1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27, 28, 29, 30, 31, 32, 33, 34, 35, 36.
दिबिन ओयेकि नियमेद्
1 मूसा इस्राएलेरकि पलकारकि मूलारिन अवडयाह्, यॆहोवाद् इदिनि से उकम ननिद्: 2 इकेह् गोटे यॆहोवाक इन्द्र-बॆडि दिबिन ओयिह् बा, इन्द्र-बाने काजेन कुदोति क़दक़ोडकेह् तंग्कि परानिन कबुलार्पे मॆनिह् अदेनो, आह् तंग्कि सबा चोव चलाराबलु मॆनोमान्देह् अन्ते आह् तंग्कि तोरोन्ते उरक़प सबा चोव कुदान्देह्। 3 तंग्कि तम्बाकोकि अडानो डॊकु ओर्त पेलिद् तंग्कि बटगनि उम्रेनो यॆहोवाक दिबिन ओचेकिद् इन्द्र-बाने काजेन कुदोति क़दक़ोडकिद् तंग्कि परानिन कबुलारकिद् डॊकिद्, 4 अदिकि कुदप दिबिन ओयेन अते अदिकि क़दक़ोडपेन हों अदिकि तम्बाकोह् मॆन्जेकेह् गोटे अदिक इन्द्रे गोटेन तॆंग़लाह् अदेनो, आद् तान कुदयाद् आ गोट दिबिन ओयेन अन्ते क़दक़ोडकिद् कबुलार्पेन हों पूरात्रान्देद्। 5 जे अदिकि कुदप दिबिन ओयेन अन्ते क़दक़ोडकिद् कबुलार्पेन हों अदिकि तम्बाकोह् मॆन्जाह् आ दिनेनो आह् अदिन मना ननकेह् टेकयिह् तानि, अदे पूरात्रोति बॆहोमलाद्; अदिकि तम्बाकोह् मना ननकेह् टेकचाह् आ लग्किद् यॆहोवाद् अदे अदिक माप ननेनिद्।
6 आद् दिबिन ओयनो बा तंग्कि तॆबोत तंग्कि परानिन कबुलार्पे मॆनिद् अदेनो आद् मुड़सतानिद्, 7 अन्ते अदिकि डावेह् अदे मॆन्जेकेह् गोटे अदे मॆन्जाह् आ दिनेनो अदिक इन्द्रे गोटेन तॆंग़लाह् तानि, अदिकि गोट दिबिन ओयेन अन्ते क़दक़ोडकिद् कबुलार्पेन हों पूरात्रान्देद्। 8 जे अदिकि डावेह् अदे मॆन्जाह् आ दिनेनो आद् मना ननकेह् टेकचाह् अन्ते अदिकि कुदप दिबिन ओयेन अन्ते तंग्कि परानिन क़दक़ोडकिद् कबुलार्पेन हों आन्द्र ननेह् तानि, यॆहोवाद् अदे अदिक माप ननेनिद्। 9 जे रन्डियनि बा अम्बप पेलिद् तंग्कि परानिन क़दक़ोडकिद् कबुलारकिद् कुदप गोट दिबिन ओयेन पूरात्रान्देद्।
10 अन्ते आद् तंगे डावेकि अडानो इन्द्र-बॆडि दिबिन ओयिद् बा, इन्द्र-बाने काजेन कुदोति क़दक़ोडकेह् तंग्कि परानिन कबुलार्पे मॆनिद्, 11 अन्ते अदिकि डावेह् अदे मॆन्जेकेह् गोटे अदिन मना ननकेह् टेकयाबलो असलु डॊकिह् तानि, आद् तंग्कि कुदप गोट दिबिन ओयेन अन्ते तंग्कि परानिन क़दक़ोडकिद् गोट कबुलार्पेन पूरात्रान्देद्। 12 जे अदिकि डावेह् आव आवेन मॆन्जाह् आ दिनेनो आव आवेन आन्द्र ननिह् तानि, अदिक तंग्कि कुदप दिबिन ओयेन, अन्ते आद् तंग्कि परानिन क़दक़ोडकिद् कबुलार्प पन्तेनो अदिकि तोरोन्ते उरक़प इन्द्रे गोटेन पूरात्रोति बॆहोमलाद्; अदिकि डावेह् आव आवेन आन्द्र ननयाह् आ लग्किद् यॆहोवाद् अदिन अदिक माप ननेनिद्। 13 इन्द्र-बाने दिबिन ओयेन बा, परानिन क़दक़ोडकिद् कुदप इन्द्र-बाने कबुलार्पेन अदिकि डावेह् बज्रेत्रोति पारयलेह् बा, आह् आन्द्र ननोति पारयलेह्। 14 जे अदिकि डावेह् इक दिने गोटे इन्द्र गोटेन तॆंग़ोमलाह् तानि, आह् गोट दिबिन ओयेन, अदिकि कुदपो गोट क़दक़ोडपेन बज्रेत्रिह्; आह् अदे मॆन्जाह् आ दिनेनो अदिक इन्द्र गोटेन तॆंग़लाह् आ लग्केह् आह् आव आवेन बज्रेत्रिह्। 15 जे आह् आव आवेन मॆन्जाह् अदि क़ॊक़ आव आवेन आन्द्र ननिह् तानि, आह् अदिकि कसुरताव मॆनेह्। 16 डावे अन्ते अहिकि डानि, तम्बाको अन्ते अहिकि अडानो बटगनि उम्रेनो डॊकु अहिकि तंग़ादि पन्तेनो यॆहोवाद् मूसान उकम ननप उकम गहन्डिद् ईव ईवेदि से।