अटारु चमे बागु चॊटेन्ते सप्पा मॆनेद्
1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27
1 यॆहोवाद् मूसान अवडयाद्, 2 मुगडोतावेकि क़ाजग़र सप्पाह् आनुव्र दिन पन्तेकि नियमेद् ईदि से: मुगडोतावेह् ऎड़वु बहाक ओन्दरुव्रान्देह्। 3 अन्ते ऎड़वुह् बेड़यप तुन्ग़र्पेकि दुवारिक एक्केह् अहिन टाकचकेह् टुन्डान्देह्। अनि मुगडोतावेकि मुगडोद् नॆकचाद् आञ्य अन्डिह् तानि, 4 ऎड़वुह् सप्पा आनुव्रु लग्केह् क़ाजग़र सप्पा मक़िस उजु पुजे, देवदारु मनकि कन्के, क़ेसलो मेरे, अन्ते ईसोपेन ओन्द्रोति उकम ननान्देह्; 5 अन्ते ऎड़वुह् आ मक़िस पुजन्ते मक़ोन्देन पतलिनो ओकु टटका अम-जॊरेकि अमु मॆचे पिटोति उकम ननान्देह्। 6 अन्ते आह् नन उजु पुजे, देवदारु मनकि कन्क, क़ेसलो मेरु, अन्ते ईसोपे मादि पॆतेकेह् टटका अम-जॊरेकि अमु मॆचे पिटुव्रप पुजकि क़ेसनो डुंगत्रान्देह्, 7 अन्ते ऎड़वुह् सप्पाह् आनुव्रु मल मॆचे सत केप चिटयान्देह्; अदि क़ॊक़ अहिन सप्पाह् आञ्य उस्रात्रान्देह्, अन्ते उजु पुजे पहचाड़ेनो उडयात्रान्देह्। 8 अन्ते सप्पाह् आनुव्रुह् तंग्कि लुगान नॊड़केह्, तंग्कि कुक-तलिन सालमे मुन्डत्रान्देह्, अन्ते आह् अमुनो अमयान्देह्, अन्ते आह् क़ाजग़र सप्पाह् मॆनेह्, अन्ते अदि क़ॊक़ आह् बेड़यप तुन्ग़र्पे उले कोरोति पारयलेह्; जे आह् तंग्कि तम्बुकि दुवारिनो सत दिनि अमट डॊकान्देह्। 9 अन्ते सतमा दिने आह् तंग्कि कुक-तलिन सालमे मुन्डत्रान्देह्; अन्ते आह् तंग्कि दाड़िन, अन्ते तंग्कि क़न-बावड़ाकि तलिन, तंग्कि गोट तलिन मुन्डत्रान्देह्। अदि क़ॊक़ आह् तंग्कि लुगान नॊड़केह् अमुनो अमयान्देह्, अन्ते आह् क़ाजग़र सप्पाह् मॆनेह्।
10 अन्ते अटमा दिने आह् टडाबलो मक़िस बोकड़ा बेडि-मक़ुन, टडाबलो मक़ोन्द डडि बेडि-मक़ुन, दनाकि-कीदपो लग्कि तीन किलोग्राम* जलपाय इसग़नेत सानयप कटप एड़ु आटान अन्ते ३३४ ग्राम* जलपाय इसग़ने ओन्द्रान्देह्। 11 अन्ते अहिन सप्पाह् आनु ऎड़वुह् सप्पाह् आनुव्रु आ मलेन अन्ते अहिकि ईव ईव आकेन हों बॆटार नक़ेकि तम्बुकि कोरपोनो यॆहोवाकि क़न-सरि ओन्द्रान्देह्। 12 अन्ते ऎड़वुह् बोकड़ा बेडि-मक़ुन्ते मक़ोन्देन ३३४ ग्राम जलपाय इसग़नु मादि किरत्र ऎड़वे* चोव कीदान्देह्, अन्ते आह् आव आवेन यॆहोवाकि क़न-सरि आवड़ेय-कीदपो चोव आवड़ेयान्देह्। 13 अन्ते आह् चुम्बाड़-ऎड़वेन अन्ते क़ोसत्र-ऎड़वेन पिटुव्र पाक-जगेनो आ बेडि-मक़ुन पिटान्देह्; किरत्र-ऎड़वेद् गा चुम्बाड़-ऎड़वे चोव ऎड़वु बत्तेद्; आद् कटप पाकेद्। 