1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27
चमे बागु चॊट पन्तेकि ऎयन गहन्डिद्
1 यॆहोवाद् मूसान अन्ते आरोनेन नन्दु अवडयाद्, 2 इकेह् गोटेकि गन्डिकि चमेनो इन्द्र-बाने पूग़टोद् बा कटरुद् बा टडाद् मॆन्जेकिद् आद् मुगडो चोव लॆहारिद् तानि, आह् ऎड़वु आरोन बहाक बा अहिकि तंग़ाद ऎड़वुरि बहाक ओन्दरुव्रान्देह्। 3 अन्ते ऎड़वुह् अहिकि चमेनो बॆहु आ चॊटवारु टडान टाकचकेह् टुन्डान्देह्, अन्ते आ चॊटवारु टडानो बॆहु तलिद् जिन्प्रो लॆहारकिद् बॆहिद् अन्ते चॊटेद् अहिकि चमेन्ते कटप क़ोन्डेतानि चोव एत्रिद् तानि, आद् मुगडोद् बरु। ऎड़वुह् अहिन टाकचकेह् टुन्ड क़ॊक़ अहिन क़ाजग़र सप्पाबलोह् आञ्य उस्रात्रान्देह्। 4 जे आ मलेकि टडाद् जिन्प्रोद् मॆन्जेकिद् चमेन्ते कटप क़ोन्डेतानि चोव एत्रोमलाद्, अन्ते आ टडानो बॆहु तलिद् जिन्प्रो लॆहारोमलाद् तानि, ऎड़वुह् आ चॊटवारु मलेन तंगमाने सत दिनि अमट डॊकत्रान्देह्। 5 अन्ते ऎड़वुह् अहिन सतमा दिने नन्दु टाकचकेह् टुन्डान्देह्, अन्ते अहिकि क़ननो चॊटेद् बदलारोमलाद् अन्ते चमेनो अगारोमलाद् तानि, ऎड़वुह् नन्दु अहिन तंगमाने अदो सत दिनि अमट डॊकत्रान्देह्। 6 अन्ते ऎड़वुह् अहिन सतमा दिने नन्दु टाकचकेह् टुन्डान्देह्, अन्ते चॊटवारु टडाद् चमेनो अदो अगारबलो क़ायपे मॆन्जेकिद् बॆहिद् तानि, ऎड़वुह् अहिन क़ाजग़र सप्पाह् आञ्य उस्रात्रान्देह्; अहिकि चॊटेद् गा कटरुद् दूरेहि; अन्ते आह् तंग्कि लुगान नॊड़केह् सप्पा मॆनान्देह्। 7 जे आह् तंगेन सप्पान आनकेह् ऎड़वुक एत्रयाह् अदि क़ॊक़, आ कटरुद् अहिकि चमेनो अगारिद् तानि, अहिक नन्दु ऎड़वुक तंगेन एत्रोति बॆहिद्। 8 अन्ते ऎड़वु अहिन टाकचकेह् टुन्डान्देह्; आ कटरुद् अहिकि चमेनो अगार्पेद् आञ्य अन्डुव्रिद् तानि, ऎड़वुह् अहिन सप्पाबलोह् आञ्य उस्रात्रान्देह्। आद् मुगडोद् बरु।
9 इकेह् गोटे मुगडोत चॊटवारकेह् डॊकिह् अदेनो, आह् ऎड़वु बहाक ओन्दरुव्रान्देह्। 10 अन्ते ऎड़वुह् अहिन टाकचकेह् टुन्डान्देह्, अन्ते अहिकि चमेनो जिन्प्रो पूग़टोद् बॆहिद्, अन्ते आद् अहिकि तलिन जिन्पत्रयाद्, अन्ते आ पूग़टोनो टटका माकुद् एत्रिद् तानि, 11 आद् अहिकि गन्डिनो गड़हि दिने बॆहु मुगडोद्, अन्ते ऎड़वुह् अहिन सप्पाबलोह् आञ्य उस्रात्रान्देह्, अन्ते आ चॊटवान नन्दु टाकयोति लग्केह् तंगमाने डॊकत्रोमान्देह्, आह् गा सप्पाबलोह् बरु। 