1 यॆहोवाद् मूसान अदो अवडयाद्, 2 इकेह् गोटे तंग बहानो सोपयुव्रप आकेन बा अहिकि टुन्ड-एरोति अम्बप आकेन टगचकेह् बा क़डकेह्, बा अहिन दोका ननिह् तानि, 3 बा आह् ऎवज्प आकेन अन्डेकेह् अदि पन्तेनो पसयेत्रिह्, जांहो क़दक़ोडिह् तानि, मलेरकि कुदप ई चोव इन्द्रे गोटे पापेन आह् कुदिह् तानि, आह् यॆहोवाकि विरुदनो पापेन कुदिह्; 4 इन्देकेह् आह् पापेन कुदकेह् कसुरताव मॆनिह् अदेनो, आह् तान क़डाह्, बा आह् बचकेह् ओचाह् आ आकेन, बा तंग बहानो सोपयुव्रप आकेन, बा तान अन्डाह् आ ऎवज्प आकेन, 5 बा आह् जांहो क़दक़ोडप इन्द्र-बॆडि आकेन आह् जरुरहि किरत्रान्देह्; अन्ते अदि गुनि अदिकि दामेकि पचमा बक्रान जॊड़चकेह्, अदे तान चुम्बाड़ेय ऎड़वेन कीदु दिनेनो अदिकि मालिकेक सालमे चियान्देह्। 6 अन्ते आह् चुम्बाड़ेय ऎड़व लग्के निंग्कि टहरेत्रप दाम चोव टडाबलो मरगो बेडिन गहन्डिन्ते यॆहोवाक कीदोति तंग्कि किरत्र ऎड़वेन ऎड़वु बहाक ओन्द्रान्देह्; 7 अन्ते ऎड़वुह् अहि लग्केह् यॆहोवाकि क़न-सरि पापेन आडोति कुदपोन कुदान्देह्; अनि आह् कसुरताव चोव कुदप इन्द्र-बॆडि काजेद् अहिक माप ननुव्रेनिद्।
ऎड़वेद् सालमे क़ोसुव्रान्देद्
8 यॆहोवाद् मूसान अदो अवडयाद्, 9 आरोनेन अन्ते अहिकि तंग़ादेरिन ईञ्य उकम नना: ईदि से क़ोसत्र ऎड़वेकि नियमेद्, क़ोसत्र ऎड़वेद् सग्र माक़े माक़ोन्द अमट ऎड़व-पिन्डाकि अतु मॆचे बॆहान्देद्, अन्ते ऎड़व-पिन्डाकि चिचुद् क़ोस बॆच एकान्देद्। 10 अन्ते ऎड़वुह् तंग्कि मॆहिन् मेरुतानि अंगान अतकेह्, तंग्कि मॆहिन् मेरुतानि उलति-चुयपोन तंग्कि गन्डिनो चुयान्देह्, अन्ते आह् ऎड़व-पिन्डा मॆचे चिचनो क़ोसप क़ोसत्र ऎड़वेकि ओड़मेन ओत्रकेह् ऎड़व-पिन्डाकि बजोन्देनो ओजान्देह्। 11 अदि क़ॊक़ आह् तंग्कि अंगान इचेकेह्, नन अंगान अतान्देह्, अन्ते आ ओड़मेन बेड़यप तुन्ग़र्पेकि दुवारिनो जगोन्द सपा जगेक ओयान्देह्। 12 ऎड़व-पिन्डाकि चिचुद् हरदम कॆयाबलो क़ोस बॆच एकान्देद्; ऎड़वुह् माक़ोनोन्दति अदि मॆचे क़ोसोति कन्के कीदान्देह्, अन्ते आह् अदि मॆचे क़ोसत्र ऎड़वेन पदिति कीदकेह्, अदि मॆचे संगालि-ऎड़वेकि नॆञ्येन क़ोसत्रान्देह्। 13 ऎड़व-पिन्डाकि चिचुद् हरदम क़ोस बॆच एकान्देद्, आद् इकोन्नो गोटे कॆयोति बॆहोमलाद्।
दना-ऎड़वेद्
