1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27
मक़ेन कुन्दत्र क़ॊक़ तॆहोन सप्पा ननेद्
1 यॆहोवाद् मूसान अवडयाद्, 2 इस्राएलेरिन ईञ्य अवडा: पेलिद् कोचोन क़ेन्दकिद् मुड़स-मक़ेन कुन्दत्रिद् तानि, आद् तंग्कि क़ेस-उरक़ दिनेनो सप्पाबलो डॊकिद् आ चोव सत दिनि अमट क़ाजग़र सप्पाबलो मॆनेनिद्। 3 अन्ते अटमा दिनेनो आ मक़ेकि गन्डिकि क़ॊर-चमेन क़तनेयुव्रान्देद्। 4 अदि क़ॊक़, आ पेलिद् कॊड़योन्द तेरा दिनि अमट तंग्कि क़ेस-उरक़ेन्ते पाक नन अवालेनोहि डॊकान्देद्, अन्ते तंग्कि पाक नन दिनेद् पूरार अमट इन्द्र गोटे पाक आकेन कपोति बा पाक-अडाक एकोति हों बॆहोमलाद्। 5 जे आद् पेल-मक़ेन कुन्दत्रिद् तानि, आद् अपतिस अमट तंग्कि क़ेस-उरक़ दिनेनो सप्पाबलो डॊकिद् आ चोव क़ाजग़र सप्पाबलो मॆनेनिद्; अदि क़ॊक़ आद् तीन कॊड़ि सो दिनि अमट तंग्कि क़ेस-उरक़ेन्ते पाक नन अवालेनोहि डॊकान्देद्।
6 अन्ते अदिकि पाक नन दिनेद् पूरारको, आद् मुड़स-मक़ेन कुन्दत्रनो हों, बा पेल-मक़ेन कुन्दत्रनो हों, आद् बचेरोन्द बेडि-मक़ोन क़ोसत्र ऎड़वपो चोव, मक़ोन्द मक़ो-पॆरवान बा पुरेन चुम्बाड़ेये ऎड़वपो चोव बॆटार नक़ेकि तम्बुकि कोरपोनो डॊकु ऎड़वु बहाक ओन्द्रान्देद्। 7 अन्ते आ ऎड़वुह् अदे यॆहोवा क़न-सरि ऎड़वकेह्, आ पेलि लग्केह् पापेन आडोति कुदपोन कुदान्देह्; अनि आद् तंग्कि क़ेस-उरक़ेकि सप्पाबलोन्ते सप्पा मॆनेनिद्। मुड़स-मक़ेन बा पेल-मक़ेन कुन्दत्रु पेलि पन्तेकि नियमेद् ईदि से। 8 अन्ते आद् मक़ोन्द बेडि-मक़ोन ओन्द्रोति पोलिद् तानि, आद् मक़िस पुरेन बा मक़िस मक़ो-पॆरवान, मक़ोन्देन क़ोसत्र ऎड़वपो लग्किद् अन्ते ननेन चुम्बाड़ेये ऎड़वपो लग्किद् ओन्द्रान्देद्; अन्ते ऎड़वुह् आ पेलि लग्केह् पापेन आडोति कुदपोन कुदान्देह्; अनि आद् सप्पा मॆनेनिद्।