12 अन्ते आ मुगडोद् ऎड़वुह् टुन्डोति पारयिह् अनोन्द अहिकि गन्डिनो अहिकि कुकन्ते क़ॆड अमट अगारकिद् बॆहिद् तानि, 13 ऎड़वुह् अहिन टाकचकेह् टुन्डान्देह्, अन्ते अहिकि चॊटेद् अहिकि गन्डि गामे अगार्पेद् तानि, ऎड़वुह् अहिन सप्पाह् आञ्य उस्रात्रान्देह्; अहिकि गन्डिद् उरेतारे जिन्पचाद् आ लग्केह्, आह् सप्पाबलोह् बरु। 14 जे अहिकि गन्डिनो टटका माकुद् एत्रिद् तानि, आह् सप्पाबलोह् बरु। 15 अनि ऎड़वुह् टटका माके टाकचकेह् टुन्डान्देह्, अन्ते अहिन सप्पाबलोह् आञ्य उस्रात्रान्देह्, टटका माकुद् सप्पाबलोद्, आद् गा मुगडोद्। 16 जे टटका माकुद् बदलारकिद् नन्दु जिन्पचाद् तानि, आह् ऎड़वु बहाक बरान्देह्। 17 अन्ते ऎड़वुह् अहिन टाकचकेह् टुन्डान्देह्, अन्ते अहिकि चॊटेकि जगेद् जिन्पचाद् आञ्यले टुन्डिह् तानि, ऎड़वुह् अहिन सप्पाह् आञ्य उस्रात्रान्देह्; आह् सप्पाह् बरु।
18 इकेह् गोटेकि गन्डिनो पूग़ेद् मॆन्जेकिद् नॆकचाद्, 19 अन्ते आ पूग़प जगेनो इन्द्र-बॆडि जिन्प्रो पूग़टोद् बा क़ेसलो-जिन्प्रो टडाद् एत्रिद् तानि, आह् अदे ऎड़वुक एदान्देह्। 20 अन्ते ऎड़वुह् अहिकि चमेनो बॆहु आ चॊटवारु टडान टाकचकेह् टुन्डान्देह्, अन्ते आ चॊटेद् अहिकि चमेन्ते कटप क़ोन्डेतानि चोव एत्रिद्, अन्ते आ टडानो बॆहु तलिद् जिन्प्रो लॆहारकिद् बॆहिद् तानि, ऎड़वुह् अहिन टाकचकेह् टुन्ड क़ॊक़ अहिन क़ाजग़र सप्पाबलोह् आञ्य उस्रात्रान्देह्; आद् आ पूग़टोन्ते चोयु मुगडोद् बरु। 21 जे ऎड़वुह् अदे टाकचकेह् टुन्डनो, अदि मॆचे बॆहु तलिद् जिन्पोमलाद्, अन्ते आ चॊटेद् अहिकि चमेन्ते कटप क़ोन्डेतानि चोव एत्रोमलाद् जे क़ायपे मॆन्जेकिद् बॆहिद् तानि, ऎड़वुह् आ चॊटवारु मलेन तंगमाने सत दिनि अमट डॊकत्रान्देह्; 22 अदि क़ॊक़, अहिकि चमेनो अगार्पेद् आञ्य अन्डुव्रिद् तानि, ऎड़वुह् अहिन सप्पाबलोह् आञ्य उस्रात्रान्देह्; आद् मुगडोद् बरु। 23 जे आ जिन्प्रो टडाद् अदो अगारबलो आ जगेनो हि बॆच एकिद् तानि, आद् पूग़टोकि टडाद्; अन्ते ऎड़वुह् अहिन सप्पाह् आञ्य उस्रात्रान्देह्।
