1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27, 28, 29, 30, 31, 32, 33, 34, 35, 36, 37, 38, 39, 40, 41, 42, 43, 44, 45, 46, 47, 48, 49, 50.
इसहाके याक़ूबेन आसिक ननिह्
1 डॊकनो डॊकनो इसहाके उरेतारे पचयाह्, अन्ते अहिकि क़नुद् दलया लॆहारको आह् टुन्डोति पोलाह् अदेनो, आह् तंग्कि मेग़रो तंग़ाद एसावेन बीक्केह्, ओ ऎंग़ादे, आनयाह्। आनको आह् अवडेकिरत्रयाह्, इदि एन ओकिन।
2 आनको इसहाके अवडयाह्, टुन्डा, एन इनोर पचकेन, अन्ते एन ऎंग्कि कॆय दिनेन आग़ोमलेकेन।
3 अनेके नीन निंग्कि अतेरेन चरे अन्ते ऎड़ते पॆतेके क़व्रिक काला अन्ते ऎंग लग्के सावजेन पिटके ओन्द्रोका।
4 अन्ते अदे ऎंग्कि मड़ चोव टट-एर लायक एड़ु बितके ऎंग बहाक लपोति ओन्द्रकु, अन्दे से एन ऎंग्कि कॆयेन्ते अगदु निंगेन आसिक ननलेन।
5 ई सबान इसहाके तंग़ाद एसाव गुनि पॆड़क़े नक़्क़ाह् आ गरि रॆबेका मॆन्ज मॆन्ज इजाद्। अनि एसावे सावजेन पिटकेह् ओन्द्रोति क़व्रिक उरक़्क़ेह् एकयाह् अदेनो,
6 रॆबेका तंग़ाद याक़ूबेन अवडयाद्, निंग अब्बोह् निंग बया एसावेन,
7 काला, ऎंग लग्के सावजेन पिटके ओन्द्रोवा, अन्ते अदे टट-एर लायक एड़ु बितेके ऎंग बहाक लपोति ओन्द्रकु, अन्दे से एन ऎंग्कि कॆयेन्ते अगदु यॆहोवा क़न-सरि निंगेन आसिक ननलेन आनयाह् अदे एन मॆन्जेकेन।
8 ओ ऎंग़ादे, अनेके ऎंग सबान मानचके एन निंगेन अवडिन आ चोव कुदा।
9 इनोर नीन एड़े गहन्डिक काला, अन्ते अनोन्ते मक़िस एड़ु एड़े-मक़े ऎंग बहाक ओन्द्रोका अन्दे एन अदे निंग अब्बोक, आह् मड़ मॆनलेह् आ चोव, टट-एर लायक एड़ु बितत्रेन।
10 अन्ते नीन अदे ओचेके निंग अब्बोक लपोति ओयोका, अन्दे आह् कॆयेन्ते अगदु निंगेन आसिक ननलेह्।
11 आनको याक़ूबे तॆहो रॆबेकान अवडयाह्, टुन्डा, ऎंग बया एसावेकि गन्डिनो गा पकि बॆहिद्, अन्ते ऎंग गन्डिद् निसग़रोद्।
12 इन्द्राग़ि अब्बाह् ऎंगेन कपनेह् चिनयेह्, अन्दे एन टगयु अन्डुव्रकेन आसिकेन मला, जे सरापेन हि क़क़ेन।
13 आनको अहि तॆहोद् अहिन अवडयाद्, ओ ऎंग़ादे, नीन क़क़ेने आ सरापेद् ऎंग मॆचे उट्रान्देद्। नीन ऎंग सबान मानया, अन्ते एक्के अदे ऎंग बहाक ओन्द्रोवा उदाहि।
14 अनि आह् एक्के एड़े मक़े क़क़ाह् अन्ते अदे तॆहो बहाक ओन्द्रयाह्। अन्ते तॆहोद् अदेत तम्बाकोह् मड़ मॆन्जाह् आ चोव टट-एर लायक एड़ु लपेन बितत्रयाद्।
15 अन्ते रॆबेका अडानो तंग बहानो बॆहु तंग मेग़रो तंग़ाद एसावेकि एड़े एड़ु पिन्देड़ेन ओत्रयाद् अन्ते चुड तंग़ाद याक़ूबेन अतत्रयाद्,
16 अन्ते एड़ेकि पकितानि चमेन अहि बड़िनो अन्ते क़स्रुनो अहिक अनो पकि बॆहलाद् आ
17 अन्ते तान बितत्रयाद् आ एड़ु लपेन अन्ते पिटान तंग़ाद याक़ूबेकि टॆटुनो चिचाद्।
18 अनि याक़ूबे तम्बाको बहाक एक्केह् अवडयाह्, ओ अब्बा। आनको तम्बाकोह् अवडेकिरत्रयाह्, इदि एन ओकिन, नीन नेरेन्दे ओ ऎंग़ादे।
