1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27
पाप लग्कि कीदपोद्
1 यॆहोवाद् मूसान अवडयाद्, 2 नीन इस्राएलेरिन ईञ्य अवडोका: इकेह् गोटे कुदोति बॆहोमलाद् आनकिद् उकम ननयाद् आव आवेकि इन्द्रद् गोटेन काना-बेलि कुदकेह् पापेन कुदिह् तानि, ईञ्य कुदोति बॆहिद्: 3 आसिक ननके टहरेत्रेप ऎड़वु* इकेह् गोटे मलेरिन पापेकि कसुरेक अड़सत्रिह् तानि, तान कुदयाह् आ पाप लग्केह् आह् मक़ोन्द टडाबलो बड़दे-मक़ोन चुम्बाड़ेये ऎड़व चोव यॆहोवाकि क़न-सरि ओन्द्रान्देह्। 4 आह् आ बड़दे-मक़ोन बॆटार नक़ेकि तम्बुकि कोरपोनो यॆहोवाकि क़न-सरि ओन्द्रकेह् आ जानवरेन अदि कुक मॆचे तंग्कि टॆटुन कीदकेह् यॆहोवाकि क़न-सरि अदे पिटान्देह्। 5 अन्ते आसिक ननके टहरेत्रेप ऎड़वुह् आ बड़दे-मक़ोकि क़ेसन्ते रेकोन्द ओचेकेह् अदे बॆटार नक़ेकि तम्बुक ओन्द्रान्देह्; 6 अन्ते ऎड़वुह् तंग्कि अंगलिन क़ेसनो डुंगत्रकेह् पाक-अडाकि परदा सोहजा यॆहोवाकि क़न-सरि सत केप चिटयान्देह्। 7 अदि क़ॊक़ ऎड़वुह् आ क़ेसन्ते रेकोन्द ओत्रकेह् बॆटार नक़ेकि तम्बुनो यॆहोवाकि क़न-सरि इलु महमहरो दुमेनि पिन्डाकि मरगु मॆचे लेपयान्देह्, अन्ते आ बड़दे-मक़ोकि ऎंगर्प क़ेसे सालमे बॆटार नक़ेकि तम्बुकि कोरपो अगदु ओकु क़ोसत्र ऎड़व-पिन्डा पिसि पुदयान्देह्। 8 अन्ते ई चुम्बाड़ेये ऎड़वपो बड़दे-मक़ोकि गोट नॆञ्येन, चव्रुन ऒंगु नॆञ्येन अन्ते चव्रुनो बॆहु नॆञ्ये गोटेदिन, 9 अन्ते एन्डिस तिन्दक़लुन, अदि मॆचे कड़म बहानो बॆहु नॆञ्येन, तिन्दक़लु संगाल बॆहु चॆद्रो मॆचे बॆहु कोन्डान हों, 10 संगालि-ऎड़वपोकि बड़देन्ते आव आवेन ओत्रनेर आ चोव ई बड़देन्ते ओत्रकेह् आव आवेन क़ोसत्र ऎड़व-पिन्डानो क़ोसत्रान्देह्। 11 जे बड़देकि चमेन अन्ते अदिकि गोट माके अदिकि कुक, अदिकि क़ॆड, अदिकि चव्रु अन्ते अदिकि गोबेरि मादि, 12 आह् आ गोट बड़देन बेड़यप तुन्ग़र्पेकि दुवारिक ओड़मेन ऎक़ु सपा जगेक ओचेके ओड़मेन ऎक़प कन्क गहन्डिनो बिच्रके क़ोसत्रान्देह्; ओड़मे ऎक़प जगेनो हि से अदे क़ोसत्रान्देह्।