14 ऎड़वुह् आ किरत्र-ऎड़वेकि क़ेसन्ते रेकोन्देन ओत्रकेह्, सप्पा आनुव्रुकि तिना क़ॆदवुकि क़ॊरनो, अहिकि तिना टॆटुकि बुड-अंगलिनो, अन्ते अहिकि तिना क़ॆडकि बुड-अंगलिनो हों ओजान्देह्। 15 अदि क़ॊक़ ऎड़वुह् आ ३३४ ग्राम जलपाय इसग़नुन्ते रेकोन्देन ओत्रकेह् तंग्कि दॆब्रा टॆटुकि आतग़ेनो पुदयान्देह्, 16 अन्ते तंग्कि दॆब्रा टॆटुनो बॆहु इसग़नुनो तंग्कि तिना टॆटुकि अंगलित डुंगत्रकेह्, तंग्कि अंगलित सत केप आ इसग़नुन्ते ओत्रकेह् यॆहोवाकि क़न-सरि चिटयान्देह्; 17 अन्ते तंग्कि टॆटुकि आतग़ेनो बॆहु ऎंगर्प इसग़नुन्ते रेकोन्देन ओत्रकेह्, सप्पा आनुव्रुकि तिना क़ॆदवुकि क़ॊरनो, अहिकि तिना टॆटुकि बुड-अंगलिनो, अन्ते अहिकि तिना क़ॆडकि बुड-अंगलिनो हों, अगदु ओजप किरत्र ऎड़वेकि क़ेस मॆचे ओजान्देह्; 18 अन्ते आह् तंग्कि टॆटुकि आतग़ेनो बॆहु ऎंगर्प इसग़ने सप्पा आनुव्रुकि कुकनो पुदचकेह्, यॆहोवाकि क़न-सरि आ मल लग्केह् पापेन आडेकि ऎड़वेन कुदान्देह्।
19 ऎड़वुह् चुम्बाड़-ऎड़वेन कीदकेह्, सप्पा आनुव्रुकि सप्पाबलोन्ते आ मलेह् सप्पा आनुव्रलेह् अदिक अहि लग्केह् पापेन आडेकि ऎड़वेन कुदान्देह्। अदि क़ॊक़, आह् क़ोसत्र-ऎड़वेन हों पिटान्देह्; 20 अन्ते ऎड़वुह् क़ोसत्र-ऎड़वेन अन्ते दनाकि-कीदपोन ऎड़व-पिन्डानो कीदान्देह्। अन्देकेह् आह् आ मल लग्केह् पापेन आडेकि ऎड़वेन कुदान्देह्, अन्ते आह् सप्पाह् मॆनेह्।
21 जे आह् इनोपान कुदोति पारयोमलु दुकताह् तानि, आह् तंग्कि पापेन आडेकि ऎड़वेन कुदोति आवड़ेय-कीदपो किरत्र ऎड़वे चोव मक़ोन्द बोकड़ा बेडि-मक़ुन, दनाकि-कीदपो लग्कि तीन किलोग्राम* जलपाय इसग़नेत सानयप कटप एड़ु आटान अन्ते ३३४ ग्राम जलपाय इसग़ने ओन्द्रान्देह्; 22 अन्ते आह् तान पारयलेह् आ चोव मक़िस पुरेन बा मक़िस मक़ो-पॆरवान, मक़ोन्देन चुम्बाड़ेये ऎड़वपो लग्किद् अन्ते ननेन क़ोसत्र ऎड़वपो लग्केह् ओन्द्रान्देह्। 23 अन्ते अटमा दिनेनो आह् तंग्कि सप्पा मॆन लग्केह् ईव ईवेन बॆटार नक़ेकि तम्बुकि कोरपोनो यॆहोवाकि क़न-सरि ऎड़वु बहाक ओन्द्रान्देह्। 