19 याक़ूबे तम्बाकोन अवडयाह्, एन मेग़रो निंग़ाद एसावेन बरु, नीन अवडके आ चोव एन कुदकेन, अनेके चोचेके ओका, अन्ते नीन उगलित ऎंगेन आसिक ननले अदिक, ऎंग्कि पिटप सावजेन्ते मॊक़ा।
20 आनको इसहाके तंग़ादेन मॆन्जाह्, ओ ऎंग़ादे, नीन इनोन्द ऒकड़ि इकनाञ्य क़क़्क़े? आह् अवडेकिरत्रयाह्, निंग गोसाञ्यि यॆहोवाद् गा अदे ऎंग बहाक तुकाद्।
21 अनि इसहाके याक़ूबेन अवडयाह्, ओ ऎंग़ादे, नीन उगजिहि ऎंग़ाद एसावे बा मला अदे एन कपकेन आग़लेन अदिक, ऎंग बहाक तुक्रा।
22 अनि याक़ूबे तम्बाको इसहाक बहाक तुक्रयाह्। अनि आह् अहिन कपकेह् अवडयाह्, सबाद् तो याक़ूबेकिद् जे बड़िद् एसावेकिद्।
23 अन्ते याक़ूबेकि बड़िद् तंगबया एसावेकि बड़ि चोव पकितानि मॆन्जाद् आ लग्केह् इसहाके अहिन चिनयोति पोलाह्। अन्ते आह् अहिन आसिक ननयाह्।
24 जे आह् याक़ूबेन नन्दु मॆन्जाह्, नीन उगजिहि ऎंग़ाद एसावे यान्? याक़ूबे अवडेकिरत्रयाह्, ओंओं, एन आहिनि।
25 आनको इसहाके अवडयाह्, ओ ऎंग़ादे निंग्कि पितप माके ऎंग बहाक मॊक़ोति ओन्द्रा, अन्दे एन निंगे ऎंग्कि आसिकेन चियलेन। अनि आह् अहि बहाक अदे ओचाह्, अन्ते इसहाके लपयाह्। अदि क़ॊक़ आह् इसहाकेक अंगूर रसेन हों चिचाह् अन्ते आह् अदे ओन्डाह्।
26 अन्ते अहि तम्बाकोह् इसहाके अहिन अवडयाह्, ओ ऎंग़ादे, बहाक तुक्रके ऎंगेन चुमक़ा।
27 अनि याक़ूबे तुक्रकेह् अहिन चुमक़ाह्। अन्ते इसहाके अहि लुगाकि कसेंगिन सुंगचाह्, अन्ते अहिन आसिक ननकेह् ईञ्य अवडयाह्: टुन्डा, ऎंग़ादेकि कसेंगिद् यॆहोवाद् आसिक ननयाद् आ केतेकि कसेंगि चोवेद्।
28 गोसाञ्यिद् निंगे मॆरक़्क़ि सित्रिन, क़ेक़लकि नॆञ्यान चिचेकिद्, दनान, अन्ते पुन अंगूर रसेन चियान्देद्!
29 गोट मल-तोकार निंग्कि कमक्र मॆनान्देर, गोट पलकार निंग अगदु मुरग़रान्देर, नीन निंग उन्डग़लेरकि सरदार मॆना, अन्ते निंग इज्जोकि क़देर निंग अगदु मुरग़रान्देर; निंगेन सरापेयु गोटेरि सरापेयुव्रपे मॆनान्देर, अन्ते निंगेन आसिक ननु गोटेरि आसिक ननुव्रपे मॆनान्देर!
एसावे आसिकेन ऎवत्रिह्
30 इसहाके याक़ूबेन आसिक नन क़च्रनिहि, अन्ते याक़ूबे तम्बाको बहान्ते उरक़्क़ेह् तीरनिहि अहि तंगबया एसावे अहड़ान्ते किरकेह् बरचाह्।
31 आह् हों एड़ु लपेन ओरयेत्रकेह् तम्बाको बहाक ओन्द्रयाह्, अन्ते अहिन अवडयाह्, अब्बा चोयान्देह्, निंग़ाद ऎंग्कि अहड़ाकि पिटपेन मॊक़ान्देह्, अन्दे नीन ऎंगेन आसिक ननले।
32 आनको अहि तम्बाको इसहाके अहिन मॆन्जाह्, नीन नेरे? आह् अवडेकिरत्रयाह्, एन निंग्कि मेग़रो क़द एसावेन।
33 आनको इसहाके इक पदिहि क़ेन्द्रयाह् अन्ते अवडयाह्, तॆबे आह् नेरेह् मॆन्जाह्? क़व्रेन्ते पिटपेन ऎंग बहाक ओन्द्रयाह्, अन्ते नीन बरचके अदेन्ते अगदु एन आ गोटेन्ते लपकेन अन्ते अहिक आसिकेन चिचेकेन, ओंओं आह् आसिकताव मॆनेह्!
