1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27, 28, 29, 30, 31, 32, 33, 34, 35, 36, 37, 38, 39, 40.
बीतेन जोगयेद्
1 इकेह् गोटे बड़देन बा बेडिन क़डकेह् अदे पिटिह् बा बीसिह् अदेनो, आ क़लुह् आ बड़दे लग्केह् पच गोटा बड़देन, अन्ते आ बेडि लग्केह् चार गोटा बेडिन चियान्देह्। 2 माक़े क़लवेह् अरक़्क़े क़लनो अन्डुव्रकेह् बजुव्रकेह् कॆयिह् तानि, आद् अहि लग्कि क़ेस-अहमानेद् मॆनोमलाद्; 3 जे आ क़लवेह् बेर-अरग क़ॊक़ बजुव्रकेह् कॆयिह् तानि, आद् अहि लग्कि क़ेस-अहमानेद्। क़लवेक क़लवप आक लग्केह् किरत्रोति बॆहिद्; जे अहि बहानो किरत्रोति इन्द्र गोटे बॆहोमलाद् तानि, आह् तान क़डाह् अदि लग्केह् बीसुव्रान्देह्। 4 आह् क़डाह् आ बड़दे बा गदा बा बेडिद् अहि बहानो उजले अन्डुव्रिद् तानि, क़लवेक दोबड़िस चियोति बॆहिद्। 5 इकेह् गोटे केतेनो बा अंगूर बगिचानो तंग्कि रुवेन चरात्रिद् अन्ते ननेकि केतेनो चरारोति ऎलेके चरयत्रिह् तानि, आह् तंग्कि केतेकि अन्ते अंगूर बगिचाकि कटप एड़ु आकेन्ते किरत्रान्देह्। 6 इकेह् गोटे चिचे पकत्रिह् अन्ते आ चिचुद् पक्रकिद् अच-जरेनो अगारिद् अन्दे ननेकि केतेनो पदरु दनान बा क़ोयप दनान क़ोसिद् बा आ केतेद् सालमे क़ोसुव्रिद् अदेनो, आ चिचे पकत्रुह् आ चिचेत मॆनप नुकसान लग्केह् सालमे किरत्रान्देह्। 7 इकेह् गोटे नन क़ॆपो बहानो टकान बा आकेन एड़ुक़नि बॆहत्रोति चिचेके डॊकिह्, अन्ते आद् आ क़ॆपोकि अडान्ते क़लुव्रिद् अदेनो, क़लवेह् दरयुव्रिह् तानि, आ क़लवेह् दोबड़िस किरत्रान्देह्। 8 जुदि आ क़लवेह् दरयुव्रोमलाह् तानि, आ अडाकि मालिकेह् तानहि ननेकि आकेन क़डाह् बा मला अदे आग़ोति लग्केह् गोसाञ्यि* अगदु ओन्दरुव्रान्देह्।
9 ऎवज्प बड़दे, गदा, बेडि, लुगा बा इन्द्र-बॆडि ऎवज्प आकेनो इन्द्र आकेन गोटे ननेह्, ईद् ऎंग्किद् आनकेह् कन्देड़ारिह् तानि, आ इव्रेरकि सबाद् गोसाञ्यि* अगदु ओन्दरुव्रान्देह्। गोसाञ्यिद्* इकेक सजा-उकमेन चियिद् आह् ननेक दोबड़िस चियान्देह्। 10 इकेह् गोटे तंग्कि गदान, बड़देन, बेडिन बा इक नन जानवरेन गोटे एड़ुक़नि डॊकत्रोति चिचेकेह् डॊकनो आद् कॆयिद् बा उड़ारिद् बा क़लवो ओयुव्रिद् अदेनो, 11 आह् तान ननेकि आकेन क़ललाह् आञ्य यॆहोवाकि नामिनो दिबिन ओयिह् आद् आ इव्रेरकि सबान क़चेनिद्; अन्ते रुवेन चिचाह् आह् अदे मानयान्देह्, अन्ते ननेह् किरत्रोमान्देह्। 12 जे आ रुवेद् क़क़ाह् अहि बहान्ते क़लुव्रयाद् तानि, अदे चिचाह् अहिक किरत्रोति बॆहिद्। 