1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24, 25, 26, 27, 28, 29, 30, 31, 32, 33, 34, 35, 36, 37, 38, 39, 40.
इब्रानि क़ेग़प-कमक्रेरि पन्तेकि ऎयनेद्
(दोह १५:१२–१८)
1 यॆहोवाद् मूसान अवडयाद्, ईव ईवेद् नीन इस्राएलेरिन मॆन्त्रोति बॆहु ऎयनेद्: 2 नीन इब्रानिरिन्ते ओर्त क़ेग़प-कमक्रेन क़ेग़नो, आह् सो बचेरि अमट निंगेन काजेन कुदेह्, जे सतमा बचेरिनो आह् चोग़ुव्रोति लग्कि इन्द्र गोटे पेसान चियाबलो चोग़ुव्रकेह् एकान्देह्। 3 आह् ओर्तग़े बरचकेह् डॊकिह् तानि, आह् ओर्तग़ेहि उरक़ान्देह्; आह् पेलताव मॆन्जेकेह् बरचकेह् डॊकिह् तानि, अहि डानिद् हों अहि संगाल उरक़ान्देद्! 4 अहि मालिकेह् अहिक ओर्त पेलिन बॆदकेह् चिचाह्, अन्ते आद् अहिक मुड़स बा पेल मक़ेरिन कुन्दत्रकिद् डॊकिद् तानि, आ पेलिद् अन्ते अदि मक़ेर हों अदि मालिके बत्ते मॆनान्देर; आह् ओर्तग़ेहि उरक़ान्देह्। 5 जे आ क़ेग़प-कमक्रेह्, एन ऎंग मालिकेन, ऎंगे डानिन अन्ते ऎंग़ादेरिन हों मड़ मॆनिन, एन चोग़ुव्रकेन उरक़ोति उगलेयेन मला आनिह् तानि, 6 अहि मालिकेह् अहिन गोसाञ्यि क़न-सरि ओयान्देह्, अन्ते अहिन कॆवाड़िक बा कॆवाड़ि-कुटाक ओचेकेह्, अनो अहिकि क़ॆदवे तार-मक़ोत चक़ान्देह्; अदि क़ॊक़ आह् तंग गोट उजेनो तंग मालिकेन काजेन कुद डॊकान्देह्।
7 इकेह् गोटे तंग़ादिन क़ेग़प-कमक्रनि चोव बीसयाह् अदेनो, आद् क़ेग़प-कमक्रेह् चोग़ुव्रकेह् उरक़िह् आ चोव उरक़ोमान्देद्। 8 आद् तंगेन बॆदोति उगेलेयु इकेक गोटे बीसुव्रकिद् तंग मालिकेन आद् अपोकेत्रोमलाद् तानि, आह् अदिन चोग़ुव्रोति चियान्देह्; अहिक अदिन परि-देसि मलेरिक बीसोति अके मलाद्, आह् गा अदिन उगजोबलो गड़चाद्। 9 आह् अदिन तंग़ाद लग्केह् बॆदयाह् तानि, आह् तंग़ादिरिन गड़च सॆंगिह् आ चोव अदिन हों गड़यान्देह्। 10 आह् तानहि आ पेलिन बॆदकेह् अदो नन हों पेलिन बॆदिह् तानि, आह् इदिकि लप, लुगा, बा अगरते डानिकि अकेनो इन्द्रे गोटेन कम ननोमान्देह्। 11 अन्ते आह् ई तीनेन्डा कुदपोन अदिक कुदोमलाह् तानि, आद् चोग़ुव्रोति लग्कि इन्द्र गोटे पेसान चियाबलो, टकान क़क़ाबलो चोग़ुव्रकिद् उरक़ान्देद्।
डपटा काज पन्तेनो ऎयनेद्
12 नेह् गोटे मलेन बजिह् अन्दे आह् कॆयिह् बजुह् जरुरहि पिटुव्रान्देह्। 13 इकेह् गोटे अटेन-ओक्केह् पिटलाह्, जे गोसाञ्यि पावेत तंग्कि टॆटुनो पिटुव्रोति उट्रयाह् तानि, आ पिटुह् बोंग़ अड़सलेह् आ जगेन निम लग्केन एन टहरेत्रेन। 14 जे इकेह् गोटे क़ेस-क़ॆयरकेह् नन मल मॆचे चोचेकेह् टगयेत पिटिह् तानि, आ पिटुन ऎंग्कि ऎड़व-पिन्डाक बोंग़नो गोटे, ओचेके पिटकु। 15 तम्बाको बा तॆहोन बजु नेह् गोटे जरुरहि पिटुव्रान्देह्। 