1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27
क़दक़ोडप अन्ते यॆहोवाक कीदप आक पन्तेकि सबाद्
1 यॆहोवाद् मूसान अदो अवडयाद्, 2 नीन इस्राएलेरिन ईञ्य अवडा: इकेह् गोटे यॆहोवाक मलेरिन पाक ननोति असोल दिबिन ओयिह् तानि, दिबिन ओयुव्रुरि लग्कि टहरेत्रप दामे चोव चिय पावे चोग़ुव्रलेर। 3 अनि कॊड़योन्द बचेरिन्ते तीन कॊड़ि बचेरि अमट डॊकु मुड़स लग्के पाक-अडाकि सेकेल लॆकयप चोव अड़ाय कॊड़ि सेकेल* टहरेत्रकु। 4 पेलिन डेड कॊड़ि सेकेल टहरेत्रकु 5 पच बचेरिन्ते कॊड़योन्द बचेरि अमट डॊकु मुड़स लग्के कॊड़योन्द सेकेल अन्ते पेलि लग्के दस सेकेल टहरेत्रकु। 6 मॆहनोन्द बचेरिन्ते पच बचेरि अमट डॊकु मुड़स मक़े लग्के पच सेकेल अन्ते पेल मक़ि लग्के तीन सेकेल टहरेत्रकु। 7 तीन कॊड़ि बचेरिन्ते अन्ते अदेन्ते कटप बॆडो मुड़स लग्के पन्द्रा सेकेल अन्ते पेलि लग्के दस सेकेल टहरेत्रकु।
8 अन्ते दिबिन ओयु इकेह् गोटे निंग्कि टहरेत्रप चोव चियोति पोलु दुकताह् तानि, आह् दिबिन ओयुव्रपेन ऎड़वु अगदु ओन्द्रान्देह्, अन्ते ऎड़वुह् अहिकि दामेन टहरेत्रान्देह्, दिबिन ओयुकि बड़े चोव ऎड़वुह् दामेन टहरेत्रान्देह्। 9 इके गोटेकि दिबिन ओयुव्रपेद् यॆहोवाक ऎड़वोति जोकेरे जानवरेद् तानि, आह् यॆहोवाक चियु आ गोटेदि पाकेद्। 10 आह् अदे बदलेत्रोमान्देह् अन्ते नन आक लग्के बदलेयोमान्देह्, एड़ु लग्के डग्रहान, बा डग्रहा लग्के एड़ुन चियोमान्देह्; अन्ते आह् मक़ोन्द जानवर लग्केह् नन जानवरेन बदलेयिह् तानि, अगरतेद् अन्ते बदलेयुव्रपेद् आ मक़िस जानवरेद् पाक मॆनेनिद्। 11 अन्ते आद् यॆहोवाक ऎड़वोति जोकेरेबलो सप्पाबलो इक जानवरेद् तानि, आह् अदे ऎड़वु अगदु ओन्द्रान्देह्। 12 अन्ते ऎड़वुह् आ जानवरेद् एड़ु मॆननो हों बा डग्रहा मॆननो हों अदिकि दामेन टहरेत्रान्देह्; ऎड़वु नीन दामेन टहरेत्रने आ चोवहि मॆनान्देद्! 13 जे आह् आ जानवरेन चोग़ोति मड़ेह् तानि, आह् अदिकि दामेनो आ दामेकि पचमा बक्रान जॊड़चकेह् चियान्देह्।
14 इकेह् गोटे तंग्कि अडान यॆहोवाक पाकेद् आनिह् अदेनो, ऎड़वुह् आ अडाकि दामेन अदिकि एड़ु बा डग्रहा चोव टहरेत्रान्देह्; ऎड़वुह् दामेन टहरेत्रिह् आ चोवहि मॆनान्देद्! 15 तंग्कि अडान पाकेद् आनुह् अदे चोग़ोति मड़ेह् तानि, आह् अदिकि टहरेत्रप दामेनो आ दामेकि पचमा बक्रान जॊड़चकेह् चियान्देह्, अन्ते आद् अहिकि मॆनेनिद्। 16 इकेह् गोटे तंग ननुव्रप अडा बागु बीतेकि इन्द्र-बाने बक्रान यॆहोवाक पाकेद् आनिह् तानि, आ केतेकि दामेद् अदेनो चागोति जक्रोतानि बिहेनिकि लॆकय चोव* मॆनान्देद्; होमेरोन्द* गोहमेकि दामेद् अड़ाय कॊड़ि सेकेल अनोन्देद्। 17 आह् यूबलि बचेरिन्ते तंग्कि केतेन पाकेद् आनिह् तानि, आद् निंग्कि टहरेत्र दाम चोव मॆनान्देद्। 18 जे आह् तंग्कि केतेन यूबलि बचेरि क़ॊक़ पाकेद् आनिह् तानि, ऎड़वुह् यूबलि बचेरि अमट बॆहु ऎंगर्प बचेरिकि दामेन इसाबेचेकेह् टहरेत्रप दामेन्ते ऎतत्रान्देह्। 