1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27, 28, 29, 30, 31, 32, 33, 34, 35, 36, 37, 38, 39, 40, 41, 42, 43, 44, 45, 46, 47, 48, 49, 50.
यिहुदा अन्ते तामार
1 आ गरि यिहुदा तंग उन्डग़लेरिन्ते उरक़्क़ेह् अदुलाम क़ॆपकि हीरा नामि मल बहाक अड़सयाह्। 2 अनो यिहुदा सुवा नामि ओर्त कानान-आवेकि तंग़ादिन जिमयाह्, अन्ते अदिन बॆदयाह् अन्ते अदि गुनि कॊड्र नक़ाह्। 3 आद् गन्डितानि मॆन्जेकिद् ओर्त मुड़स मक़ेन कुन्दत्रयाद्; अन्ते आह् अहिकि नामिन एर ओजयाह्। 4 अन्ते आद् नन्दु गन्डितानि मॆन्जेकिद् ओर्त मुड़स मक़ेन कुन्दत्रयाद्; अन्ते आद् अहिकि नामिन ओनाने ओजयाद्। 5 नन्दु आद् गन्डितानि मॆन्जेकिद् ओर्त मुड़स मक़ेन कुन्दत्रयाद्; अन्ते आद् अहिकि नामिन सेला ओजयाद्। आद् इहिन कुन्दत्रयाद् आ गरि यिहुदा केजिबेनो डोकयाह्।
6 अड़प बचेरि क़ॊक़ यिहुदा तंग्कि मेग़रो एरेन तामार नामि पेलित बॆदत्रयाह्। 7 जे यिहुदाकि मेग़रो एरे यॆहोवाकि क़ननो डग्रहाह् मॆन्जाह् आ लग्किद् यॆहोवाद् अहिन पिटयाद्। 8 अनि यिहुदा ओनानेन अवडयाह्, नीन निंग बयाकि डानि गुनि कॊड्र नक़्क़े अदिक साड़ाकि कुदपोन पूरात्रा अन्दे से निंग बयाक नति-जालि मॆनेह्। 9 जे आ नति-जालिह् तंग्कि मॆनेह् मला अदे ओनाने आग़ु मॆन्जाह् आ लग्केह् आह् इकोन्नो गोटे तंग बयाकि डानि गुनि कॊड्र नक़ाह् आ गरि आह् तंग्कि बड़ेन क़ेक़लनो तुन्दयाह् अन्दे से तंग बयाक नति-जालिर मॆनलोर। 10 आह् कुदयाह् आद् यॆहोवाकि क़ननो डग्रहा मॆन्जाद् आ लग्किद् आद् अहिन हों पिटयाद्। 11 अनि यिहुदा, तंग़ादे सेला हों अहि उन्डग़लेरि चोव कॆयलेह् आञ्य ऎलचकेह् तंग़ादि-गारनि तामारेन अवडयाह्, ऎग़ादे सेला पद्रपे मॆनेह् आ दिनि अमट नीन निंग अब्बो अडानो रन्डियनि चोव डॊका; अन्देकिद् तामार एक्किद् तम्बाको अडानो डोकयाद्।
12 गड़हि दिनि क़ॊक़ सुवाकि तंग़ादि इकुद्अको यिहुदाकि डानि कॆचाद्। यिहुदाकि दुक गरि पूरारयाद् अदेनो आह् अदुलाम क़ॆप-आव तंग्कि संगाले हीरा संगाल तिम्नानो तंग्कि बेडिकि तलिन चरुरि बहाक एकयाह्। 13 अन्ते तामारेक, निंग तम्बाको-गारेह् तंग्कि बेडिकि तलिन चरत्रोति तिमनाक एके डॊकिह् आञ्य मॆन्द्रयाद्। 14 सेला पद्रपे मॆननो गोटे तान अहित बॆदुव्रोमलाद् आञ्य एड़ु अक़्क़ाद्, आ लग्किद् आद् तंग्कि रन्डियनि लुगान इचकिद् कुककि लुगान बन्द ऎतत्रयाद् अन्ते तंगेन उटग़रकिद् तिमनाक एकु पावे एनाइम क़ॆप दुवारिनो ओकेतयाद्।
