1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27, 28, 29, 30, 31, 32, 33, 34, 35, 36, 37, 38, 39, 40, 41, 42, 43, 44, 45, 46, 47, 48, 49, 50.
1 इसहाके याक़ूबेन बीक्केह् अहिक बिदा ननेकि आसिकेन चिचाह्, अन्ते अहिन पतत्रकेह् अवडयाह्, नीन कानानि पेल मक़ेरिन्ते बॆदोमकु।
2 तुरत चोचेके पदान अरामेक, निंग बॆडवो बेतुएल अडाक काला, अन्ते अनो निंग मोमा लाबान तंग़ादेरिन्ते बॆदकु।
3 गोट बड़तानि गोसाञ्यिद् निंगेन आसिक ननान्देद्, अन्ते निंगेन पुदत्रकिद् क़न्जत्रान्देद् अन्ते निंगेन मल-तोका मॆन अमट पलवात्रान्देद्!
4 अन्ते गोसाञ्यिद् अब्रहामेकि आसिकेन निंगे अन्ते निंग संगाल निंग्कि नति-जालिरिक चियान्देद्, अन्दे से गोसाञ्यिद् अब्रहामेक चिचाद् आ क़ेक़ले, आद् गा नीन परिदेसि मॆन्जेके डॊकने, नीन निंग ननले!
5 आनकेह् इसहाके याक़ूबेन बिदा ननयाह्। अनि याक़ूबे पदान अरामेक एकयाह्, अरामि-आव बेतुएलेकि तंग़ादे, अन्ते तंग्कि अन्ते तंगबया एसावेकि तॆहो रॆबेकाकि उन्डग़ले लाबाने डॊकु मॆन्जाह्।
एसावे इस्माएलेकि तंग़ादिन बॆदिह्
6 इसहाके याक़ूबेन आसिक ननकेह् पेलिन बॆदोति अहिन पदान अरामेक तॆयाह् अदे, अहिन आसिक नननो, नीन कानानि पेल मक़ेरिन्ते बॆदोमकु आञ्य पतत्रकेह् अवडयाह् अदे,
7 अन्ते याक़ूबे तम्बाकोकि अन्ते तॆहोकि सबान मानचकेह् पदान अरामेक उरक़्क़ेह् एकयाह् अदे हों एसावे मॆन्जाह्।
8 अन्ते कानानि पेल मक़ेर तम्बाको इसहाकेक गिनार्पेर अदे बुजचाह्;
9 अनि एसावे इस्माएल बहाक एकयाह्, अन्ते तंगे अगरते डानि बगतेरिन अम्बकेह् अदो अब्रहामेकि तंग़ाद इस्माएलेकि तंग़ादि अन्ते नॆबायोतेकि तंगडोद् महलातेन हों बॆदयाह्।
बॆतेलेनो याक़ूबेकि तुमगलेद्
10 अन्ते याक़ूबे बॆर्सेबान्ते उरक़्क़ेह् हरान देसि बजे एकयाह्।
11 अन्ते आह् पावनो बेरुद् ऎतको जगोन्देनो ओकेतयाह् अन्ते अनो कॊडे बिजयाह्। अन्ते आह् आटिनो पाड़ोन्द चाचेन पॆतेकेह् तंग कुके आड़ेतयाह्, अन्ते इन्देकेह् कोडेतकेह् क़न्द्रयाह्।
12 अन्ते आह् क़न्द्रनेह् बहोन्द तुमगलेन टुन्डयाह्। आ तुमगलेद् ईद्: डड़ोन्द सिड़िद् क़ेक़लनो इलिद्, अन्ते अदिकि क़ॊरुद् मॆरग़ेन कपिद्; अन्ते गोसाञ्यिकि पिरिस्तार अदेनो ऎतनेर अरगनेर।
13 अन्ते अदि क़ॊरनो* यॆहोवाद् इजेकिद् अवडिद्, एन यॆहोवा निंग बॆडवो अब्रहामेकि गोसाञ्यिन, अन्ते इसहाकेकि गोसाञ्यिन, नीन कॊडने आ क़ेक़ले एन निंगे अन्ते निंग्कि नति-जालिक चियेन।
14 अन्ते निंग्कि नति-जालिर गा क़ेक़लकि दुड़ि चोव अदानिबलो मॆनेर, अन्ते बेर-अरगो, बेर-उट्रो, गंगा-मोहा, पर्त मोहा ताड़ग़रेने, अन्ते क़ेक़लकि गोट पलका मलेर निंग पावे अन्ते निंग नति-जालि पावे आसिकेन क़क़ेर।
15 टुन्डा, एन निंग संगाल डॊकिन, नीन इनो अनो एकेने आ गोट जगेनो एन निंगेन क़ापेन, अन्ते ई क़ेक़लिक निंगेन नन्दु ओन्द्रेन, एन गा चियोति कबुलारकेन आव आवेन निंगे कुदोमलेकेन अनोन्द अमट एन निंगेन अम्बेन मला।
16 अनि याक़ूबे चोड़ंगकेह् ऎज्रयाह् अन्ते अवडयाह्, उगजिहि यॆहोवाद् ईटिनो डॊकिद्, अन्ते एन इदे आग़लेकेन।
17 अन्ते आह् ऎलचकेह् अवडयाह्, ईद् इक चोवहि ऎलच-कॊरो जगेद्! ईद् अदो इन्द्रद् गोटे मला, जे गोसाञ्यिकि अडाद् अन्ते मॆरग़ दुवारिद्।
18 अन्ते याक़ूबे माक़ोन्दि चोचेकेह् कुके आड़ेतयाह् आ चाचेन कुमो चोव इलदयाह्, अन्ते अदेनो इसग़ने पुदचाह्।
19 अन्ते आ जगेकि नामिन बॆतेल* पिन्जयाह्, जे इदेन्ते अगदु आ क़ॆपकि नामिद् लूज़ मॆन्जाद्।
20 अन्ते याक़ूबे अंगरारकेह् अवडयाह्, गोसाञ्यिद् ऎंग संगाल डॊकिद् अन्ते एन एकिन आ पावनो ऎंगेन सगा ओयिद्, अन्ते ऎंगे लपोति लपेन, चुयोति लुगान अटयत्रिद् तानि,
21 अन्ते एन एड़ुक़नि ऎंग अब्बा अडाक नन्दु अड़सिन तानि, यॆहोवाद् ऎंग्कि गोसाञ्यि मॆनेनिद्,
22 अन्ते एन कुमो चोव इलदकेन ई चाचेद् गोसाञ्यिकि अडा मॆनेनिद्, अन्ते नीन ऎंगे क़टेनि आव आव गोट आकेन्ते एन निंगे दसमा बक्रान चियेन।