19 तंग्कि केतेन पाक आनयाह् आह् अदे चोग़ोति मड़ेह् तानि, आह् अदिकि टहरेत्रप दामेनो आ दामेकि पचमा बक्रान जॊड़चकेह् चियान्देह्, अन्ते आद् नन्दु अहिकि मॆनेनिद्। 20 जे आह् तंग्कि केतेन चोग़ोमलाह्, बा आ केतेन नन मलेक बीसयाह् तानि, आद् इकोनो गोटे चोग़ुव्रोति पारयोमलाद्। 21 यूबलि बचेरिनो आ केतेद् किरत्रुव्रेनिद् अदेनो, आद् यॆहोवाक पाकेद् आनुव्रप केते चोव पाक मॆनेनिद्; अन्ते आद् ऎड़वुकि बीते मॆनेनिद्।
22 इकेह् गोटे तंग्कि अडा-बागु तंग ननुव्रप केतेन अम्बकेह् नन केतेन क़ेग़ाह् अन्ते अदे यॆहोवाक पाक आनिह् तानि, 23 ऎड़वुह् आ केतेकि दामेन यूबलि बचेरि अमट इसाबेयान्देह् अन्ते आ मलेह् टहरेत्रप आ दामेन यॆहोवाक पाक चियपोद् आनकेह् दामेन टहरेत्र दिनेनो चियान्देह्। 24 यूबलि बचेरिनो आ मलेह् आ केतेद् इक मलेकि बीते मॆन्जाद् अन्ते क़ेग़ुव्रयाद् अहिक किरत्रान्देह्। 25 गोट चोव इसाबेयेद् पाक-अडाकि सेकेल चोव मॆनान्देद्: सेकेलोन्देद् कॊड़योन्द गेरा अनोन्देद्*। 26 जे जानवरेरकि मेग़रो गोटेदि यॆहोवाकिद्; अनि नेह् गोटे जानवरेरकि मेग़रोन पाकेद् आनोति पोललेह्; आद् ऒयु मॆननो हों बा बेडि मॆननो हों, आद् यॆहोवाकिद्। 27 अन्ते आद् सप्पाबलो जानवरकिद् तानि, आह् अदिकि टहरेत्रप दामेनो आ दामेकि पचमा बक्रान जॊड़चकेह् चिचेकेह् अदे चोग़ान्देह्; बा आद् चोग़ुव्रोमलाद् तानि, निंग्कि टहरेत्रप दामेनो आद् बीसुव्रान्देद्। 28 जे इकेह् गोटे तंग बहानो डॊकु मलेरिनो, बा जानवरेनो, बा तंग्कि अडा-बागु केतेनो हों इन्द्रे गोटेन यॆहोवाक पाकेद् आनयाह् तानि, पाक आनुव्रपेद् बीसुव्रोति बा चोग़ुव्रोति बॆहोमलाद्; पाक आनुव्रपेद् गोटेदि यॆहोवाक कटप पाकेद्। 29 आड लग्के टहरेत्रुव्रप नेह् गोटे चोग़ुव्रोति पारयोमलाह्, आह् पिटुव्रान्देह्।
30 देसिनो क़ेक़लकि दनानो अन्ते मनकि क़न्जपेनो दसमा बक्राद् गोटेदि यॆहोवा बत्तेद्; आद् यॆहोवाक पाकेद्। 31 इकेह् गोटे तंग्कि दसमा बक्राकि इन्द्रे गोटेन चोग़ोति मड़ेह् तानि, आह् अदि गुनि पचमा बक्रान जॊड़चकेह् चिचेकेह् अदे चोग़ान्देह्। 32 अन्ते गोट ऒयु-बड़देनो दसमा बक्राद्, आद् गा गोवालेकि पिनेत चिना ननुव्रप दसमा रुवेद्, यॆहोवाक पाकेद्। 33 रुवेकि मालिकेह् रुवेद् एड़ुद् बा डग्रहाद् आञ्य टाकचकेह् टुन्डोमान्देह् अन्ते अदे बदलेत्रोमान्देह् हों; बदलेत्रिह् तानि, आद् अन्ते बदलेत्रुव्रपेद् आ मक़िस रुवेद् पाक मॆनेनिद्; अन्ते आद् चोग़ुव्रलेनिद्। 34 ईव ईव उकमेन हि से इस्राएलेरिन मॆन्त्रोति यॆहोवाद् सीनाय पहाड़ेनो मूसान उकम ननयाद्।
*२७:३ लगबग ६ किलोग्राम रुपा अनोन्देद्।
*२७:१६ बा: अदिन्ते क़क़ु क़ोयेकि बिहेनिकि लॆकय चोव
*२७:१६ होमेरोन्देद् दस ऎपा अनोन्देद् बा लगबग ३०० किलोग्राम अनोन्देद्