1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27, 28, 29, 30, 31, 32, 33, 34, 35, 36, 37, 38, 39, 40, 41, 42, 43, 44, 45, 46, 47, 48, 49, 50.
याक़ूबे अन्ते एसावे बॆटार नक़नेर
1 याक़ूबे तंग क़ने पॆतेकेह् टुन्डनो एसावे अन्ते अहिकि चार सव मलेर बरनेर अदे टुन्डयाह्। अनि आह् लियाक, राकेलेक अन्ते इव्र कमक्रनिरिक तंग़ादेरिन जुद-जुदा क़ाड़केह् चिचाह्। 2 अन्ते कमक्रनिरिन अन्ते आबेरकि तंग़ादेरिन अगदु, लियान अन्ते अदिकि तंग़ादेरिन मजि, अन्ते राकेलेन अन्ते यूसपेन गोटेरकि क़ॊक़नो डोकत्रयाह्। 3 आह् तानहि आबेरि अगदु मॆन्जेकेह् तंग बयान अड़सोति नननेह् सत केप क़ेक़लनो मुरग़रयाह्। 4 जे एसावे अहिन बिरग़रोति बोंग़ एकयाह्, अहिन बंगड़ेत्रयाह्, अन्ते अहि क़स्रुनो असग़रकेह् अहिन चुमक़ाह्, अन्ते आबेर इव्रेरि ओलग़यार। 5 अन्ते एसावे क़ने पॆतेकेह् पेलेरिन अन्ते मक़ेरिन टुन्डयाह् अदेनो आह् याक़ूबेन मॆन्जाह्, निंग संगाल डॊकु ईबेर नेरेर? याक़ूबे अवडेकिरत्रयाह्, मक़ेर गोसाञ्यिद् चॆंग़जकिद् निंग कमक्र ऎंगे क़टयाद्। 6 अनि कमक्रनिर अंगेमंगे मक़ेरिन क़ेन्दकेर एसाव बहाक तुक्रयार अन्ते मुरग़रकेर सलाम मॆन्जार। 7 अदि क़ॊक़ लिया आ चोवहि तंग़ादेरिन क़ेन्दकिद् एसाव बहाक तुक्रयार अन्ते मुरग़रकेर सलाम मॆन्जार; अन्ते क़ॊक़ यूसपे अन्ते राकेले तुक्रयार अन्ते मुरग़रकेर सलाम मॆन्जार। 8 अन्ते एसावे मॆन्जाह्, एन पावनो जिमकेन आव आव गहन्डिद् इन्द्रद्? याक़ूबे अवडकिरत्रयाह्, आव आवेद् ऎंग साहबे निंग क़ननो दॆयान क़क़लेन अदि लग्किद्। 9 जे एसावे अवडयाह्, ओ नुना, ऎंग बहानो गड़हि बॆहिद्, निंग्किन निंग लग्के हि बॆहत्रा। 10 आनको याक़ूबे अवडयाह्, अन्देके मला, निंग क़ननो एन दॆयान क़क़पेन तानि, ईव ईव बक्सीसेन ऎंग्कि टॆटुन्ते ईन्ज्रा आञ्य केवेजारिन; नीन ऎंगेन दॆयात ईन्ज्रके अन्ते निंग्कि मुद्रान टुन्डेद् गा गोसाञ्यिकि मुद्रान टुन्ड चोवेद्। 11 गोसाञ्यिद् ऎंगेन चॆंग़जले गड़चाद्; अन्ते ऎंगे जक्रोद् गोटेदि ऎंगे बॆहिद्, आ लग्के निंगे ओन्दरुव्रयाद् ऎंग्कि चियपोन ईन्ज्रोति केवेजारिन। अनि आह् एसावेन लेत-लगारयाह् अन्ते आह् अदे ईन्ज्रयाह्। 12 अनि एसावे अवडयाह्, लॆगा नाम चोचेकेत एकेत, अन्ते एन निंग अगद अगदु एकेन। 13 जे याक़ूबे अहिन अवडेकिरत्रयाह्, मक़ेर क़ॊरोर, अन्ते दूदेन ओन्दु मक़ोतानि बेडि-एड़े अन्ते ऒयुद् ऎंगे जोगयोति बॆहिद् अदे ऎंग साहबे नीन आग़ने। अन्ते अदे सग्र दिने चरात्र ओयेनो गोट गहन्डिद् कॆच ओंग्रेनिद्। 14 ऎंग साहबेह् तंग कमक्र ऎंगेन्ते अगदु चोचेकेह् एकान्देह्, अन्ते एन गहन्डिद् एकोति अन्ते मक़ेर सहयोति पारयेर आ चोव तियाति एकेन अन्ते सयिरेक ऎंग साहबे निंग बहाक अड़सेन। 15 अनि एसावे अवडयाह्, तॆबे ऎंग संगाल बरुरिन्ते अदेसि मलेरिन एन निंग संगाल ओजेन आन्? जे याक़ूबे अवडेकिरत्रयाह्, काज मलाद्, एन ऎंग साहब क़ननो दॆयान क़क़लेन आदि गाड़ेद्। 16 अनि एसावे आ दिनेहि चोचेकेह् सयिरेक किरयाह्। 17 जे याक़ूबे सुक्कोत बजे एकयाह् अन्ते तंग लग्केह् पाड़ोन्द अडान मॆन्जाह् अन्ते तंग बेडि-ऒयु गहन्डि लग्केह् तम्बु गहन्डिन इलदयाह्; आ लग्केह् आ जगेकि नामिद् सुक्कोत आनुव्रिद्।
याक़ूबे सॆकेमेक अड़सिह् 18 याक़ूबे पदान अरामेन्ते उरक़ क़ॊक़ आह् कानान देसिकि सालेम नामि सॆकेम सहरेक एड़ुक़नि अड़सयाह्, अन्ते सहर गोदानो तम्बुन इलदयाह्। 19 अन्ते आह् तान तम्बुन इलद ओजयाह् आ क़ेक़ले सॆकेमेकि तम्बाको हमोर तंग़ादेरि बहान्ते सवोन्द रुपा-टकात क़ेग़ाह्। 20 आटिनो आह् पाड़ोन्द पिन्डान मेन्जयाह्, अन्ते अदे एल-एलोहे इस्राएल* पिन्जयाह्।
*३३:२० मतलबेद्: गोसाञ्यिद्, इस्राएलेकि गोसाञ्यिद्, इस्राएलेकि गोसाञ्यिद् बड़येद्।