1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27, 28, 29, 30, 31, 32, 33, 34, 35, 36.
लेवि-आवेरकि सहर गहन्डिद्
1 यॆरीहो अटगि ओकु यरदानेकि ई बजो मोवाबेकि बहयारेनो यॆहोवाद् मूसान ईञ्य अवडयाद्: 2 इस्राएलेर ताम तम नननेर आ राजिन्ते लेवि-आवेरिक डॊकोति सहर गहन्डिन चियोति उकम नना; अन्ते लेवि-आवेरिक आव आव सहर गहन्डिकि चारा-कूटि बागु बहयार क़ेक़ले हों चियोति बॆहिद्। 3 आव आव सहर गहन्डिद् आबेर डॊकोति, अन्ते आव आवेकि बहयार केत गहन्डिद् आबेरकि रुवे लग्कि, आबेरकि बेडि-एड़े गहन्डि लग्कि, अन्ते आबेरकि गोट नन जानवरेरि लग्कि मॆनेनिद्। 4 नीम लेवि-आवेरिक चियनेर आव आव सहर गहन्डिकि चारा-कूटि बागु बहयार क़ेक़लुद् सहरेकि दॆवालिन्ते बाहरेनो चारा-कूटि अजारोन्द मुकि गॆचिक अड़सान्देद्। 5 सहरेद् मजि बॆहनो, सहरेकि दुवारिन्ते जॆजकेर बेर-अरगो बजे अजारिस मुकि, पर्त-मोहा बजे अजारिस मुकि, बेर-उट्रो बजे अजारिस मुकि, अन्ते गंगा-मोहा बजे अजारिस मुकि नीम नापकु; ईद् आबेरकि सहर गहन्डि लग्कि बहयार क़ेक़लु मॆनान्देद्। 6 नीम लेवि-आवेरिक चियु सहर गहन्डिनो चेन्डा बाचार्पो सहरेद् मॆनान्देद्, इक मलेन गोटे पिटुह् आटिक बोंग़ बाचारलेह्; अन्ते आव आव सहरेन अम्बकेर अदो कॊड़यिस दून्डा सहरेन हों आबेरिक चियकु। 7 नीम लेवि-आवेरिक चियोति बॆहु सहर गहन्डिद् कॊड़यिस अटेन्डा सहरेद् अन्ते आव आवेकि चारा-कूटि ओकु बहयार क़ेक़लुद् मॆनान्देद्। 8 अन्ते नीम इस्राएलेरकि राजिन्ते आव आव सहरेन क़ाड़केर चियनेर अदेनो, इकेरि बहानो गड़हि बॆहिद् आबेरि बहान्ते गड़हि, अन्ते इकेरि बहानो जोकाहि बॆहिद् आबेरि बहान्ते जोकाहि क़ाड़केर चियकु। अंगेमंगे तम ननप राजि चोव तमकि सहर गहन्डिनो लेवि-आवेरिक चियान्देर।
बाचार्पो सहर गहन्डिद्
9 यॆहोवाद् मूसान अदो अवडयाद्, 10 नीन इस्राएलेरिन ईञ्य अवडा: नीम यरदानेन कटकेर कानान देसिक कोरनेर अदेनो, 11 काना-बेलि इकेन गोटे पिटुह् बोंग़ बाचारलेह् अदिक, बाचार्पो सहर चोव सहर गहन्डिन टहरेत्रकु। 12 पिटुह् तुन्ग़र्पेनो सबान-आदुव्रेन्ते कॆयलोह् अदिक, आव आव सहरेद् तॊड़ेन ओयुकि टॆटुन्ते बोंग़ बाचारोति बाचार्पो मॆनेनिद्। 13 नीम टहरेत्रनेर आव आव सहरेनो चेन्डा सहरेद् निम लग्कि बाचार्पो मॆनेनिद्। 14 यरदानेकि ई बजो तीनेन्डा सहरेन, कानान देसिनो तीनेन्डा सहरेन बाचार्पो सहरे आनकेर टहरेत्रकु। 15 काना-बेलि इकेन गोटे पिटुह् आ सहरेक बोंग़ बाचारलेह् अदिक, आव आव चेन्डा सहरेद् इस्राएलेरिक, निम मजि डॊकु परि-देसि मलेरिक अन्ते परि मलेरिक हों बाचार्पो सहरे मॆनान्देद्।
मल-पिट अन्ते तॊड़ेन ओत्र पन्तेनो