13 आ रुवेद् क़व्रो जानवरेत ईसुव्रकिद् पिटुव्रयाद् तानि, अदिकि गोहायिन ओन्द्रोति बॆहिद्; अन्ते ईसुव्रकिद् पिटुव्रयाद् अदि लग्कि किरत्रोति बॆहोमलाद्। 14 इकेह् गोटे नन मलेन्ते इक जानवरेन इरग़रिह् अन्ते अदे चियुह् डॊकोमलनो आद् उड़ारिद् बा कॆयिद् अदेनो, अदे क़क़ुह् चियुक सालमे किरत्रान्देह्। 15 जुदि आ जानवरकि मालिकेह् डोकयाह् तानि, किरत्रोति बॆहेनि मलाद्; अन्ते आद् बाड़ानो क़क़पेद् तानि, बाड़ान दूरेहि चियोति बॆहिद्।
बेवा बागु कुदपोद्
16 इकेह् गोटे जूड़युव्राबलो डॊकु बटगनिन टगचकेह् अदि गुनि कॊडिह् अदेनो, आह् अदि लग्केह् बॆदुव्रु-टकान चिचेकेह् अदिन बॆदान्देह्। 17 जे अदि तम्बाकोह् अदिन अहिक बॆदोति चियोति अम्बिह् तानि, आह् बटगनिरि लग्कि टहरेत्रप बॆदुव्रु-टका नियम चोव अदि तम्बाकोक चियान्देह्। 18 नीन गुनितानिन पिटकु। 19 नेह् गोटे जानवर गुनि कॊड्र नक़िह् आह् पिटुव्रान्देह्। 20 नेह् गोटे यॆहोवान अम्बकेह् अदो नन गोसाञ्यि आनुव्रुरिन जानवरेत ऎड़विह् आह् सालमे क़ॆरमुव्रान्देह्। 21 परि-देसि मलेन ऎतो ननोमकु बा दुक्रेत्रोमकु, नीम गा मिस्र देसिनो परि-देसि मल मॆन्जेकेर डोक्केर। 22 रन्डय पेलिन बा इन्ज-क़देन नीम डग्रहा गड़योमकु। 23 नीम आबेरिन डग्रहा गड़यनेर तानि, आबेर ऎंगेन कूक्रनो, एन आबेरकि कूक्रेन जरुरहि अवडेकिरत्रेन; 24 अन्ते एन ऎसा रॊकारकेन निमेन तड़वारित पिटेन, अन्ते निम डानि बगतेर रन्डियनि-पेल अन्ते निमकि क़देर इन्ज-क़द लॆहारेर।
25 निम मजि डॊकु ऎतो ऎंग मलेरिन्ते इकेक गोटे नीम टकाकि दारेन चिचेकेर तानि, नीम आबेरिन सूदेन ईन्जरु चोव गड़योमा अन्ते आबेरि बहान्ते सूदेन ईन्ज्रोमकु। 26 नीम निमकि क़ॆपो बहान्ते बन्दे ओजोति अहिकि अंगान ओयनेर तानि, नीम अदे अहिक बेर उट्रेन्ते अगदुहि किरत्रकु; 27 इकनिकि आ अंगा दूरेदि से अहिकि गन्डिन बास्रोति बास्रपेद्; आह् अदो इन्द्रेत बास्रकेह् कॊडेह्? अन्ते आह् ऎंगेन कूक्रिह् अदेनो, एन अहिकि सबान मॆनेन, एन गा चॆंग़जतानिन। 28 गोसाञ्यिन डॆंगसेयोमकु, बा निम मलेरकि सरदारेन सरापेयोमकु। 29 निमकि क़ोयेकि निन्दपेन्ते अन्ते महयपोन्ते तुन्दु अंगूर-रसे अन्ते जलपाय इसग़नुन्ते कीदपोन चियोति देरात्रोमकु। निमकि क़देरिनो मेग़रोन ऎंगे चियकु। 30 निमकि रुवे अन्ते बेडिनो हों अन्देकेर मेग़रोन ऎंगे चियकु; मक़ोद् सत दिनि अमट तॆहो गुनि डॊकान्देद्, अन्ते अटमा दिने अदे ऎंगे ऎड़वोति चियकु। 31 नीम ऎंगे पाक मलेर मॆन्जेकेर डॊक्कु; अनि क़व्रो जानवरेत ईसुव्रकिद् पिटुव्रप जानवरेरकि माके मॊक़ोमकु, अन्ते अदे अलेक चूटकु।