13 इस्राएल मलेर गोटेरि* काना-बेलि पापेन कुदकेर यॆहोवाद् कुदोति बॆहोमलाद् आनकिद् उकम ननयाद् आव आवेकि इन्द्रद् गोटेन कुदनेर तानि, बेवाद् आ सबान आग़ाबलो डॊकनो गोटे, आबेर कसुरतावेर। 14 आबेरकि कुदप पापेद् आग़ुव्रिद् अदेनो, इस्राएलेर* आ पाप लग्केर मक़ोन्द बड़दे-मक़ोन बॆटार-नक़ेकि तम्बु अगदु चुम्बाड़ ऎड़वपो चोव कीदोति ओन्द्रान्देर। 15 अन्ते कलीसियाकि बॆडवोर तमकि टॆटुन यॆहोवाकि क़न-सरि आ बड़देकि कुक मॆचे कीदान्देर, अदि क़ॊक़ आ बड़देद् यॆहोवाकि क़न-सरि पिटुव्रान्देद्। 16 अनि आसिक ननके टहरेत्रेप ऎड़वुह् आ बड़देकि क़ेसेन्ते रेकोन्द ओत्रकेह् बॆटार नक़ेकि तम्बुक ओन्द्रान्देह्, 17 अन्ते ऎड़वुह् तंग्कि अंगलिन क़ेसनो डुंगत्रकेह् परदा सोहजा यॆहोवाकि क़न-सरि सत केप चिटयान्देह्। 18 अन्ते ऎड़वुह् आ क़ेसन्ते रेकोन्द ओत्रकेह् बॆटार नक़ेकि तम्बुनो यॆहोवाकि क़न-सरि इलु ऎड़व-पिन्डाकि मरगु मॆचे लेपयान्देह्, अन्ते आ बड़दे-मक़ोकि ऎंगर्प क़ेसे सालमे बॆटार नक़ेकि तम्बुकि कोरपो अगदु ओकु क़ोसत्र ऎड़व-पिन्डा पिसि पुदयान्देह्। 19 अन्ते अदिकि नॆञ्ये गोटेदिन अदेन्ते ओत्रकेह् ऎड़व-पिन्डा मॆचे क़ोसत्रान्देह्। 20 आह् चुम्बाड़ ऎड़वेकि बड़देन कुदयाह् आ चोवहि ई बड़देन हों कुदान्देह्, इन्देकेह् ऎड़वुह् आबेरि लग्केह् पापेन आडोति कुदपोन कुदान्देह्; अनि आबेर माप ननुव्रेर। 21 अदि क़ॊक़ आह् ई बड़देकि ऎंगर्पेन बेड़यप तुन्ग़र्पेकि दुवारिक ओचेकेह्, तंग पाप लग्केह् कीदप बड़देन क़ोसत्रयाह् आ चोवहि इदे हों क़ोसत्रान्देह्। ईद् गा गोट मलेरि लग्कि कीदप चुम्बाड़ ऎड़वेद्।
22 आकिमेह् काना-बेलि पापेन कुदिह्, यॆहोवाद् कुदोति बॆहोमलाद् आनकिद् उकम ननयाद् आव आवेकि इन्द्रद् गोटेन कुदकेह् कसुरताव मॆननो, 23 तान कुदयाह् आ पापेद् तंगे आग़ुव्रिद् अदेनो, आह् मक़ोन्द टडाबलो एड़े तंग्कि कीदपो चोव ओन्द्रान्देह्; 24 अन्ते आह् आ एड़ेकि कुक मॆचे तंग्कि टॆटुन कीदकेह्, यॆहोवाकि क़न-सरि क़ोसत्र ऎड़वपोद् पिटुव्रिद् आ जगेनो अदे पिटान्देह्; ईद् गा चुम्बाड़ ऎड़वेद्। 25 अदि क़ॊक़ ऎड़वुह् आ चुम्बाड़ ऎड़वेकि क़ेसन्ते रेकोन्द तंग्कि अंगलित ओत्रकेह् क़ोसत्र ऎड़व-पिन्डाकि मरगु मॆचे लेपयान्देह्, अन्ते आ एड़ेकि ऎंगर्प क़ेसे क़ोसत्र ऎड़व-पिन्डा पिसि पुदयान्देह्। 26 अन्ते अदिकि नॆञ्ये गोटेदिन संगालि ऎड़वेकि नॆञ्ये चोव ऎड़व-पिन्डा मॆचे क़ोसत्रान्देह्; इन्देकेह् ऎड़वुह् तंग लग्केह् तान कुदयाह् आ पापेन आडोति कुदपोन कुदान्देह्; अनि आह् माप ननुव्रेह्।
