1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27, 28, 29, 30, 31, 32, 33, 34, 35, 36.
सप्पाबलो मलेर
1 यॆहोवाद् मूसान ईञ्य अवडयाद्: 2 गोट मुगडोतावेरिन, बा गन्डिन्ते उरक़पतावेर गोटेरिन, बा कॆयप गन्डित क़ाजग़र सप्पाबलोतावेर गोटेरिन ओकेतपेन्ते ओत्रकेर तॆयोति इस्राएलेरिन उकम नना। 3 मुड़सेह् अको बा पेलिद् अको आ चोवेरिन नीम ओकेतपेन्ते ओत्रकेर तॆया; एन बसयिन आ तमकि ओकेतपेन सप्पाबलो ननलोर अदिक, नीम आबेरिन ओकेतपेन्ते ओत्रकेर तॆया। 4 यॆहोवाद् मूसान अवड ओजयाद् आ चोवहि इस्राएलेर कुदकेर आ चोवेरिन ओकेतपेन्ते ओत्रकेर तॆयार।
गलति लग्कि किरत्रेद्
5 यॆहोवाद् मूसान अदो ईञ्य अवडयाद्, 6 नीन इस्राएलेरिन ईञ्य अवडा: ओर्त मलेह् बा मलनिद् यॆहोवाकि उकमेक उगजोबलो मॆन्जेकेर मलेर कुद सॆंगनेर आ चोव इन्द्र-बॆडि गलतिन कुदकेर दॊस मॆनेर अदेनो, 7 आबेर ताम कुदयार आ पापेन कबुलारान्देर। आ चोवेह् तान कुदयाह् आ गलति लग्केह् डन्डयप पेसा मादि अदिकि पचमानो एन्डोन्देन जॊड़चकेह् गलतिन कुदुव्रुक किरत्रान्देह्। 8 आ डन्डयप पेसान ईन्ज्रोति गलतिन कुदुव्रुकि बयाड़ेह् नेह् गोटे डॊकोमलाह् तानि, अहिकि पापेन आडोति लग्कि डन्डयप पेसाद् मरगो बेडिद् ऎड़वुरलिद् आ दूरेहि मला, यॆहोवाक आ डन्डयप पेसाद् किरत्रुव्रान्देद् अन्ते आद् ऎड़वुक चियुव्रान्देद्। 9 इस्राएलेर कीदोति ऎड़वु बहाक ओन्द्रनेर आव आव गोट पाक ऎड़वपेद् ऎड़वु बत्ते मॆनेनिद्। 10 ओर्तोनोन्देह् कीदिह् आव आव पाक कीदपेद् अहि बत्तेद्; इकेह् गोटे इन्द्रे गोटेन ऎड़वुक चियिह् आद् ऎड़वु बत्तेद्।
उगजोबलो डानि पन्तेनो
11 यॆहोवाद् मूसान अदो ईञ्य अवडयाद्, 12 नीन इस्राएलेरिन ईञ्य अवडा: इकेह् गोटेकि डानिद् अरबरकिद् अहिक उगजोबलोद् तानि, 13 इक मल गोटे गुनि आ पेलिद् कॊड्र नक़्क़िद्, आद् तंगेन सप्पाबलो ननिद् तानि गोटे, आद् अदिकि डावेक नुडग़र्पेद् अन्ते इकेक गोटे आग़ुव्रोमलाद्, अन्ते अदि पन्तेनो गोहायिबलो आद् लंगविन कुदे डॊकनो दरयुव्रोमलाद् अदेनो, 14 जुदि अदिकि डावे मॆचे ईकेसारेकि परानिद् ऎतकिद् आह् तंगे डानिद् डग्रेयुव्रप डानिन ईकेसारिह् तानि, बा अहि डानिद् डग्रेयुव्राबलनो अहि मॆचे ईकेसारेकि परानिद् ऎतकिद् आह् तंगे डानिन ईकेसारिह् तानि, 15 आ मलेह् तंगे डानिन ऎड़वु बहाक ओन्द्रान्देह्। अन्ते आह् अदि लग्केह् दसमा बक्रा ऎपा अनोन्द जवाकि आटान कीदपे चोव ओन्द्रान्देह्। आद् ईकेसारेकि दना कीदपेद् अन्ते उगलार्पो कीदपेद् आ लग्केह् आह् अदिनो इसग़ने पुदयोमान्देह् अन्ते अदि मॆचे महमहरो दुमेनिन बिच्रोमान्देह्।