14 अन्ते ईदि से दनाकि कीदपोकि नियमेद्; आरोनेकि तंग़ादेर इदे यॆहोवाकि क़न-सरि ऎड़व-पिन्डा अगदु कीदान्देर। 15 अन्ते ऎड़वुह् दनाकि कीदपोकि कटप एड़ु आटान अन्ते अदिकि इसग़नुनो मुटोन्द अदिकि गोट दुमेनि मादि ओचेकेह् अदे ऎड़व-पिन्डा मॆचे उगलार्पो चोव क़ोसत्रान्देह्; आद् गा यॆहोवाक अपोकेत्रु चॆञ्येद्। 16 अन्ते अदिकि ऎंगर्पेन आरोने अन्ते अहिकि तंग़ादेर मॊक़ान्देर; आद् गादबलो मॆक़ुव्रकिद् पाक जगेनो मॊक़ुव्रान्देद्; आ पाक जगेद् गा बॆटार नक़ेकि तम्बुकि पीडाद्, अनोहि से आबेर अदे मॊक़ान्देर। 17 आद् गाद मादि मॆक़ुव्रोमान्देद्। आद् गा ऎंगे कीदप क़ोसत्र कीदपोन्ते एन आबेरिक चियु आबेरकि बक्राद्; आद् चुम्बाड़ेय ऎड़व अन्ते किरत्र ऎड़व चोव कटप पाकेद्। 18 आरोनेकि ओर्तोनोन्द मुड़स मक़ेह् अदे मॊक़ान्देह्; आद् यॆहोवाक कीदप क़ोसत्र ऎड़वेनो निमकि गोट नति-जालिरिनो जुगा-जुगि उकम मॆनान्देद्; नेह् गोटे आव आवेन कपिह् आह् पाक मॆनेह्।
19 यॆहोवाद् मूसान अदो अवडयाद्, 20 आरोने अन्ते अहि तंग़ादेर आसिक ननुव्रकेर टहरेत्रुव्रनेर आ दिनेनो, आह् अन्ते यॆहोवाक इदिनहि से कीदान्देर: ऎपा आनुव्रु क़ोयनो दसनो एन्डोन्द बक्रा* कटप एड़ु आटानो माक़ोन्द आदान अन्ते बेड़ित आदान दिनानेकि दनाकि ऎड़व चोव कीदान्देर। 21 आद् करायिनो इसग़नु मादि मॆक़ुव्रान्देद्; अन्ते एड़ु गॊरचके मॆक़प दुकड़ेयपेन दनाकि ऎड़व चोव ओन्द्रके यॆहोवाक अपोकेत्रु चॆञ्ये चोव कीदा। 22 अहिकि तंग़ादेरिनो नेह् गोटे अहि क़ॊक़ आसिक ननुव्रकेह् टहरेत्रुव्रु ऎड़वु हों इन्देकेह् जुगा-जुगि उकम चोव कीदान्देह्, आद् सालमे क़ोसुव्रान्देद्। 23 ऎड़वु लग्कि कीदप गोट कीदपोद् सालमे क़ोसत्रोति बॆहिद्, आद् मॊक़ुव्रोमान्देद्।
चुम्बाड़ेये ऎड़वेद् 24 यॆहोवाद् मूसान अदो अवडयाद्, 25 आरोनेन अन्ते अहिकि तंग़ादेरिन ईञ्य अवडा: ईदि से चुम्बाड़ेये ऎड़वेकि नियमेद्, क़ोसत्र ऎड़वेद् पिटुव्रिद् आ जगेनो हि चुम्बाड़ेये ऎड़वेद् हों यॆहोवाकि क़न-सरि पिटुव्रान्देद्; आद् गा कटप पाकेद्। 26 पापेन आडोति अदे कीदु ऎड़वुह् अदे मॊक़ान्देह्; आद् पाक जगे आनुव्रु बॆटार नक़ेकि तम्बुकि पीडानो हि मॊक़ुव्रान्देद्। 27 आ ऎड़वपोकि माके इक आकेद् गोटे कपिद् आ गोटेदि पाक मॆनेनिद्; अन्ते अदिकि क़ेसन्ते रेकोन्द गोटे लुगानो चिटयपेद् तानि, क़ेसकि चिटयप आ लुगान जगोन्द पाक जगेनो कजोति बॆहिद्। 28 अन्ते आ ऎड़वपोद् बितुव्रिद् आ पतलिद् क़ोटुव्रान्देद्; जे पितेलि बान्डेनो बितुव्रिद् तानि, अदे मानचके अमुनो नॊड़ोति बॆहिद्। 29 ऎड़वुरिनो गोट मुड़सेर अदे मॊक़ान्देर, आद् गा कटप पाकेद्। 30 जे इक चुम्बाड़ेये ऎड़वपोकि क़ेसन्ते रेकोन्द पाक-जगेनो पापेन आडोति लग्कि बॆटार नक़ेकि ऎड़वपोन मॊक़ोति बॆहोमलाद्, आद् चिचनो क़ोसुव्रान्देद्।