27 मलेरिनो इकेह् गोटे काना-बेलि पापेन कुदिह्, यॆहोवाद् कुदोति बॆहोमलाद् आनकिद् उकम ननयाद् आव आवेकि इन्द्रद् गोटेन कुदकेह् कसुरताव मॆननो, 28 तान कुदयाह् आ पापेद् तंगे आग़ुव्रिद् अदेनो, आह् तान कुदयाह् आ तंग्कि पाप लग्केह् मक़ोन्द टडाबलो डडि एड़े तंग्कि कीदपो चोव ओन्द्रान्देह्; 29 अन्ते आह् आ चुम्बाड़ ऎड़वपोकि कुक मॆचे तंग्कि टॆटुन कीदकेह्, क़ोसत्र ऎड़वपोद् पिटुव्रिद् आ जगेनो आ चुम्बाड़ ऎड़वपोन पिटान्देह्। 30 अदि क़ॊक़ ऎड़वुह् आ चुम्बाड़ ऎड़वेकि क़ेसन्ते रेकोन्द तंग्कि अंगलित ओत्रकेह् क़ोसत्र ऎड़व-पिन्डाकि मरगु मॆचे लेपयान्देह्, अन्ते आ एड़ेकि ऎंगर्प क़ेसे ऎड़व-पिन्डा पिसि पुदयान्देह्। 31 अन्ते अदिकि नॆञ्ये गोटेदिन संगालि ऎड़वपोन्ते नॆञ्येन ओत्रनेर आ चोव ओत्रकेह्, ऎड़वुह् ऎड़व-पिन्डा मॆचे यॆहोवाक अपोकत्रु चॆञ्ये चोव क़ोसत्रान्देह्; अन्ते ऎड़वुह् अहि लग्केह् पापेन आडोति कुदपोन कुदान्देह्; अनि आ मलेह् माप ननुव्रेह्। 32 आह् चुम्बाड़ ऎड़वपो लग्केह् मक़ोन्द बेडि-मक़ोन ओन्द्रिह् तानि, आह् मक़ोन्द टडाबलो डडि बेडि-मक़ोन ओन्द्रान्देह्; 33 अन्ते आह् आ चुम्बाड़ ऎड़वपोकि कुक मॆचे तंग्कि टॆटुन कीदकेह्, क़ोसत्र ऎड़वपोद् पिटुव्रिद् आ जगेनो अदे चुम्बाड़ ऎड़वपो चोव पिटान्देह्। 34 अदि क़ॊक़ ऎड़वुह् आ चुम्बाड़ ऎड़वेकि क़ेसन्ते रेकोन्द तंग्कि अंगलित ओत्रकेह् क़ोसत्र ऎड़व-पिन्डाकि मरगु मॆचे लेपयान्देह्, अन्ते आ बेडिकि ऎंगर्प क़ेसे ऎड़व-पिन्डा पिसि पुदयान्देह्। 35 अन्ते आ बेडिकि नॆञ्ये गोटेदिन संगालि ऎड़वपो बेडिन्ते नॆञ्येन ओत्रनेर आ चोव ओत्रकेह्, यॆहोवाक कीदप क़ोसत्र ऎड़वपो चोव, ऎड़वुह् ऎड़व-पिन्डा मॆचे क़ोसत्रान्देह्; इन्देकेह् आ मलेह् कुदयाह् आ पाप लग्केह् ऎड़वुह् पापेन आडोति कुदपोन कुदान्देह्; अनि आ मलेह् माप ननुव्रेह्।