1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27
दनाकि कीदपोद्
1 इकेह् गोटे दनाकि चियपेन यॆहोवाक चियोति ओन्द्रिह् अदेनो, अहिकि कीदपेद् कटप एड़ु आटाद् मॆनान्देद्, आह् अदि मॆचे इसग़ने पुदचकेह् अदिनो दुमेनिन बिच्रान्देह्; 2 अन्ते अदे आह् आरोनेकि तंग़ाद ऎड़वुरि बहाक ओन्द्रान्देह्। अन्ते ऎड़वुह् अदेन्ते मुटोन्द आटान अन्ते इसग़ने अदिकि गोट दुमेनि मादि ओचेकेह् अदे ऎड़व-पिन्डा मॆचे उगलार्पो चोव क़ोसत्रान्देह्; आद् गा यॆहोवाक अपोकेत्रु चॆञ्येद् अन्ते चिचेत कीदु ऎड़वेद्। 3 आ दनाकि कीदपोनो ऎंगर्पेद् आरोन अन्ते अहि तंग़ादेरि लग्कि मॆनान्देद्; ईद् गा यॆहोवाक चिचेत कीदु कीदपोकि कटप पाक साजिद्।
4 नीन अतुनो बितप दानेकि कीदपोन कीदपोद् आनकेह् ओन्द्रनो, आद् इसग़नेत सानयप कटप एड़ु आटात मॆक़प गादबलो केकेद्, बा इसग़नेत अगात्रप गादबलो पपड़ि मॆनान्देद्। 5 निंग्कि कीदपोद् चिपटो करायिनो मॆक़प दनाकि कीदपोद् तानि, आद् जलपाय इसग़नेत सानयप कटप एड़ु आटात मॆक़प गादबलो मॆनान्देद्। 6 अन्ते अदे नीन टुकड़ेयकु, अन्ते अदेनो इसग़ने पुदयकु; आद् दानेकि कीदपोद्। 7 निंग्कि कीदपोद् करायिनो बितप दानेकि कीदपोद् तानि, आद् जलपाय इसग़नेत सानयप कटप एड़ु आटात बितुव्रान्देद्। 8 अन्ते नीन इन्देके बनात्रप दानेकि कीदपोन हि से यॆहोवाक ओन्द्रकु; अन्ते आद् ऎड़वु बहाक ओन्द्रनो आह् अदे ऎड़व-पिन्डाक ओन्द्रान्देह्, 9 अन्ते आ दनाकि कीदपोन्ते ऎड़वुह् उगलार्पो चोव ओचेकेह् ऎड़व-पिन्डा मॆचे क़ोसत्रान्देह्; ईद् यॆहोवाक अपोकेत्रु चॆञ्येद् अन्ते चिचेत कीदु ऎड़वेद्। 10 ई दनाकि कीदपोनो ऎंगर्पेद् आरोन अन्ते अहि तंग़ादेरि लग्कि मॆनान्देद्; ईद् गा यॆहोवाक चिचेत कीदु कीदपोकि कटप पाक साजिद्। 11 नीम यॆहोवाक ओन्द्रनेर आ इकुद् कीदपो गोटेद् गादेत बनारुव्रोमान्देद्; नीम गादतानि बा तेनितानि इन्द्रे गोटेदिन यॆहोवाक क़ोसत्र कीदपो आनकेर क़ोसत्रोमान्दोन! 12 कुको क़न्जपेन कीदपो चोव ओन्द्रके यॆहोवाक अदे चियोति पारयलेर, जे अदे ऎड़व-पिन्डा मॆचे अपोकेत्रु चॆञ्येद् आनकेर क़ोसत्रोमकु। 13 नीन कीदने आ दनाकि गोट कीदपोद् बेकुत ऎम्ब ननकु; निंग्कि गोसाञ्यिकि सबा-कुमेकि बेके* निंग्कि दनाकि कीदपोनो अम्बोमकु, निंग्कि गोट कीदपोनो बेके हों कीदकु। 14 कुको क़न्जपेन दनाकि कीदपो चोव नीन यॆहोवाक कीदने तानि, नीन टटका दनाकि कसत्रप टोन्डान चिचेत ऎड़चके कीदकु। 15 अन्ते अदि मॆचे इसग़ने पुदचके अदिनो दुमेनिन कीदकु; ईद् दनाकि कीदपोद्। 16 अदि क़ॊक़ ऎड़वुह् कसत्रप दनान, अन्ते इसग़नुकि उगलार्पो बक्रान अदिकि गोट दुमेनि मादि क़ोसत्रान्देह्; ईद् गा यॆहोवाक कीदु क़ोसत्रे ऎड़वेद्।
*२:१३ बेकुद् गोसाञ्यि अन्ते इस्राएलेरि मजि बॆहु सबा-कुमे नक़पे गुनि जोकारिद्