1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27
ऎड़वुरि लग्कि ऎयनेद्
1 यॆहोवाद् मूसान अदो अवडयाद्, आरोनेकि तंग़ाद ऎड़वुरिन ईञ्य अवडा: आबेरिन्ते नेह् गोटे तंग मलेरिनो कॆयप इक मल लग्केह् तंगेन डग्रयोमान्देह्। 2 तॆहो, तम्बाको, तंग़ादे, तंग़ादि, तंग उन्डग़ले, 3 बा मुड़सेत बॆदुव्राबलो तंग बहानो डॊकु तंग्कि बटगनि उन्डग़लनि, आव आव तंग अटगि बयाड़ेरकि कॆय लग्केह् तंगेन डग्रेयोति पारयलेह्। 4 तंग मलेरि मजि बॆडो आनुव्रु आ ऎड़वुह् ननेरि लग्केह्* तंगेन डग्रेचकेह् लजिन अड़सत्रोमान्देह्। 5 आबेर तमकि कुक-तलिन कुककि बजोनो चरत्रोमान्देर, बा तमकि दाड़िकि कूड़ेन चरत्रोमान्देर अन्ते तमकि गन्डिन बालयोमान्देर*। 6 आबेर तमकि गोसाञ्यिक पाक मॆनान्देर, अन्ते तमकि गोसाञ्यिकि नामिक लजिन अड़सत्रोमान्देर। आबेर गा यॆहोवाक क़ोसत्र ऎड़वेन, तमकि गोसाञ्यिकि पिटान कीदनेर आ लग्केर, आबेर पाक मॆनान्देर। 7 आबेर तमकि गोसाञ्यिक पाकेर आ लग्केर, आबेर पतुरयान, बा डग्रेयुव्रप पेलिन बॆदोमान्देर; आबेर तंग्कि डावेत अम्बप पेलिन हों बॆदोमान्देर। 8 ऎड़वुह् गोसाञ्यिकि पिटान कीदिह् आ लग्केर, निम मलेर अहिन पाक ननकु; निमेन पाक ननु यॆहोवान एनि से पाकेन आ लग्केह्, आह् गा निमे पाक मॆनान्देह्। 9 इक ऎड़वु गोटेकि तंग़ादिद् पतुरया मॆन्जेकिद् तंगेन डग्रेयिद् तानि, आद् तम्बाकोक लजिन अड़सत्रिद्; आद् चिचेत क़ोसुव्रान्देद्।
10 तंग बायेरि मजि बॆडो ऎड़वुह् चोव तंग्कि कुकनो आसिक ननके टहरेत्रेकि इसग़ने मालयुव्रकेह्, तंग्कि अंगा-गहन्डिन अत-चुयोति पाक ननुव्रप इकेह् गोटे आह् तंग्कि कुक-तलिन क़ास्राबलो बॆहत्रोमान्देह्, बा तमकि अंगान ईसोमान्देह्; 11 अन्ते आह् इक कॆयप गन्डि बहाक एकोमान्देह्, तम्बाको बा तॆहो मॆननो हों, आबेरि लग्केह् तंगेन डग्रेयोमान्देह्। 12 अन्ते आह् कॆयप मल बहाक एकोति लग्केह् गोसाञ्यिकि पाक-अडान्ते उरक़ाबलो, बा आ पाक-अडाक लजिन अड़सत्राबलो डॊकान्देह्; इकनिकि आह् तंग्कि गोसाञ्यिकि मालयु इसग़नेत आसिक ननके टहरेत्रुव्रपेह्; एनि से यॆहोवान। 13 अन्ते आ बॆडो ऎड़वुह् बॆदिह् आ पेलिद् बटगनि मॆनान्देद्। 14 आह् रन्डियनिन, बा अम्बप पेलिन, बा डग्रयेप पेलिन, बा पतुरयान बॆदोमान्देह्, जे आह् तंग्कि मलेरि मजतेन्ते बटगनिन हि बॆदान्देह्। 15 इन्देकेह् आह् तंग़ादेरिक तंग्कि मलेरि मजि लजिन अड़सत्रोमान्देह्; इकनिकि एनि से अहिन पाक ननु यॆहोवान।
16 यॆहोवाद् मूसान अदो अवडयाद्, 17 आरोनेन ईञ्य अवडा: निंग्कि नति-जालिरिनो गन्डिनो टडाताव मॆन्जेकेह् डॊकु नेह् गोटे इकोन्नो गोटे तंग्कि गोसाञ्यिकि पिटान कीदोति तुक्रोमान्देह्। 18 गन्डिनो टडाताव मॆन्जेकेह् डॊकु नेह् गोटे तुक्रोमान्देह्, क़ोट्रोह्, बा कॊड़ेह्, बा बालयप मुद्रा-आवेह्, बा डेरो दसे-आवेह्, 19 बा उड़ात्रप क़ॆडु-आवेह्, बा उड़ात्रप टॆटु-आवेह्, 20 बा कुबा-आवेह्, चापो-आवेह्, बा चॆकहा-आवेह्, बा चिलगे-चॊटवाह्, बा चॆलक्रु-आवेह्, बा कसत्रप जांगलो-आवेह् तुक्रोमान्देह्। 21 ऎड़वु आरोनेकि नति-जालिरिनो तंग्कि गन्डिनो टडाताव मॆन्जेकेह् डॊकु नेह् गोटे यॆहोवाक क़ोसत्र-ऎड़वेन कीदोति तुक्रोमान्देह्; आह् तंग्कि गन्डिनो टडातावेह् आ लग्केह्, आह् तंग्कि गोसाञ्यिकि पिटान कीदोति तुक्रोमान्देह्। 22 आह् तंग्कि गोसाञ्यिकि कटप पाक पिटान अन्ते नन पाक आकेन मिनोति पारयलेह्; 23 जे आह् तंग्कि गन्डिनो टडातावेह् आ लग्केह्, आह् ऎंग्कि पाक-अडाक लजिन अड़सत्रलोह् अदिक, आह् परदा उले कोरोमान्देह् बा ऎड़व-पिन्डा अटगि तुक्रोमान्देह्; इकनिकि एन आबेरिन पाक ननु यॆहोवान। 24 अनि मूसा ईव ईव सबान आरोनेन, अहि तंग़ादेरिन, अन्ते इस्राएलेर गोटेरिन तॆंग़ाह्।