16 अन्ते ऎड़वुह् आ पेलिन तंग अटगि बीक्केह् यॆहोवाकि क़न-सरि इलदान्देह्; 17 अन्ते एन्डोन्द क़जु-बान्डेनो पाक अमे ओचेकेह् डॊकपो-जगेकि क़ेक़लेन्ते रेकोन्द क़जे पॆतेकेह् आ अमुनो बिच्रान्देह्, 18 अन्ते ऎड़वुह् आ पेलिन यॆहोवाकि क़न-सरि इलदकेह् अदिकि कुक-तलिकि मुलुर्पेन ओत्रोति ईकेसारेकि दना कीदपेन, आद् गा उगलार्पो कीदपेद्, अदिकि टॆटुनो कीदान्देह्। सरापेयत्रु क़ड़क़-अमुद् ऎड़वुकि टॆटुनोहि बॆहान्देद्। 19 अदि क़ॊक़ ऎड़वुह् आ पेलिन बेके ओन्दकेह् ईञ्य अवडान्देह्: नेह् गोटे निंग गुनि कॊड्र नक़ाबलो, निंगे डावेकि जीमा क़ोलग़रनो डॊकु नीन सप्पाबलो मॆन देने अरबरोमलेकि तानि, सरापेयत्रु ई क़ड़क़ अमुद् निंगेन डग्रेत्रोमान्देद्। 20 जे निंगे डावेकि जीमा क़ोलग़रनो डॊकु नीन अरबरकि निंगे डावेन अम्बकि नन मल गुनि कॊड्र नक़्क़ि सप्पाबलो मॆन्जेकि डॊकनि तानि, 21 ऎड़वुह् आ पेलिन सरापेयेकि सबात बेके ओन्देकेह् ईञ्य अदिन अवडान्देह्: यॆहोवाद् निंग्कि कोचोन उट्रतितकिद्, कोचो उरक़त्रकिद्* निंगेन निंग मलेरि मजि सरापेय अन्ते सावये लॆहात्रान्देद्। 22 सरापेयत्रु ई अमुद् निंग्कि पुड़ानो कोरचकिद् निंग्कि कोचोन उट्रतितकिद्, कोचो उरक़त्रान्देद्! आनको आ पेलिद् आमिन! आमिन! आनान्देद्।
23 अदि क़ॊक़ ऎड़वुह् ईव ईव सरापेयु सबान कुड़गप चमे कागतेनो कूक्रकेह् आव आवेन क़ड़क़-अमुनो नॊड़ान्देह्, 24 अन्दे से आह् सरापेयत्रु आ क़ड़क़-अमे आ पेलिन ओन्देह् अदेनो सरापेयत्रु आ अमुद् अदिक कोरचकिद् क़ड़क़ नुन्जत्रेनिद्। 25 अदि क़ॊक़ ऎड़वुह् ईकेसारेकि दना कीदपेन आ पेलिकि टॆटुन्ते ईन्ज्रकेह् अदिन यॆहोवाकि क़न-सरि आवड़ेचकेह् ऎड़व-पिन्डानो कीदान्देह्; 26 अन्ते ऎड़वुह् उगलार्पो चोव आ दना कीदपेन्ते मुटोन्द ओत्रकेह् ऎड़व-पिन्डानो क़ोसत्रान्देह्, अन्ते अदि क़ॊक़ आह् आ पेलिक आ अमे ऒनोति चियान्देह्। 27 आह् आ पेलिक आ अमे ओन्द क़ॊक़ इन्देकि मॆनेनिद्: जुदि आ पेलिद् सप्पाबलो मॆन्जेकिद् तंगे डावेक उगजोबलो मॆन्जेकिद् डॊकिद् तानि, सरापेयत्रु आ अमुद् अदिक कोरचकिद् क़ड़क़ नुन्जत्रेनिद्, अन्ते अदिकि कोचोन उट्रतितकिद्, कोचो उरक़त्रेनिद्, अन्ते आ पेलिद् तंग मलेरि मजि सावये लॆहारकिद् डॊकेनिद्। 28 जे आ पेलिद् तंगेन सप्पाबलो ननाबलो सप्पाद् तानि, आद् ई दॊसेन्ते गॆचि मॆन्जेकिद् कोचोन क़ेन्दोति पारयेनिद्। 29 पेलिद् तंगे डावेकि क़ोलग़रनो डॊकनो अरबरकिद् तंगेन सप्पाबलो ननिद् अदेनो, 30 बा ईकेसारेकि परानिद् मल मॆचे ऎतिद् अन्ते आ मलेह् तंगे डानिन ईकेसारिद् अदेनो, ईदि से नियमेद्: आ मलेह्* आ पेलिन यॆहोवाकि क़न-सरि इलदान्देह्, अन्ते ऎड़वुह् आ गोट नियमे चोव गोटेदिन अदिक कुदान्देह्। 31 आ मलेह् डग्रहान्ते चोग़र्पे मॆनेह्, जे आ पेलिद् तंग्कि डग्रहाकि सजान क़ेन्देनिद्।