1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27
सप्पाबलो ननु गन्डिन्ते उरक़पेद्
1 यॆहोवाद् मूसान अन्ते आरोनेन अदो अवडयाद्, 2 इस्राएलेरिन ईञ्य अवडा: इक मलेक गोटे अहिकि गन्डिन्ते उरक़ेद् उरक़िद् अदेनो, अहिकि उरक़पेद् सप्पाबलोद्। 3 अहिकि गन्डिन्ते उरक़ेद् लगारले उरक़ बॆहनो, बा आ उरक़ेद् तमार्पे मॆननो हों, आद् अहिन सप्पाबलो ननिद्। अहिकि उरक़ेद् अहिन ईञ्य सप्पाबलो ननिद्: 4 उरक़पताव आह् कॊडिह् आ गोट काटिद् सप्पाबलो मॆनेनिद्; आह् इक आकेनो गोटे ओकेह् आ आकेद् हों सप्पाबलो मॆनेनिद्। 5 इकेह् गोटे अहिकि काटिन कपिह् आह् तंग्कि लुगान कजान्देह्, अन्ते आह् अमुनो अमयान्देह्; अन्ते आह् बेड़ित अमट सप्पाबलो मॆनेह्। 6 उरक़पताव ओकयाह् आ ओकपेनो नेह् गोटे ओकिह् आह् तंग्कि लुगान कजकेह् अमुनो अमयान्देह्; आह् बेड़ित अमट सप्पाबलो मॆनेह्। 7 उरक़पतावेकि गन्डिन नेह् गोटे कपिह् आह् तंग्कि लुगान कजकेह् अमुनो अमयान्देह्; आह् बेड़ित अमट सप्पाबलो मॆनेह्। 8 उरक़पतावेह् सप्पाताव इकेह् गोटे मॆचे तुपिह् तानि, तुपुव्रु ईह् तंग्कि लुगान कजकेह् अमुनो अमयान्देह्; ईह् बेड़ित अमट सप्पाबलो मॆनेह्। 9 उरक़पतावेह् अरगकेह् ओकेह् एकिह् आ गोट ओकपोद् सप्पाबलो मॆनेनिद्। 10 अहि क़ोलग़रनो बॆहु इन्द्र गोटे आकेन कपिह् आह् बेड़ित अमट सप्पाबलो मॆनेह्; अन्ते आ चोव आकेन पॆतेकेह् ओयिह् आह् तंग्कि लुगान कजकेह् अमुनो अमयान्देह्, अन्ते आह् बेड़ित अमट सप्पाबलो मॆनेह्। 11 उरक़पतावेह् तंग्कि टॆटुन अमेत नॊड्राबलो इकेन गोटे कपिह् तानि, कपुव्रु ईह् तंग्कि लुगान कजकेह् अमुनो अमयान्देह्, अन्ते ईह् बेड़ित अमट सप्पाबलो मॆनेह्। 12 उरक़पतावेह् कपिह् आ क़जु-बान्डेद् क़ोटुव्रान्देद्; अन्ते अहिकि कपप कन्कु-आकेद् गोटेदिन अमेत नॊड़ुव्रान्देद्। 13 उरक़पतावेह् तंग्कि उरक़पेन्ते क़ाजग़र सप्पा ननुव्रिह् अदेनो, आह् सत दिनेकि पावे एरे डॊकान्देह्, अदि क़ॊक़ आह् तंग्कि लुगान कजकेह्, अम-जॊरेनो अमयान्देह्; अन्ते आह् सप्पा मॆनेह्। 14 अन्ते अटमा दिनेनो आह् मक़िस पुरेन बा मक़िस मक़ो-पॆरवान बॆटार नक़ेकि तम्बुकि कोरपोनो यॆहोवाकि क़न-सरि ओन्द्रकेह् ऎड़वुक चियान्देह्। 15 अन्ते ऎड़वुह् मक़ोन्देन चुम्बाड़ेये ऎड़वपो लग्किद् अन्ते ननेन क़ोसत्र ऎड़वपो लग्केह् कीदान्देह्; अन्ते ऎड़वुह् अहिकि उरक़े लग्केह् यॆहोवाकि क़न-सरि पापेन आडेकि ऎड़वेन कुदान्देह्।
16 इकेह् गोटेकि गन्डिन्ते बड़ेद् उरक़ाद् तानि, आह् अमुनो तंग्कि गोट गन्डिन नॊड़केह् अमयान्देह्, अन्ते आह् बेड़ित अमट सप्पाबलो मॆनेह्। 17 अन्ते उरक़प बड़ेकि उट्रप लुगा अन्ते चमेत मेन्जप गोट आकेद् अमेत नॊड़ुव्रान्देद्, अन्ते आव आवेद् बेड़ित अमट सप्पाबलो मॆनेनिद्। 18 मलेह् पेलि गुनि कॊड्र नक़्क़ेह् तंग्कि बड़ेन उरक़त्रिह् तानि, आ इव्रेर अमुनो अमयान्देर, अन्ते बेड़ित अमट सप्पाबलो मॆनेर।