16 जे इकेह् गोटे ननेन लोहाकि अतयारेत बजिह् अदेनो बजुव्रपेह् कॆयिह् तानि, बजुह् मल-पिटुह्; आ मल-पिटुह् पिटुव्रान्देह्। 17 बा इकेह् गोटे पाड़ोन्द चाचेन पॆतेकेह् ननेन आ कॆयलेह् आ चोव इन्ज पिटिह् अन्ते आह् कॆयिह् तानि, इन्ज पिटुह् मल-पिटुह्, आ मल-पिटुह् पिटुव्रान्देह्। 18 बा इकेह् गोटे तंग्कि टॆटुनो एन्डोन्द कन्कु बागु अतयारेन पॆतेकेह् ननेन आ कॆयलेह् आ चोव बजिह् अन्ते आह् कॆयिह् तानि, बजुह् मल-पिटुह्, आ मल-पिटुह् पिटुव्रान्देह्।
19 तॊड़ेन ओयुहि से मल-पिटुन पिटान्देह्; आबेर बॆटार नक़नो हि तॊड़ेन ओयुह् अहिन पिटान्देह्। 20 अन्देकेहि से इकेह् गोटे ननेन आ कॆयलेह् आ चोव राड मॆन्जेकेह् तुके तॆयिह् बा, अटेन-ओक्केह् आह् कॆयलेह् आ चोव इन्द्र-बॆडिन चूटिह् तानि, 21 बा राड मॆन्जेकेह् तंग्कि टॆटुत बजनो ननेह् कॆयिह् तानि, बजुह् मल-पिटुह्, आ मल-पिटुह् पिटुव्रान्देह्; तॊड़ेन ओयुह् आ मल-पिटुन बॆटार नक़नो हि अहिन पिटान्देह्।
22 जे इकेह् गोटे राड मॆनाबलो ननेन अचकाहि तुके तॆयिह्, बा अटेन-ओकाबलो इन्द्र-बॆडि अतयारेन अहि मॆचे चूटिह् तानि, 23 बा अहिक राड मॆनाबलो अन्ते अहिक डग्रहान कुदोति उगलेयाबलो आ कॆयलेह् आ चोव अहिन टुन्डाबलो पाड़ोन्द चाचेन चूटनो आह् कॆयिह् तानि, 24 अनि मल-पिटुन अन्ते तॊड़ेन ओयुन हों तुन्ग़र्पेर ईव ईव नियम चोव सबान-आदान्ते; 25 अन्ते तुन्ग़र्पेर मल-पिटुन तॊड़ेन ओयुकि टॆटुन्ते बाचात्रकेर, आ मल-पिटुन अगदु बोंग़ बाचारयाह् आ बाचार्पो सहरेक नन्दु बोंग़त्रान्देर। पाक इसग़नेत मालयुव्रप बॆडो ऎड़वु मजयेह् कॆयेह् आ अमट आ मल-पिटुह् आ सहरेनो हि डॊकान्देह्। 26 जे मल-पिटुह् तान बोंग़ बाचार्पो सहरेकि सीमान्ते दुवारिनो इक पहरा गोटे एकिह्, 27 अन्ते तॊड़ेन ओयुह् मल-पिटुन बाचार्पो सहरेकि दुवारिनो अन्डुव्रकेह् पिटिह् तानि, अहि मॆचे क़ेस-अहमानेद् बॆहेनि मलाद्। 28 इकनिकि मल-पिटुक बॆडो ऎड़वु मजयेकि कॆय अमट बाचार्पो सहरेनो हि डॊकोति बॆच्चाद्; जे बॆडो ऎड़वु मजयेकि कॆय क़ॊक़ मल-पिटुह् तंग अडाक किरोति पारयिह्। 29 ईव ईवेद् निमकि गोट डॊकपो जगेनो अन्ते गोट नति-जालिरिनो ऎयने अन्ते नियमे आञ्य मॆनान्देद्। 30 इकेह् गोटे ननेन पिटिह् तानि, आ मल-पिटुह् गोहायिन चियुरकि गोहायि सबा चोव पिटुव्रान्देह्; जे नेह् गोटे ओर्त गोहायिन चियुकि गोहायि सबान चोव पिटुव्रोमान्देह्। 31 कॆय जोकेरे दॊस ननुव्रपेकि उज लग्कि चोग़र्प-आकेन नीम ईन्ज्रोमा; मल-पिटुह् जरुरहि पिटुव्रान्देह्। 32 तंग्कि बाचार्पो सहरेक बोंग़ बाचार्पेह् बॆडो ऎड़वु मजयेकि कॆय अगदु तंग्कि देसिनो डॊकोति किरकेह् बरोति नीम अहि लग्केर चोग़र्प-आकेन ईन्ज्रोमा। 33 नीम डॊकनेर आ देसिन डग्रेयोमा; इकनिकि क़ेसुद् देसिन डग्रेयिद्, अन्ते क़ेसे तुन्दयाह् अहिकि क़ेसे अम्बकेर अदो इन्द्र-बाने आकेत देसिनो तुन्दप क़ेस लग्कि पापेन-आडेद् कुदुव्रोति पारयोमलाद्। 34 नीम डॊकनेर आ ऎंग्कि डॊकपो आनुव्रु देसिन डग्रेयोमकु; यॆहोवान एनि से इस्राएलेरि मजि बसयिन।