24 अन्ते ऎड़वुह् किरत्र ऎड़वेकि बेडि-मक़ुन अन्ते आ ३३४ ग्राम जलपाय इसग़ने हों ईन्ज्रकेह्, यॆहोवाकि क़न-सरि आवड़ेयु दनाकि-कीदपो चोव आवड़ेयान्देह्, 25 अन्ते आह् किरत्र ऎड़वेकि आ बेडि-मक़ुन पिटकेह्, किरत्र ऎड़वेकि क़ेसन्ते रेकोन्देन ओत्रकेह् सप्पा आनुव्रुकि तिना क़ॆदवुकि क़ॊरनो, अहिकि तिना टॆटुकि बुड-अंगलिनो, अन्ते अहिकि तिना क़ॆडकि बुड-अंगलिनो हों ओजान्देह्, 26 अन्ते आह् आ इसग़नुन्ते रेकोन्देन ओत्रकेह् तंग्कि तिना टॆटुनो पुदयान्देह्, 27 अन्ते तंग्कि दॆब्रा टॆटुनो बॆहु इसग़नुनो तंग्कि तिना टॆटुकि अंगलित डुंगत्रकेह्, सत केप यॆहोवाकि क़न-सरि चिटयान्देह्; 28 अन्ते ऎड़वुह् तंग्कि टॆटुकि आतग़ेनो बॆहु इसग़नुन्ते रेकोन्देन ओत्रकेह्, सप्पा आनुव्रुकि तिना क़ॆदवुकि क़ॊरनो, अहिकि तिना टॆटुकि बुड-अंगलिनो, अन्ते अहिकि तिना क़ॆडकि बुड-अंगलिनो हों, अगदु किरत्र ऎड़वेकि क़ेसुद् ओजुव्रयाद् आ जगेनो ओजान्देह्; 29 अन्ते ऎड़वुह् तंग्कि टॆटुकि आतग़ेनो बॆहु ऎंगर्प इसग़ने सप्पा आनुव्रुकि कुकनो यॆहोवाकि क़न-सरि आ मल लग्केह् पापेन आडेकि ऎड़वेन कुदोति पुदयान्देह्। 30 अन्ते आह् तान पारयलेह् आ चोव पुरेन बा मक़ो-पॆरवान ओन्द्रान्देह्; 31 अन्ते मक़ोन्देन चुम्बाड़ेये ऎड़वपो लग्किद् अन्ते ननेन क़ोसत्र ऎड़वपो लग्केह् दनाकि-कीदपो मादि कीदान्देह्; अन्ते ऎड़वुह् सप्पा आनुव्रु लग्केह् यॆहोवाकि क़न-सरि पापेन आडेकि ऎड़वेन कुदान्देह्। 32 तंग्कि सप्पा आनुव्र लग्कि इनोपान कीदपोन ओन्द्रोति पारयोमलु मुगडोताव पन्तेकि नियमेद् ईदि से।
अडानो अगार चॊटेद् बॆहनो
33 यॆहोवाद् मूसान अन्ते आरोनेन अदो अवडयाद्, 34 एन निमे बीत चोव चियिन आ काना देसिक नीम अड़स क़ॊक़, निमकि बीत आनुव्रु आ देसिनो इकेबेडि अडानो एन अगारु चॊटेन ओजिन तानि, 35 आ अडा-आवेह् बरचकेह् ऎड़वुन ईञ्य अवडान्देह्: ऎंग्कि अडानो इन्द्र-बॆडि अगारु चॊटेद् एत्रिद्। 36 अनि ऎड़वुह् आ अगारु चॊटेन टाकचकेह् टुन्ड अगदु, आ अडानो बॆहु गोट आकेद् सप्पाबलोद् आनुव्रलोद् अदिक, आह् आ अडान आन्द्र ननोति उकम ननान्देह्; अदि क़ॊक़ आह् आ अडाक कोरचकेह् टाकचकेह् टुन्डान्देह्। 37 अन्ते आह् आ अगारु चॊटेन टाकचकेह् टुन्डान्देह्; अन्ते अडाकि दॆवालिनो क़ेन-क़ज्रो बा क़ेसलो टडाद् एत्रिद् तानि, अन्ते आ टडाद् दॆवालिकि नन दॆवालिन्ते कटप क़ोन्डेतानि चोव एत्रिद् तानि, 38 ऎड़वुह् आ अडान्ते दुवारिक उरक़्क़ेह् आ अडान सत दिनि अमट मुचकेह् बॆहत्रान्देह्। 39 अन्ते ऎड़वुह् सतमा दिनेनो नन्दु एक्केह् टाकचकेह् टुन्डान्देह्; अन्ते आ अगारु चॊटेद् अगारकिद् बॆहिद् आञ्य अन्डिह् तानि, 40 ऎड़वुह् आ अगारु चॊटेद् बॆहु आ जगेकि चाच गहन्डिन ओत्रोति, अन्ते आव आव चाचेन सहरेकि दुवारिनो सप्पाबलो जगेनो तुवोति उकम ननान्देह्। 