1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27, 28, 29, 30, 31, 32, 33, 34, 35, 36, 37, 38, 39, 40, 41, 42, 43, 44, 45, 46, 47, 48, 49, 50.
यूसपे अन्ते पोतीपारेकि डानिद्
1 यूसपे अनेके मिस्र देसिक ओयुव्रयाह्। परुनेकि सरदार अन्ते सिपाहिरकि सुबेदार पोतीपार नामि मिस्र-आवेह् आटिक ओन्द्रप यूसपेन इस्माएलेरि बहान्ते क़ेग़ाह्। 2 अन्ते यॆहोवाद् यूसप संगाल डोकयाद्, अन्ते गोट सबाद् अहिक सोहजारयाद्, अन्ते आह् तंग मिस्रि साहब अडानो डोकयाह्। 3 यॆहोवाद् अहि संगाल डोकयाद् अदे, अन्ते यॆहोवाद् अहिकि कुदप गोट काजेनो अहिन तनयेत्रयाद् अदे अहिकि साहबेह् अक़्क़ाह् अदेनो, 4 यूसपे अहिकि क़ननो दॆयान क़क़ाह् अन्ते अहिकि कमक्रेह् मॆन्जाह्। अन्ते पोतीपार अहिन तंग अडाकि सरबरा मेन्जयाह्, अन्ते तंग अडानो डॊकु बॆहु गोट आकेन अहिकि टॆटुनो सोपचाह्। 5 अन्ते पोतीपार अहिन तंग अडाकि अन्ते तंग बहानो बॆच्चाद् आ गोटेदिकि सरबरा मेन्जयाह् आ दिनेन्ते यॆहोवाद् यूसप लग्किद् आ मिस्रिकि अडान आसिक ननयाद्, अन्ते अहि अडा बागु, बा केत बागु गोट आक मॆचे यॆहोवाकि आसिकेद् बॆच्चाद्। 6 अनि आह् तंग बहानो बॆच्चाद् आ गोटेदिन यूसपेकि टॆटुनो सोपचाह्; तान लपयाह् आ लपेन्ते बडा अदो इन्द्रे गोटे पन्तेनो दन्देसारलाह्। 7 यूसपे क़ॆसग़रो अन्ते मीन्जो मुद्राताव मॆन्जाह्। अड़प दिनि क़ॊक़ अहि साहबेकि डानिद् यूसपेन क़ने लगात्रयाद् अन्ते अहिन ऎंग गुनि कॊड्र नक़ा आनयाद्। 8 जे आह् तंग साहबेकि डानिकि सबान मानयलाह्, अन्ते अदिन ईञ्य अवडयाह्, टुन्डा, ऎंग लग्केह्, ऎंग साहबेह् अडानो इन्द्रे गोटे पन्तेनो दन्देसारोमलाह्; तंग बहानो बॆहिद् आ गोटेदिन ऎंग टॆटुनो सोपचकेह् डॊकिह्। 9 ई अडानो ऎंगेन्ते कटप बॆडो नेह् गोटे मला; नीन अहि डानि आ लग्केह् निंगेन अम्बकेह् इन्द्र गोटेन ओजलाह्। तॆबे एन इकनान ई चोव बॆडो डग्रहा काजेन कुदोति अन्ते गोसाञ्यि पन्तेनो पापेन कुदोति पारयलेन? 10 आद् दिनाने यूसप गुनि इन्देकिद् पॆड़क़ाद् तानि गोटे, आह् अदि गुनि कॊड्र नक़ोति बा अदि संगाल डॊकोति हों मानयलाह्।
11 दिनोन्द आह् तंग्कि काजेन कुदोति लग्केह् अडा उले कोरचाह्, अन्ते आ गरि अडा-आव ओर्तेह् गोटे अडानो डोकलाह्। 12 अनि आ पेलिद् अहिकि चुयपोन दरचकिद्, ऎंग गुनि कॊड्र नक़ा आनयाद्। जे आह् तंग्कि चुयपोन अदि टॆटुनो चुड़पत्रकेह् अडान्ते बोंग़ उरक़ाह्। 13 आह् तंग्कि चुयपोन अदिकि टॆटुनो चुड़पत्रकेह् अडान्ते बोंग़ उरक़ाह् अदे आद् टुन्डयाद् अदेनो, 14 आद् तंग अडा मलेरिन बीकयाद्, अन्ते आबेरिन ईञ्य अवडयाद्, टुन्डा, ई इब्रानिह् नमेन डॆंगसेयलेह् अदिक नम अडाक ओन्दरुव्रयाह् अन्ता? आह् ऎंग गुनि कॊड्र नक़ोति उले कोरचाह्, जे एन क़रग़रकेन। 15 एन सगार लग्केन क़रग़रकेन अदे आह् मॆन्जाह् अदेनो, आह् तंग्कि चुयपोन ऎंग बहानो चुड़पत्रकेह् अडान्ते बोंग़ उरक़ाह्। 16 अन्ते आद् यूसपेकि चुयपोन तंगे डावेह् अडाक किरकेह् अड़स अमट तंग बहानो ओजयाद्। 17 अहि डावेह् अड़सनो आद् अहिन ई कतान अवडयाद्, नीन नम बहाक ओन्द्रके आ इब्रानि क़ेग़प-कमक्रेह् ऎंगेन डॆंगसेयोति ऎंग बहाक बरचाह्। 18 जे एन सगार लग्केन क़रग़रकेन आ गरिहि आह् तंग्कि चुयपोन ऎंग बहानो चुड़पत्रकेह् अडान्ते बोंग़ उरक़ाह्। 19 निंग्कि क़ेग़प-कमक्रेह् ऎंगेन इन्देकेह् गड़चाह् आञ्य यूसपेकि साहबेह् तंगे डानिकि अवडप कतान मॆन्जाह् अदेनो, आह् रॊकेत क़ोसयाह्। 20 अन्ते यूसपेकि साहबेह् अहिन दरचाह्, अन्ते राजाकि ऎड़ग़ुव्रुर ऎड़ग़ुव्र सॆंगयार आ ऎड़ग़-अडानो अहिन ऎड़ग़ाह्। जे आ ऎड़ग़-अडानो यूसपे डोकयाह् अदेनो, 21 यॆहोवाद् अहि संगाल डोकयाद्, अन्ते अहिक ओंग्राबलो मड़ मॆनेन एदयाद्, अन्ते ऎड़ग़-अडाकि दरोगा-मजयेकि दॆयान यूसपेक क़क़त्रयाद्। 22 अनि ऎड़ग़-अडाकि दरोगा-मजयेह् ऎड़ग़-अडाकि गोट ऎड़ग़ुव्रपेरिन यूसपेकि टॆटुनो सोपचाह्, अन्ते आह् अनो कुदुव्रयाद् आव आव काजेकि टुन्डु-एरु मेन्जुव्रयाह्। 23 यॆहोवाद् गा यूसप संगाल डोकयाद् अन्ते आद् अहिन अहिकि गोट कुदप काजेन तनयेत्रयाद्, आ लग्केह् ऎड़ग़-अडाकि दरोगा-मजयेह् यूसपेकि टॆटुनो तंगे बॆच्चाद् आव आव गोट काज पन्तेनो उगलेयबलो डोकयाह्।