15 यिहुदा अदिन टुन्डकिद् आद् तंग्कि मुद्रान उटग़रकि डोकयाद् आ लग्केह्, आद् पतुरयाद् आञ्य उगलेचाह्। 16 अन्ते आह् आ पावे अदि बहाक एक्केह् अवडयाह्, एन निंग गुनि कॊडोति एकेनि यान्? आह् गा अदिन तंग़ादि-गारनि आञ्य आग़लाह्। आनको आद् मॆन्जाद्, नीन ऎंग गुनि कॊडोति ऎंगे इन्द्रे क़टेने? 17 आनको आह् अवडेकिरत्रयाह्, एन गहन्डिन्ते मक़ोन्द एड़े-मक़ोन तॆयेन। आद् मॆन्जाद्, नीन अदे तॆय अमट इन्द्रे दिबिन क़टेने? 18 आनको आह् अवडयाह्, एन इन्द्रे दिबिन निंगे चियेन? आद् अवडेकिरत्रयाद्, गटात चोन्जप निंग्कि मोहरेन अन्ते निंग्कि टॆटुनो बॆहु पिने क़टा। अनि आह् आव आवेन अदिक चिचेकेह् अदि गुनि कॊड्र नक़ाह्। अन्ते आद् अहि पावेत गन्डितानि मॆन्जाद्। 19 अनि आद् चोचेकिद् तीरयाद् अन्ते तंग्कि कुककि बन्द ऎतप लुगान ओत्रयाद् अन्ते तंग्कि रन्डियनि लुगान अतयाद्।
20 यिहुदा अदुलाम क़ॆप-आव तंग्कि संगाले हीरा पावे मक़ोन्द एड़े-मक़ोन आ पेलि बहानो बॆच्चाद् आ तंग्कि दिबि-आकेन किरत्रोति तॆयाह्, जे हीरा आ पेलिन अन्डोति पोलाह्। 21 अन्ते आह् आटिकि मलेरिन मॆन्जाह्, एनाइम पावनो डॊकु पतुरयाद् इकानो डॊकिद्? जे आटिकि मलेर अवडेकिरत्रयार, ईटिनो इक पतुरयाद् गोटे डॊकोमलाद्। 22 अनि आह् यिहुदा बहाक किरकेह् बरचाह् अन्ते अवडयाह्, एन आ पेलिन अन्डलेकेन, अन्ते आटिकि मलेर हों आटिनो इक पतुरयाद् गोटे डॊकोमलाद् आनयार। 23 आनको यिहुदा अवडेकिरत्रयाह्, टुन्डा, ई एड़े-मक़ोन अदिक तॆयेकेन, जे नीन अदिन अन्डोति पोलेके; नमेन मलेर अलक़लोर अदिक, आद् आव आव दिबि-आकेन ओयान्देद्। 24 लगबग तीन मॆहना क़ॊक़, निंग्कि तंग़ादि-गारनि तामार लंगविन कुदयाद्, अन्ते आ लंगवित गन्डितानि मॆन्जाद् आञ्य कब्रेद् यिहुदाक मॆन्द्रयाद्। आनको यिहुदा उकम ननयाह्, अदिन दुवारिक ओत्रा, आद् क़ोसुव्रान्देद्। 25 आद् दुवारिक ओत्रुव्रयाद् अदेनो, आद् तम्बाको-गारेक ईञ्य सबान तॆयाद्: ईव ईव आकेद् नेकिद् अहिते से एन गन्डितानि मॆन्जेकेन। ईव ईव गटात चोन्जप मोहरेद् अन्ते पिनुद् नेकिद् अदे बुजया। 26 अनि यिहुदा आव आवेन बुजचकेह् अवडयाह्, आद् ऎंगेन्ते कटप दर्मिद्, एन गा अदिक ऎंग़ादे सेलान बॆदोति चियलेकेन। अदि क़ॊक़ आह् अदि गुनि इकोन्नो गोटे कॊड्र नक़लाह्। 27 अदिक कुड-ओक पहराद् अड़सको, अदिकि कोचोनो ओस्र मक़ेर डोकयार। 28 आद् मक़ेरिन कुन्दत्र गरि, ओर्त मक़ेह् तंग्कि टॆटुन तॆया, अन्ते दायिद् आ टॆटुन दरचकिद् क़ेसलो मेरुत ऎचाद्; अन्ते ईहि से अगदु उरक़ाह् आनयाद्। 29 जे आ मक़ेह् तंग्कि टॆटुन उले बन्देकेह् ओचाह् अदेनो, अहि उन्डग़लेह् उरक़ाह्। अनि आ दायिद् अवडयाद्, नीन निंग पावे इन्देकेहि क़चके; अन्ते आ लग्किद् अहिकि नामिद् पारासे* पिन्जुव्रयाद्। 30 अदि क़ॊक़ टॆटुनो क़ेसो मेरुत ऎयप अहिकि तंगडोह् उरक़ाह्। अहिकि नामिद् जाराहे* पिन्जुव्रयाद्।