24 बा, इकेह् गोटेकि गन्डिनो चिचेत क़ोसुव्रकिद्, आ क़ोसुव्रप गन्डिनो क़ेसलो-जिन्प्रो बा जिन्प्रो टडाद् लॆहारिद् तानि, 25 ऎड़वुह् अदे टाकचकेह् टुन्डान्देह्, अन्ते आ टडानो बॆहु तलिद् जिन्प्रो लॆहारकिद् बॆहिद् अन्ते आ चॊटेद् अहिकि चमेन्ते कटप क़ोन्डेतानि चोव एत्रिद् तानि, आद् आ पूग़टोन्ते चोयु मुगडोद्; अन्ते ऎड़वुह् अहिन क़ाजग़र सप्पाबलोह् आञ्य उस्रात्रान्देह्, आद् तो मुगडोद् बरु। 26 जे ऎड़वुह् अदे टाकचकेह् टुन्डनो, अदि मॆचे बॆहु तलिद् जिन्पोमलाद्, अन्ते आ चॊटेद् अहिकि चमेन्ते कटप क़ोन्डेतानि चोव एत्रोमलाद् जे क़ायपे मॆन्जेकिद् बॆहिद् तानि, ऎड़वुह् आ चॊटवारु मलेन तंगमाने सत दिनि अमट डॊकत्रान्देह्; 27 अदि क़ॊक़, सतमा दिने ऎड़वुह् अहिन टाकचकेह् टुन्डान्देह्, अन्ते अहिकि चमेनो अगार्पेद् आञ्य अन्डुव्रिद् तानि, ऎड़वुह् अहिन सप्पाबलोह् आञ्य उस्रात्रान्देह्; आद् गा मुगडोद् बरु। 28 जे आ जिन्प्रो टडाद् अदो अगारबलो आ जगेनो हि बॆच एकिद् जे क़ायपे मॆन्जेकिद् बॆहिद् तानि, आद् क़ोसेत मॆनप टडाद्; अन्ते ऎड़वुह् अहिन सप्पाह् आञ्य उस्रात्रान्देह्; आद् गा क़ोसेत मॆनप दागेद्।
29 इके गोटे मले बा मलनिकि कुकनो बा कॆबुनो गावेद् चोयिद् तानि, 30 ऎड़वुह् आ चॊटेन टाकचकेह् टुन्डान्देह्; अन्ते आ चॊट जगेद् अहिकि चमेन्ते कटप क़ोन्डेतानि अन्ते अदिकि तलिद् बालको अन्ते मॆहिन् चोव एत्रिद् तानि, ऎड़वुह् अहिन क़ाजग़र सप्पाबलोह् आञ्य उस्रात्रान्देह्; आद् तो कुकनो अन्ते कॆबुनो मॆनप चिलग-मुगडोद्। 31 ऎड़वुह् आ चिलग-मुगडोन टाकचकेह् टुन्डिह् अदेनो, आ चॊटेकि जगेद् अहिकि चमेन्ते कटप क़ोन्डेतानि चोव एत्रोमलाद् अन्ते अदेनो मड़ग़रो तलिद् बॆहोमलाद् आञ्य अन्डिह् तानि, ऎड़वुह् अहिन सत दिनि अमट तंगमाने डॊकत्रान्देह्; 32 अन्ते अदि क़ॊक़ सतमा दिनेनो ऎड़वुह् आ चॊटेन टाकचकेह् टुन्डान्देह्; अन्ते आ चिलगेद् अगारबलो बॆहिद्, अदेनो बालको तलिद् बॆहोमलाद् अन्ते चिलगे-जगेद् अहिकि चमेन्ते कटप क़ोन्डेतानि चोव एत्रोमलाद् तानि, 33 आ मलेह् आ चिलगे-जगेन अम्बकेह् नन गोट जगेन क़ेरान्देह्; अदि क़ॊक़ ऎड़वुह् अहिन दूसरा केप हों सत दिनि अमट तंगमाने सत दिनि अमट डॊकत्रान्देह्; 34 अन्ते सतमा दिने ऎड़वुह् चिलगेन टाकचकेह् टुन्डान्देह्; अन्ते आ चिलगेद् अगारबलो बॆहिद्, अन्ते चिलगे-जगेद् अहिकि चमेन्ते कटप क़ोन्डेतानि चोव एत्रोमलाद् तानि, ऎड़वुह् अहिन सप्पाह् आञ्य उस्रात्रान्देह्; आह् तंग्कि लुगान कजान्देह् अन्ते अदि क़ॊक़ आह् सप्पा मॆनेह्। 