1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27, 28, 29, 30, 31, 32, 33, 34, 35, 36, 37, 38, 39, 40, 41, 42, 43, 44, 45, 46, 47, 48, 49, 50.
अब्रहामे अन्ते अबीमेलेके
1 अब्रहामे मम्रेन्ते उरक़्क़ेह् पर्त-मोहा बत्ति देसिक एकयाह्, अन्ते कादेस अन्ते सोर मजि ओकेतयाह्; क़ॊक़ अड़प दिनि लग्केह् गरारेनो डोकयाह्। 2 अनो अब्रहामे तंगे डानि सारान तंगडोद् आनयाह् आ लग्केह्, गरारेकि राजाह् अबीमेलेके सिपाहिरिन तॆयेकेह् सारान ओन्द्रतितयाह्। 3 जे गोसाञ्यिद् माक़े अबीमेलेकि तुमगलनो एत्रकेह् ईञ्य अवडयाह्: मॆना, नीन ओन्द्रतितके आ पेलि लग्के नीन कॆयोति ननने; इकनिकि आद् बॆदुव्रप पेलिद्। 4 जे अबीमेलेके अदि गुनि कॊड्र नक़लाह्; अनि आह् अवडयाह्, ओ प्रबु, टडाबलो मल-तोकारिन नीन आडेनि यान्? 5 आह् तानहि ऎंगेन ईद् ऎंगडोद् आनलाह् अन्दे यान्? अन्ते ईद् हों तानहि आह् ऎंगडोह् आनमलाद् अन्दे यान्? एन इदे ऎंग्कि उगलिकि उगजोत अन्ते ऎंग्कि टॆटुकि टडाबलोत कुदकेन। 6 आनको गोसाञ्यिद् अहिन तुमगलेनो अवडयाद्, नीन निंग्कि उगलिकि उगजोति इदे कुदके अदे एन आग़िन; अन्ते नीन ऎंग बहानो हि पापेन कुदलो अदिक, एनि से निंगेन टेकचकेन; आ लग्केन एन निंगेन अदिन कपत्रलेकेन। 7 अनेके नीन आ मलेकि डानिन अहि बहाक तॆया; आह् गा नबिह्, अन्ते आह् निंग लग्केह् सुम्ब्रारेह् अन्दे से नीन उजेने। जे जुदि नीन अदिन किरत्रोमलेके तानि, नीन अन्ते निंग बत्ते गोटेरि जरुरहि कॆयेर अदे आग़ा।
8 अबीमेलेके माक़ोन्द हि चोचाह्, अन्ते तंग्कि गोट कमक्रेरिन बीकयाह् अन्ते ई गोट सबान आबेरिन तॆंग़ाह्; आबेर गाड़े ऎलचयार। 9 अनि अबीमेलेके अब्रहामेन बीक्केह् अहिन अवडयाह्, नीन ऎमेन इन्द्रे कुदके? नीन ऎंग मॆचे अन्ते ऎंग राजि मॆचे गाड़े बॆडो कसुरेन ऒन्दोति एन निंगेन इन्द्र गलतिन कुदकेन? कुदोति बॆहोमलु काजेन नीन ऎंगेन कुदके। 10 अन्ते अबीमेलेके अब्रहामेन अदो अवडयाह्, नीन इन्द्रे उगलेचके ई काजेन कुदके? 11 आनको अब्रहामे अवडकिरत्रयाह्, ई जगेनो तो गोसाञ्यिन ऎलचेद् मला अन्ते ईटिकि मलेर ऎंगे डानि लग्केर ऎंगेन पिटेर आञ्य एन उगलेचकेन इदे कुदकेन। 12 अन्ते आद् ऎंगडोद् आनकेन आद् हों उगजो सबाद्; आद् ऎंग अब्बाकि तंग़ादिद् जे ऎंग अय्याकि तंग़ादिद् मला अन्ते एन अदिन बॆदकेन। 13 अन्ते गोसाञ्यिद् ऎंगेन ऎंग अब्बाकि अडान्ते चर्च कुदत्रयाद् अदेनो, एन अदिन अवड ओजकेन, ऎंगे एदोति बॆहु निंग्कि दॆयाद् ईदि से: नाम इकेनो गोटे एकित अनो नीन ऎंगेन, ईह् ऎंगडोह् आनकु। 14 अनि अबीमेलेके बेडि अन्ते ऒये, कमक्ररिन अन्ते कमक्रनिरिन अब्रहामेक चिचेकेह् अहि डानि सारान हों अहिक किरत्रयाह्। 15 अबीमेलेके अदो अवडयाह्, टुन्डा, ऎंग्कि देसिद् निंग अगदु कॊडिद्, निंगे मड़ेद् अनो डॊका। 16 अन्ते आह् सारान अवडयाह्, टुन्डा, निंगडोक अजारोन्द रुपा सुकिन चिचेकेन, आद् निंग गुनि डॊकु गोटेरिक नीन टडाबलो अदिकि चिनाद् अन्ते गोटेरि नीन इन्द्र गोटे गलतिन कुदलेकि अदे आग़ेर। 17 यॆहोवाद् अब्रहामेकि डानि लग्किद् अबीमेलेकेकि अडा मलेरकि कोचोन मुचकिद् बॆहत्रयाद्, 18 अनि अब्रहामे गोसाञ्यिन सुम्ब्रारयाह्, अन्ते गोसाञ्यिद् अबीमेलेकेन, अहि डानिन अन्ते अहिकि क़ेग़प-कमक्रनिरिन हों, आबेर मक़ेरिन कुन्दत्रलेर अदिक, नॆकत्रयाद्।