41 अन्ते आह् अडाकि उलतेकि दॆवालि गोटेदिन कॆरचत्रान्देह्, अन्ते कॆरचत्रप ऒत्रपेन सहरेकि दुवारिनो सप्पाबलो जगेनो पुदयत्रान्देह्। 42 अदि क़ॊक़, ओत्रप चाच गहन्डिकि जगेनो नन चाच गहन्डिन ओजोति, अन्ते अडान नन कॆरचत्रके ऒत्रोति हों उकम ननान्देह्। 43 चाच गहन्डिन ओत्र, अन्ते अडाकि दॆवालिन कॆरचत्र, अन्ते पुन ऒत्र क़ॊक़ हों आ अडानो आ अगारु चॊटेद् नन्दु एत्रिद् तानि, 44 ऎड़वुह् नन्दु एक्केह् आ अडान टाकचकेह् टुन्डान्देह्; अन्ते अडानो आ चॊटेद् अगारयाद् तानि, अटारकिद् बॆहिद् तानि, आद् आडु अगारु चॊटेद्, आद् सप्पाबलोद्। 45 अनि आ अडाद् उरेतारे क़ोटुव्रान्देद्, अदिकि चाच गहन्डिद्, कन्कु गहन्डिद्, अन्ते अदिकि ऒत्रपेन गोटेदिन सहरेकि दुवारिनो सप्पाबलो जगेक ओयुव्रान्देद्। 46 आ अडाद् मुचपे मॆननो नेह् गोटे अदिक कोरिह् आह् बेड़ित अमट सप्पाबलो मॆनेह्; 47 अन्ते आ अडानो कॊडयाह् आह् तंग्कि लुगान नॊड़ान्देह्; अन्ते आ अडानो लपयाह् आह् हों तंग्कि लुगान नॊड़ान्देह्।
48 अन्ते पुन ऒत्र क़ॊक़ हों ऎड़वुह् बरचकेह् आ अडान टाकचकेह् टुन्डनो, आ अडानो आ चॊटेद् नन्दु अगारोमलाद् आञ्य अन्डिह् तानि, आह् आ अडान सप्पाद् आञ्य उस्रात्रान्देह्। 49 ऎड़वुह् अडान सप्पा आनुव्रोति लग्केह् मक़िस उजु पुजे, देवदारु मनकि कन्के, क़ेसलो मेरे, अन्ते ईसोपेन ओचेकेह्, 50 आ मक़िस पुजन्ते मक़ोन्देन पतलिनो ओकु टटका अम-जॊरेकि अमु मॆचे पिटान्देह्, 51 अन्ते आह् देवदारु मनकि कन्के, ईसोपेन, अन्ते क़ेसलो मेरे नन उजु पुज मादि पॆतेकेह् पिटुव्रप पुजकि क़ेसनो अन्ते टटका अम-जॊरेकि अमुनो हों डुंगत्रान्देह्, अन्ते अडानो सत केप चिटयान्देह्। 52 अन्ते ऎड़वुह् पिटुव्रप पुजकि क़ेसेत, टटका अम-जॊरेकि अमेत, उजु पुजेत, देवदारु मनकि कन्केत, ईसोपेत, अन्ते क़ेसलो मेरुत आ अडान सप्पा ननान्देह्; 53 अन्ते आह् उजु-पुजे सहरेकि दुवारिनो पहचाड़ेनो उडयात्रान्देह्; आह् इन्देकेह् आ अडा लग्केह् पापेन आडेकि ऎड़वेन कुदान्देह्। 54 ईदि से गोट चोव मुगडो देने चॊट लग्कि नियमेद्: चिलगे लग्कि, 55 लुगा बागु अगारु चॊट, अडा बागु अगारु चॊट लग्कि, 56 पूग़टो बा कटरु बा जिन्प्रो टडा लग्कि नियमेद्; 57 मुगडोद् इक पहरा सप्पाबलोद् अन्ते इक पहरा सप्पाद् आञ्य आदोति लग्कि मुगडो पन्तेकि नियमेद् ईदि से।
*१४:१० दसनो तीनेन्डा ऎपा अनोन्देद्