35 जे आह् सप्पाह् आञ्य उस्रात्रुर क़ॊक़ आ चिलगेद् अहिकि चमेनो अगारिद् तानि, 36 ऎड़वुह् अहिन नन्दु टाकचकेह् टुन्डान्देह्; अन्ते आ चिलगेद् अगारकिद् बॆहिद् तानि, ऎड़वुह् अदिकि तलिद् बालको चोव एत्रिद् बा एत्रोमलाद् आञ्य टुन्डोति जक्रो मलाद्, आ मलेह् तो सप्पाबलोह् बरु। 37 जे अहिकि क़ननो आ चिलगेद् आगरोमलाद्, अन्ते अदेनो एड़ु मड़ग़रो तलिद् पद्रकिद् बॆहिद् तानि, आ चिलेद् नॆकचाद् अन्ते आह् सप्पाह्, अन्ते ऎड़वुह् अहिन सप्पाह् आञ्य उस्रात्रान्देह्।
38 इके गोटे मलेक बा मलनिक गन्डिनो जिन्प्रो टडाद् बॆहिद् तानि, 39 ऎड़वुह् आबेरिन टाकचकेह् टुन्डान्देह्, अन्ते आबेरकि गन्डिनो बॆहु आव आव जिन्प्रो टडाद् क़ायप जिन्प्रोद् तानि, आद् चमेन्ते चोयु चमे-बागु दागेद्, आबेर तो सप्पार। 40 इक गोटे मलेकि कुकन्ते तलिद् उट्रकिद् मुन्ड्रपे मॆननो हों आह् सप्पाह्। 41 अन्ते मलेकि कपाड़ेन्ते तलिद् उट्रिद् तानि, आह् अद-मुन्ड्रपेह्, अन्ते आह् सप्पाह्। 42 जे मलेकि मुन्ड्रपेनो अन्ते अद-मुन्ड्रपेनो क़ेसलो-जिन्प्रो टडाद् बॆहिद् तानि, आद् तो अहिकि अद-मुन्ड्रपेद् अन्ते अद-मुन्ड्रपेनो चोयु मुगडोद्। 43 ऎड़वुह् अहिन टाकचकेह् टुन्डान्देह्; आ मलेकि मुन्ड्रपेनो बा अद-मुन्ड्रपेनो गन्डिकि नन क़ॆड-बड़िनो मॆनु मुगडो देने क़ेसलो-जिन्प्रो पूग़टोद् बॆहिद् तानि, 44 आह् मुगडोतावेह्, आह् गा सप्पाबलोह्; ऎड़वुह् अहिन सप्पाबलोह् आञ्य उस्रात्रान्देह्; अहिकि चॊटेद् अहिकि कुकनो बॆहिद्। 45 आ चॊटवारु मुगडोतावेह् ईसग़र्प लुगान अतु, अन्ते तंग्कि कुक-तलिन क़ास्रबलोह् मॆनान्देह् अन्ते तंग्कि मुद्राकि पिस्तिन उटकेह्, सप्पाबलोन! सप्पाबलोन! आञ्य चिरक़ान्देह्। 46 आ चॊटेद् अहिनो बॆहु पहरा अमट आह् सप्पाबलो आनुव्रान्देह्; आह् सप्पाबलो बरु; आह् बेड़यप तुन्ग़र्पेकि दुवारिनो हि से तंगमाने डॊकान्देह्।
मुगडो पन्तेकि ऎयनेद्
