1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27, 28, 29, 30, 31, 32, 33, 34, 35, 36, 37, 38, 39, 40, 41, 42, 43, 44, 45, 46, 47, 48, 49, 50.
याक़ूबे एसावेन जिमोति ओरयारिह्
1 याक़ूबे तंग्कि पावे एकयाह्, अन्ते गोसाञ्यिकि पिरिस्तार अहि गुनि जिम्र नक़ार। 2 अन्ते याक़ूबे आबेरिन टुन्डयाह् अदेनो ईबेर गोसाञ्यिकि बेड़यप तुन्ग़र्पे आनकेह् आ जगेकि नामिन महानयिम* ओजयाह्। 3 याक़ूबे तंग अगदु सेयीर नामि एदोम देसिक तंगबया एसाव बहाक चाक्रियारिन तॆयाह्। 4 आह् आबेरिन ईञ्य उकम ननकेह् तॆयाह्: नीम ऎंग साहबे एसावेन ईञ्य अवडकु: निंग कमक्र याक़ूबे इन्देकेह् अवडिह्, एन लाबान बहानो टिकारकेन इनोर अमट अनोहि डोक्केन, 5 अन्ते ऎंग बहानो ऒयुद्, गदाद्, बेडिद्, मुड़स कमक्रेर, अन्ते कमक्रनिर डॊकनेर; अन्ते एन अनेके एन निंग क़ननो दॆयान क़क़लेन अदिक, एन ईबेरिन ऎंग साहबे निंगेन तॆंग़ोति तॆयेकेन। 6 चाक्रियार आबेर याक़ूब बहाक किरकेर बरचकेर अवडयार, एम निंग बया एसाव बहाक एक्केम बरचकेम; आहों चार सव मलेरिन क़ेन्दकेह् निंग गुनि जिम्र नक़ोति बरिह्। 7 अनि याक़ूबे गाड़ेहि ऎलचयाह्, अन्ते काकलारयाह्। अन्ते आह् तंग संगाल डॊकु मलेरिन, सावजे, ऒये अन्ते उटेन ईञ्य उगलेचकेह् गहन्डिस ननयाह्, 8 एसावे अड़सकेह् गहन्डियोन्देन पिटिह् तानि, बाचार्प नन गहन्डिद् बोंग़ोति पारयलिद्।
9 अन्ते याक़ूबे सुम्ब्रारयाह्, ओ ऎंग बॆडवो अब्रहामेकि गोसाञ्यि अन्ते ऎंग अब्बाकि गोसाञ्यि, नीन निंग देसिक अन्ते निंग बयाड़ेरि बहाक किरोका, अन्ते एन निंगेन एड़ुन कुदेन आनु ओ यॆहोवा, 10 एन तो निंग कमक्र ऎंगेन नीन एदकि आ गोट चोव ऒंग्राबलो मड़ मॆनेन अन्ते गोट चोव उगजोन क़क़्क़ेन अदि जोकेर मलेकेन, एन गा पिने हि से क़ेन्दकेन यरदान नदि पारेक कटकेन; जे अनेके एन गहन्डिस लॆहारकेन। 11 नीन ऎंगेन ऎंग बया एसावेकि टॆटुन्ते बाचात्रा आनले एन केवेजारिन, एन गा आह् बरचकेह् ऎंगेन, मक़ेरिन अन्ते तॆहोरिन हों गोटेरिन पिटलेह् आञ्य अहिन ऎलचिन। 12 जे नीनि से ईञ्य अवडकि, एन निंगेन जरुरहि एड़ुन कुदेन अन्ते निंग्कि नति-जालिरिन लॆकयुव्रोति पोलग़रनेर, अनोन्द समुद्रे बागु बालेकि दुड़ि चोव अदानिबलो गड़हि पोंगजत्रेन।
13 अनि याक़ूबे आ माक़े अनोहि डोकयाह्, अन्ते आह् तंग बहानो बॆच्चाद् आव आवेन्ते तंग बयाक बक्सीसेन चियोति ओत्रयाह्, 14 सविस डडि बेडिन अन्ते कॊड़योन्द बोकड़ा बेडिन, सविस डडि बेडि-मक़ोन अन्ते कॊड़योन्द मरगो बेडिन, 15 दूदेन चियु डेड कॊड़ि उटेन अन्ते आव आवेकि मक़ोन, कॊड़यिस ऒये अन्ते दस बड़देन, अन्ते कॊड़योन्द डडि गदान अन्ते दस बोकड़ा गदान क़ाड़याह्। 16 अन्ते आह् ईव ईवेन तंग्कि कमक्रेरिक गहन्डियोन्देन जुद-जुदा सोपचकेह् ईञ्य अवडयाह्, नीम ऎंगेन्ते अगदु पारेक कटा, अन्ते गहन्डिन एक एकला ओजकु। 