लॆका – 28 मूलिद्

1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27, 28, 29, 30, 31, 32, 33, 34, 35, 36.

दिनानेकि ऎड़वपोद्

(चो उर २९:३८–४६)

1 यॆहोवाद् मूसान अवडयाद्, 2 इस्राएलेरिन उकम ननके ईञ्य आबेरिन अवडा: ऎंगे अपोकेत्रु चॆञ्य चोव चिचुत कीदप ऎंगे कीदपो-लपेन टहरेत्रप पहरानो कीदोति इयेहारले डॊका। 3 अन्ते नीन आबेरिन अदो अवडा, ईदि से निमे यॆहोवाक चिचुत कीदप कीदपोद्: रतबलो दिनाने बचेरोन्द-आनि मक़िस टडाबलो बेडि-मक़ोन ऎड़वकु। 4 नीन मक़ोन्द बेडि-मक़ोन माक़ोन्द अन्ते नन बेडि-मक़ोन बेड़ित ऎड़वकु। 5 अन्ते अदि मादि दान-कीदपो लग्कि किलयोन्द* टिपयप जलपायकि सप्पा इसग़नुनो सानयप किलयोन्द कटप एड़ु आटान हों कीदकु। 6 ईद् तो सीन पहाड़ेनो उकम ननुव्रप रतबलो दिनाने कीदपोद्, अन्ते ईद् यॆहोवाक अपोकेत्रु चॆञ्य चोव चिचेत कीदप कीदपोद्। 7 अदिकि ऒन-कीदपो लग्कि किलयोन्द अंगूर-रसेन मक़ोन्दोन्द बेडि लग्कि मॆनेनिद्; पाक-जगेनो नीन आ ऒन-कीदपोन यॆहोवाकि पुदयकु। 8 अन्ते नन बेडि-मक़ोन बेड़ित ऎड़वकु, अन्ते माक़ोन्द चिचेके आ दनाकि कीदपो अन्ते ऒन-कीदपो देने अदे यॆहोवाक अपोकेत्रु चॆञ्य चोव चिचेत ऎड़वकु।

सब्त दिनेकि कीदपो गहन्डिद्

9 सब्त दिनेनो दान-कीदपो लग्कि बचेरोन्द-आनि मक़िस टडाबलो बेडिन, इसग़नुनो सानयप किलयिस कटप एड़ु आटान अन्ते अदिकि ऒन-कीदपोन हों कीदकु। 10 दिनाने कीदप क़ोसत्र ऎड़वपो अन्ते अदिकि ऒन-कीदपोन अम्बिन आनकि सब्तताड़े कीदप क़ोसत्र ऎड़वपो ईदि से।

मॆहनाताड़े कीदपो गहन्डिद्

11 मॆहनाताड़े पॆहला दिने नीम यॆहोवाक क़ोसत्र ऎड़वपो चोव मक़िस बड़देन, मक़ोन्द मरगो-बेडिन अन्ते बचेरोन्द टडाबलो सत गोटा बोकड़ा बेडिन ऎड़वकु। 12 अन्ते दान-कीदपो लग्कि जलपाय इसग़नेत सानयप तीन किलोग्राम कटप एड़ु आटान मक़ोन्दोन्द बड़दे लग्कि, अन्ते ऒन-कीदपो लग्कि जलपाय इसग़नेत सानयप किलयिस कटप एड़ु आटान मक़ोन्द मरगो-बेडि लग्कि हों; 13 अन्ते मक़ोन्दोन्द बेडि लग्कि दान-कीदपो चोव किलयोन्द जलपाय इसग़नेत सानयप कटप एड़ु आटान हों कीदकु; ईद् यॆहोवाक अपोकेत्रु चॆञ्य चोव चिचेत कीदप क़ोसत्र ऎड़वपोद्। 14 आव आवेकि ऒन-कीदपो गहन्डिद् अंगूर-रसेनो बड़दे लग्कि दू लिटर अनोन्देद्, मरगो-बेडि लग्कि डेड लिटर अनोन्देद्, अन्ते बेडि लग्कि लिटरोन्द अनोन्देद् मॆनान्देद्। ईद् सग्र बचेरिनो मॆहनाताड़े कीदोति बॆहु क़ोसत्र ऎड़वपोद्। 15 अन्ते दिनाने कीदप क़ोसत्र ऎड़वपो अन्ते अदिकि ऒन-कीदपोन अम्बिन आनकि चुम्बाड़ ऎड़वपो चोव यॆहोवाक मक़ोन्द बोकड़ा एड़ेन हों कीदुव्रान्देद्।