47 मुगडो चॊटेद् कम्रि बागु लुगानो बा मेरु लुगानो, 48 मेरु लुगात बा कम्रित मेन्जप बा तॆहपेनो, बा चमेनो बा चमेत मेन्जप इन्द्र-बॆडि आकेनो कितपोद् बॆहिद्, 49 अन्ते मेरु लुगात बा कम्रित मेन्जप बा तॆहपेनो, बा चमेनो बा चमेत मेन्जप इन्द्र-बॆडि आकेनो आ कितपोद् लुगानो क़ेन-क़ज्रोद् बा क़ेसलोद् एत्रिद् तानि, आद् मुगडो चॊट चोवेद्, अन्ते अदे ऎड़वुक एदोति बॆहिद्। 50 अन्ते ऎड़वुह् आ चॊटेन टाकचकेह् टुन्डान्देह्, अन्ते चॊटवारु आ आकेन सत दिनि अमट मुचकेह् बॆहत्रान्देह्; 51 अदि क़ॊक़, सतमा दिनेनो आह् अदे नन्दु टाकचकेह् टुन्डान्देह्। आ चॊटेद् लुगानो, मेन्जप बा तॆहपेनो, बा चमेनो बा चमेत मेन्जप इन्द्र-बॆडि आकेनो अटारकिद् बॆहिद् तानि, आद् आडु मुगडोद्; आद् सप्पाबलोद्। 52 आ चॊटेत चॊटवेत्रप कम्रित बा मेरु लुगात मेन्जप बा तॆहपेन, बा चमेनो बा चमेत मेन्जप इन्द्र-बॆडि आकेन चिचेत क़ोसत्रा; आद् गा आडु मुगडोद्; आद् चिचेत क़ोसुव्रान्देद्।
53 अन्ते आ चॊटेद् लुगानो, मेन्जप बा तॆहपेनो, बा चमेत मेन्जप इन्द्र-बॆडि आकेनो अटारकिद् बॆहिद् अदे ऎड़वुह् टाकचकेह् अन्डिह् तानि, 54 आह् आ चॊटवारु आकेन नॊड़ोति अवडकेह्, अदे नन्दु सत दिनि अमट मुचकेह् बॆहत्रान्देह्; 55 अन्ते चॊटवारु आ आकेद् नॊड़ अन्ते मुचके बॆहत्र क़ॊक़, ऎड़वुह् अदे नन्दु टाकचकेह् टुन्डान्देह्। आ चॊटेद् अगारोमलाद् तानि, अदिकि रंगेद् हों बदलारोमलाद् तानि गोटे, आद् सप्पाबलोद्; आ चॊटेद् आ आकेकि अगरते बजेनो बा क़ॊक़ते बजेनो बॆहनो हों आ आकेन चिचेत क़ोसत्रोति बॆहिद्। 56 जे ऎड़वुह् नन्दु अदे टाकचकेह् टुन्डनो, आ चॊटेद् नॊड़ क़ॊक़ क़ायपे मॆन्जेकिद् बॆहिद् आञ्य अन्डिह् तानि, आह् आ लुगा, बा चमे, बा मेन्जप बा तॆहपेन्ते आ चॊटवारु जगेन ईसकेह् ओत्रान्देह्। 57 अदि क़ॊक़ आ चॊटेद् नन्दु लुगानो, मेन्जप बा तॆहपेनो, बा चमेत मेन्जप इन्द्र-बॆडि आकेनो एत्रिद् तानि, आद् अटारु चॊटेद्; अनि चॊटवारु अदे अदिकि मालिकेह् क़ोसत्रान्देह्। 58 जे लुगाद्, मेन्जप बा तॆहपेद्, बा चमेत मेन्जप इन्द्र-बॆडि आकेद् नॊड़ क़ॊक़ आ चॊटेद् अदेन्ते उरक़िद् तानि, आह् अदे दूसरा केप नॊड़ान्देह्, अन्ते आद् सप्पा मॆनेनिद्। 59 कम्रित बा मेरु लुगात मेन्जप बा तॆहपेन, बा चमेनो बा चमेत मेन्जप इन्द्र-बॆडि आकेन क़ाजग़र सप्पाद् बा सप्पाबलोद् आञ्य क़ाजोति अदिकि चॊट पन्तेनो बॆहु नियमेद् ईदि से।