34 एसावे तम्बाकोकि सबान मॆननो हि क़रग़रले अन्ते तॆक़रले ओलग़याह् अन्ते तम्बाकोन अवडयाह्, ओ ऎंग अब्बा, ऎंगेन हों आसिक नना।
35 जे इसहाके अवडेकिरत्रयाह्, निंगडोह् टगयले बरचाह् अन्ते निंग्कि आसिकेन ओचाह्।
36 आनको एसावे अवडयाह्, अहिकि नामिद् याक़ूबे* आनुव्रेद् सहिद् मला अन्दे यान्? आह् गा ऎंगेन इनोरि अमट केपिस टगचाह्। आह् ऎंग्कि कुन्देकि उदान ओचाह्; मॆना, अनेके ऎंग्कि आसिकेन हों ईन्ज्रयाह्। अन्ते आह् मॆन्जाह्, नीन ऎंग लग्के बहोन्द गोटे आसिकेन ऎंगत्रलेके यान्?
37 इसहाके एसावेन अवडेकिरत्रयाह्, मॆना, एन अहिन निंग्कि सरदार मॆन्जेकेन, अन्ते अहिकि गोट बयाड़ेरिन अहिकि चाक्रिनो बिच्रकेन, दनात अन्ते पुन अंगूर रसेत अहिन बज्रेत्रकेन। अनेके, ओ ऎंग़ादे, एन निंग लग्केन इन्द्रे से कुदोति पारयिन?
38 एसावे तम्बाकोन अवडयाह्, ओ अब्बा, निंग बहानो बहोक़दि आसिकेद् बॆहिद् आन्? ओ अब्बा, ऎंगेन हों आसिक नना। आनकेह् एसावे बॊक्रारले ओलग़याह्।
39 अनि तम्बाको इसहाके अहिन ईञ्य अवडेकिरत्रयाह्: मॆना, क़ेक़लकि सिञ्याड़िन्ते अन्ते मॆरक़्क़ि सित्रिन्ते गॆचि निंग्कि डॊकपो मॆनेनिद्।
40 नीन निंग्कि तड़वारित उजेने, अन्ते निंगडोकि कमक्र मॆनेने, जे नीन ककड़ारेने अदेनो, नीन निंगडोकि पलोन निंग क़स्रेन्ते तरके तुवेने।
याक़ूबे एसावेकि रॊकेन्ते बाचारोति बोंग़िह्
41 अन्ते एसावे तम्बाकोह् याक़ूबेन आसिक नन ओजयाह् अदि पन्तेनो याक़ूबेकि राड मॆन्जाह्, अन्ते आह् तंग उगलिनो ईञ्य अवड ओजयाह्: ऎंग अब्बा लग्कि ओलग़-दिनेद् अटगि बॆहिद्, अदेनिहि से एन ऎंगडो याक़ूबेन पिटेन।
42 जे मेग़रो एसावेकि ई सबाद् रॆबेकाकि क़ॆदविक कोरचाद्। अनि आद् चुड तंग़ाद याक़ूबेन बीकत्रकिद् अहिन ईञ्य अवडयाद्, मॆना, निंग बया एसावे निंगेन पिटेन आनले तंग उगलिन पटयेत्रिह्।
43 अनेके ओ ऎंग़ादे, ऎंग सबान मानया, चोया अन्ते हरान देसिनो डॊकु ऎंग बया लाबान बहाक बोंग़ काला।
44 अन्ते निंग बयाकि रॊकेद् एग़ोमलाद् अमट पुलोन्द दिनि अहि संगाल अनोहि डॊक्कु,
45 अन्ते निंग बयाकि रॊकेद् एक़्क़े नीन अहि गुनि कुदके अदे आह् मोहर क़ॊक़ एन निंगेन अनोन्ते बीकत्रकेन ओन्द्रेन। ऎंगे निम इव्रेरिन दिनोन्दि हि इन्द्राञ्य ऎवत्रोति बॆहिद्?
46 अनि रॆबेका इसहाकेन अवडयाद्, एसावे बॆदयाह् ईव ईव हित्ति-आनि पेलेरि संगाल डॊकनो ऎंग्कि उजेद् गिनार्पेद्। याक़ूबे हों ई देसिकि ई चोव हित्ति-आनि पेलेरिन्ते बॆदेह् तानि, ऎंगे ऎंग्कि उजेत इन्द्र काजेद् उरक़ेनिद्?
*२७:३६ याक़ूब नामिकि मतलबेद्: आह् क़ॆडे दरयिह्, ई बान्गि मतलबेद्: आह् टगयिह्।