पसाकि कीदपो गहन्डिद्

(लेवि २३:३३–३५)

16 पॆहला मॆहनाकि चवदामा दिनेनो यॆहोवाक कीदप पसा कीदपो मॆनेनिद्। 17 अन्ते आ मॆहनाकि पन्द्रमा दिने पर्बे दिनेद्; सत दिनि अमट गादबलो पिटान मिनोति बॆहिद्। 18 पॆहला दिनेनो पाक तुन्ग़र्पेद् तुन्ग़रान्देद्। आ दिनेनो दिनाने बागु काजेन कुदोमकु। 19 अन्ते नीम यॆहोवाक क़ोसत्र ऎड़व चोव मक़िस बड़दे-मक़ोन, मक़ोन्द मरगो-बेडिन, अन्ते बचेरोन्द टडाबलो सत गोटा बोकड़ा बेडि-मक़ोन हों कीदकु। 20 आव आवेकि दना-ऎड़वपोद् जलपाय इसग़नेत सानयप कटप एड़ु आटाद् मॆनान्देद्; बड़दे लग्कि तीन किलोग्राम अनोन्देन, अन्ते मरगो-बेडि लग्कि किलयिस अनोन्देन; 21 सत गोटा बेडि-मक़ोकि मक़ोन्दोन्द बेडि लग्कि किलयोन्द अनोन्देन, 22 निमकि पापेन-आड ऎड़व लग्कि चुम्बाड़ ऎड़व चोव मक़ोन्द बोकड़ा बेडि-मक़ोन हों कीदकु। 23 दिनाने माक़ोन्द कीदनेर आव आव क़ोसत्र ऎड़वपोन अम्बके अदो ईव ईवेन हों कीदकु। 24 इन्देकेहि सत दिनेनो दिनाने यॆहोवाक अपोकेत्रु चॆञ्य चोव चिचेत कीदप क़ोसत्र ऎड़वपोन कीदकु; दिनाने कीदनेर आ क़ोसत्र ऎड़वपोन अन्ते अदिकि दना-ऎड़वपोन अम्बके अदि इदिन हों कीदोति बॆहिद्। 25 अन्ते सतमा दिनेनो निमे पाक तुन्ग़र्पे मॆनान्देद्; आ दिनेनो दिनाने बागु काजेन कुदोमकु।

क़ोय-पर्बे दिनेकि कीदपो गहन्डिद्

(लेवि २३:१५–२३) 26 कुको-बिजे दिनेनो, नीम पुन दनाकि कीदपोन यॆहोवाकि कीदनेर अदेनो, निमे पाक तुन्ग़र्पे मॆनान्देद्; आ दिनेनो दिनाने बागु काजेन कुदोमकु। 27 अनि नीम यॆहोवाक अपोकेत्रु चॆञ्य चोव क़ोसत्र ऎड़व चोव मक़िस बड़दे-मक़ोन, मक़ोन्द मरगो-बेडिन, अन्ते बचेरोन्द सत गोटा बोकड़ा बेडि-मक़ोन हों कीदकु। 28 आव आवेकि दना-ऎड़वपोद् जलपाय इसग़नेत सानयप कटप एड़ु आटाद् मॆनान्देद्; बड़दे लग्कि तीन किलोग्राम अनोन्देन, अन्ते मरगो-बेडि लग्कि किलयिस अनोन्देन; 29 सत गोटा बेडि-मक़ोकि मक़ोन्दोन्द बेडि लग्कि किलयोन्द अनोन्देन, 30 निमकि पापेन-आड ऎड़व लग्कि मक़ोन्द बोकड़ा बेडि-मक़ोन हों कीदकु। 31 दिनानेकि क़ोसत्र ऎड़वपोन, अदिकि दना-कीदपोन, अन्ते अदिकि ऒन-कीदपोन अम्बकेर नीम अदो ईव ईवेन ईव ईवेकि ऒन-कीदपो मादि कीदकु। ईव ईवेद् टडाबलो मॆनान्देद्।


 *२८:५ ऎपा क़ोयोकि दसनो एन्डोन्देद्।

Shopping Cart
error: Content is protected !!