोसत्रे ऎड़वपेन चॊलयान्देह् अन्ते अदे मुरकान्देह्। 7 अन्ते ऎड़वु आरोनेकि तंग़ादेह् ऎड़व-पिन्डानो चिचे पकत्रकेर, आ चिच मॆचे कन्के पदिति ओजान्देह्; 8 अन्ते आरोनेकि तंग़ाद ऎड़वुर दुकड़ेयपेन, कुके, अन्ते नॆञ्येन ऎड़व-पिन्डानो पकरु चिचनो ओजप कन्क मॆचे पदिति कीदान्देर। 9 जे आह् अदिकि चव्रुन, अन्ते अदिकि क़ॆडे अमेत नॊड़ान्देह्। अन्ते आ गोटेदिन ऎड़वुह् ऎड़व-पिन्डानो क़ोसत्रे ऎड़व चोव क़ोसत्रान्देह्; ईद् गा क़ोसत्रे ऎड़वेद्, यॆहोवाक अपोकेत्रु चॆञ्येद् अन्ते चिचेत कीदु ऎड़वेद्।
10 जुदि अहिकि कीदप क़ोसत्रे ऎड़वेद् बेडि-गहन्डिन्ते बा एड़े-गहन्डिन्ते ओन्द्रपेद् तानि, आह् टडाबलो मरगो बेडिन ओन्द्रान्देह्। 11 अन्ते आह् यॆहोवाकि क़न-सरि ऎड़व-पिन्डाकि गंगा-मोहा बजे अदे पिटान्देह्, अन्ते आरोनेकि तंग़ाद ऎड़वुर अदिकि क़ेसे ऎड़व-पिन्डा मॆचे चारा-कूटि चिटयान्देर। 12 अदि क़ॊक़ आह् आ क़ोसत्रे ऎड़वपेन टुकड़ेयान्देह् अन्ते अदिकि कुके अन्ते नॆञ्येन हों अदि संगाल कीदान्देह्। आव आवेन ऎड़वुह् ऎड़व-पिन्डानो पकरु चिचनो ओजप कन्क मॆचे पदिति कीदान्देह्। 13 जे आह् अदिकि चव्रुन, अन्ते अदिकि क़ॆडे अमेत नॊड़ान्देह्। अन्ते आ गोटेदिन ऎड़वुह् ओन्द्रकेह् ऎड़व-पिन्डानो क़ोसत्रे ऎड़व चोव क़ोसत्रान्देह्; ईद् गा क़ोसत्रे ऎड़वेद्, यॆहोवाक अपोकेत्रु चॆञ्येद् अन्ते चिचेत कीदु ऎड़वेद्। 14 जुदि यॆहोवाक अहिकि कीदप क़ोसत्रे ऎड़वेद् पुज गहन्डिन्ते ओन्द्रपेद् तानि, आह् पुरेन बा पॆरवा मक़ोन ओन्द्रान्देह्। 15 अन्ते ऎड़वुह् अदे ऎड़व-पिन्डाक ओन्द्रकेह् आ पुजुकि कुके मॊड़यान्देह्, अन्ते आ कुके ऎड़व-पिन्डानो क़ोसत्रकेह् अदिकि क़ेसे ऎड़व-पिन्डाकि बजोन्देनो चतत्रान्देह्। 16 अन्ते आह् अदिकि बोगलिन अदिकि पकि* मादि क़ॊजकेह् ऎड़व-पिन्डाकि पिसि बेर-अरग बजे ओड़मेद् कॊडिद् अनो चूटान्देह्। 17 अदि क़ॊक़ आह् अदिकि पकड़ा मादि अदे दुकड़िस ननाबलो ईसान्देह्। अन्ते ऎड़वुह् अदे ऎड़व-पिन्डानो पकरु चिचनो ओजप कन्क मॆचे कीदकेह् क़ोसत्रान्देह्। ईद् गा क़ोसत्रे ऎड़वेद्, यॆहोवाक अपोकेत्रु चॆञ्येद् अन्ते चिचेत कीदु ऎड़वेद्।