19 तंग गन्डिन्ते मॆहनाकि क़ेस उरक़ु पेलिद् आ उरक़े लग्किद् सत दिनि अमट सप्पाबलो मॆनेनिद्, अन्ते नेद् गोटे अदिन कपिद् आद् बेड़ित अमट सप्पाबलो मॆनेनिद्। 20 अन्ते आ दिनेनो आद् कॊडिद् आ साजिद्, अन्ते आद् ओकिद् आ जगेद् हों सप्पाबलो मॆनेनिद्। 21 अन्ते नेह् गोटे अदिकि साजिन कपिद् आह् तंग्कि लुगान कजान्देह्, अन्ते अमुनो अमचकेह् बेड़ित अमट सप्पाबलो मॆनेह्। 22 अन्ते नेह् गोटे आद् ओकिद् आ ओकपोन कपिह् आह् तंग्कि लुगान कजान्देह्, अन्ते अमनो अमचकेह् बेड़ित अमट सप्पाबलो मॆनेह्। 23 आद् ओकिद् आद् साजिद् मॆननो हों, बा इन्द्र-बॆडि आकेद् मॆननो हों, नेह् गोटे अदिन कपिह् अदेनो, आह् बेड़ित अमट सप्पाबलो मॆनेह्। 24 अन्ते आ दिनेनो आ चोव पेलि गुनि नेह् गोटे कॊड्र नक़िह् आह् अदिकि उरक़प क़ेसेत सत दिनि अमट सप्पाबलो मॆनेह्; अन्ते आह् कॊडिह् आ साजिद् हों सप्पाबलो मॆनेनिद्।
25 पेलिक अदिकि मॆहनाकि क़ेसु उरक़ेद् आ दिनेन अम्बकिद् अदो गड़हि दिनि अमट उरक़ बॆहिद्, बा अदिकि सप्पाबलो दिनेन्ते कटकिद् उरक़ बॆहिद् तानि, आद् तंग्कि क़ेसु उरक़ दिने नॊड़ डोकयाद् आ चोवहि क़ेसु उरक़ दिनि अमट सप्पाबलोनो हि डॊकान्देद्। 26 ई दिनेनो आद् कॊडिद् आ साजिद् अगदु अदिकि क़ेस उरक़ दिनेनो सप्पाबलो मॆन्जाद् आ चोवहि हों सप्पाबलो मॆनेनिद्। अन्ते आद् ओकिद् आ ओकपोद् हों अगदु अदिकि क़ेस उरक़ दिनेनो सप्पाबलो मॆन्जाद् आ चोवहि हों सप्पाबलो मॆनेनिद्। 27 अन्ते नेह् गोटे आव आव आकेन कपिह् आह् तंग्कि लुगान कजान्देह्, अन्ते अमुनो अमचकेह् बेड़ित अमट सप्पाबलो मॆनेह्। 28 जे आद् तंग्कि क़ेसु उरक़ेद् तमारकिद् सप्पा मॆन्जेकिद् डॊकिद् अदेनो, आद् सात दिनेकि पावे एरे डॊकान्देद्, अन्ते अदि क़ॊक़ आद् सप्पा मॆनेनिद्। 29 अन्ते अटमा दिनेनो आद् मक़िस पुरेन बा मक़िस मक़ो-पॆरवान बॆटार नक़ेकि तम्बुकि कोरपोनो ऎड़वु बहाक ओन्द्रान्देह्। 30 अन्ते ऎड़वुह् मक़ोन्देन चुम्बाड़ेये ऎड़वपो लग्किद् अन्ते ननेन क़ोसत्र ऎड़वपो लग्केह् कीदान्देह्; अन्ते ऎड़वुह् अदिकि क़ेसु उरक़ेकि सप्पाबलो लग्केह् यॆहोवाकि क़न-सरि पापेन आडेकि ऎड़वेन कुदान्देह्। 31 इस्राएलेर तम मजि ओकु ऎंग्कि पाक-अडान डग्रेचकेर तमकि सप्पाबलोनो कॆयलोर अदिक, इन्देकेर निमे आबेरिन आबेरकि सप्पाबलोन्ते ऎड़ात्रोति बॆहिद्। 32 गन्डिनो उरक़पतावेक, बड़ेद् उरक़नो सप्पाबलो मॆनुक, 33 अन्ते मॆहनाकि क़ेस उरक़ु पेलिक, गन्डिनो उरक़पताव मुड़सेक अन्ते पेलिक, क़ाजग़र सप्पाबलो पेलि गुनि कॊड्र नक़ु मुड़सेक हों चियप नियमेद् ईदि से।