17 अन्ते आह् अगरते एकुन उकम ननयाह्, ऎंग बया एसावे निंग गुनि जिम्र नक़िह् अन्ते नीन इकेकि बत्ते? अन्ते नीन इकानो एकने? निंग अगदु एकु गहन्डिद् नेकिद् आननो, 18 नीन अहिन इन्देके अवडेकिरत्रकु, ईव ईवेद् निंग कमक्र याक़ूब बत्तेद्, ईव ईवेद् ऎंग साहबे एसावेक तॆयुव्रप बक्सीसेद्, अन्ते टुन्डा, तान हों ऎम क़ॊक़ बरिह्। 19 अन्ते याक़ूबे अन्देकेहि दूसरा अन्ते तीसरा कमक्रेन अन्ते गहन्डि क़ॊक़ एकु गोटेरिन हों उकम ननयाह्, नीम हों एसाव गुनि बॆटार नक़नो इन्देकेरि अहिन अवडकु; 20 अन्ते नीम अवडकु, अन्ते निंग कमक्र याक़ूबे हों ऎम क़ॊक़ बरिह्। याक़ूबे गा तंग उगलिनो उगलेचाह्, एन गा ऎंग अगदु तॆयिन आव आव चियपो आकेत अहिकि रॊकेन एग़त्रलेन, अन्देन्ते क़ॊक़ अहिकि मुद्रान एरेन; इन्द्राग़ि आह् ऎंगेन बिरग़रेह् अको! 21 ईनको आ चियपो गहन्डिद् अहिन्ते अगदु पारेक कटयाद्, जे तान बेड़यप तुन्ग़र्पेनो डोकयाह्।
याक़ूबे गोसाञ्यि गुनि बॆक़े नक़िह्
22 अन्ते याक़ूबे आ माक़ेहि चोचाह्, अन्ते इव्र तंगे डानिरिन, इव्र कमक्रनिरिन, अन्ते ऎगाराजॆन मक़ेरिन ओचेकेह् यब्बोक नामि गटेनो पारेक कटत्रयाह्। 23 अन्ते आह् आबेरिन कटत्र क़ॊक़ तंग बहानो बॆच्चाद् गोटेदिन नदि पारेक कटत्रयाह्। 24 अनि याक़ूबे तंगमाने ई पारेनो डोकयाह्; अन्ते अनो ओर्त मलेह् पालग़रयाद् अनोन्द अमट अहि गुनि बॆक़े नक़ाह्। 25 आ मलेह् याक़ूबेन टिडोति पोलाह् अदे टुन्डकेह् अहिकि क़ोसग़ेकि जॊड़र नक़प जगेन कपयाह्, अनि याक़ूबेकि क़ोसग़ नरुद् बॆक़े नक़ेनो चड़कारयाद्। 26 अनि आ मलेह् अवडयाह्, पालग़र एकिद्, ऎंगेन तॆया। जे याक़ूबे अवडेकिरत्रयाह्, नीन ऎंगेन आसिक ननोमलेके अनोन्द अमट एन निंगेन तॆयेन मला। 27 आनको आ मलेह् अहिन मॆन्जाह्, निंग नामिद् इन्द्रद्? आह् अवडेकिरत्रयाह्, याक़ूबे। 28 अनि आ मलेह् अवडयाह्, निंग नामिद् इनतेन्ते याक़ूब अदो मला, जे इस्राएल* मॆनेनिद्, नीन गा गोसाञ्यि अन्ते मल गुनि हों बॆक़े नक़्क़े पारचके। 29 आनको याक़ूबे अहिन अवडयाह्, एन निंगेन केवेजारकेन मॆनिन, निंग नामिद् इन्द्रद्? तॆंग़ा। जे आह् अवडेकिरत्रयाह्, नीन ऎंग नामिन इन्द्रिक मॆनने? अन्ते आह् अहिन आटिनो आसिक ननयाह्। 30 अनि याक़ूबे एन तो गोसाञ्यिन मुद्रा मुद्रि टुन्डकेन, अन्ते गोटे एन बाचारकेन आनकेह् आ जगेकि नामिन पॆनिएल* ओजयाह्। 31 अन्ते आह् पॆनीएलेन कटु मॆन्जाह् अदेनो बेरुद् अरगयाद्। अन्ते आह् क़ोसग़ चड़कारेत सोटले चरचाह्। 32 आ लग्केरि से इनोरि अमट इस्राएलेर क़ोसग़ेकि जॊड़र नक़प जगेन मॊक़ोमलार, इकनिकि याक़ूबेकि क़ोसग़ेकि जॊड़र नक़प जगेनि से आह् कपयाह्।
*३२:२ मतलबेद्: दू बेड़यप तुन्ग़र्पेद्