16 नेह् गोटे मलेन क़लवो ओचेकेह् बीसनो हों बा अदो तंग बहानो ओजनो अन्डुव्रिह् आह् जरुरहि पिटुव्रान्देह्। 17 नेह् गोटे तम्बाको बा तॆहोन सरापेयिह् आह् जरुरहि पिटुव्रान्देह्! 18 मलेर कन्देड़ारकेर, ओर्तेह् ननेन चाच इन्हेत बा गुतयेत बजिह् अन्दे बजुव्रुह् कॆयलाह् अन्ते गोटे, काटिनो चॊटवारकेह् कॊडिह्, 19 जे आह् नॆक्रारकेह् पिने दरचकेह् दुवारिनो चरयिह् अदेनो, बजुह् सजा-उकमेन्ते बाचारकेह् डॊकिह्; अन्ते गोटे, आह् बजुव्रुक पहरान ऎवत्रपे लग्केह् पेसान चियान्देह् अन्ते अहिन सालमे नॆकत्रान्देह्। 20 इकेह् गोटे तंग क़ेग़प-कमक्रेन बा क़ेग़प-कमक्रनिन पिनेत बजिह् अन्ते आ क़ेग़प-कमक्रेर तुरत कॆयनेर अदेनो, आ मालिकेह् सजा ननुव्रान्देह्। 21 जे बजुव्रु क़ेग़प-कमक्रेर दिनोन्द बा दिनिस उज डॊकनेर तानि, अहिक सजाद् मला; आबेर गा आ मालिकेकि बीतेर।
22 मलेर कन्देड़ारकेर गन्डितानि पेलिन बजनो आद् अद-कच्रा मक़ेन कुन्दत्रिद्, अन्ते अदो नन चॊटे मॆनोमलाद् अदेनो, बजुव्रु पेलिकि डावेह् बजुकि मांग जोकेर अन्ते सबान-आदुरकि विचार चोव डन्डय टकान चियान्देह्। 23 अन्ते अदो इन्द्र-बॆडि चॊटेद् मॆननो, उज लग्कि उजेन चियकु, 24 क़नु लग्कि क़नुद्, पलु लग्कि पलुद्, टॆटु लग्कि टॆटुद्, क़ॆडु लग्किद् क़ॆडुद्, 25 क़ोसे लग्कि क़ोसेद्, उड़ार्पे लग्कि उड़ार्पेद्, कुड़ लग्कि कुड़ेद्। 26 इकेह् गोटे तंग्कि क़ेग़प-कमक्रेकि क़ने बा क़ेग़प-कमक्रनिकि क़ने बजकेह् अदे डग्रेत्रिह् अदेनो, आह् आ डग्रेत्रप क़न लग्केह् बजुव्रुन चोग़ान्देह्। 27 आह् तंग्कि क़ेग़प-कमक्रेकि पले बा क़ेग़प-कमक्रनिकि पले बजकेह् अदे ओत्रिह् अदेनो, आह् आ ओत्रप पलु लग्केह् बजुव्रुन चोग़ान्देह्।
बीत पन्तेनो ऎयनेद्
28 बड़देद् मलेन बा मलनिन मुगडकिद् कॆयत्रिद् अदेनो, आ बड़देद् चाचेत इन्ज पिटुव्रान्देद्, अन्ते अदिकि माकुद् मॊक़ुव्रेनि मलाद्; जे आ बड़देकि मालिकेह् सजान क़क़ जोकेर मॆने मलाह्। 29 जे आ बड़देद् मुगड सॆंग एकयाद् अन्ते अदिकि मालिकेह् अदि पन्तेनो चिलुव्रयाह् जे आह् आ बड़देन चोन्जकेह् डोकत्रलाह्, अन्ते आद् मलेन बा मलनिन पिटिद् तानि, आ बड़देद् चाचेत इन्ज पिटुव्रान्देद्, अन्ते अदिकि मालिकेह् हों पिटुव्रान्देह्। 30 आ मालिकेक डन्डय टकान चियोति सबा-आदुव्रिद् तानि, आह् तंग्कि उजेन चोग़ोति डन्डय टकान चरे चोव चियान्देह्। 31 आ बड़देद् इके गोटेकि मुड़स मक़ेन बा पेल मक़ेन मुगडकिद् कॆयत्रिद् तानि, अदिकि मालिकेक आ जतयोक़दि नियमेति से कुदुव्रान्देद्। 32 आ बड़देद् क़ेग़प-कमक्रेन बा क़ेग़प-कमक्रनिन मुगडकिद् कॆयत्रिद् तानि, अदिकि मालिकेह् आ क़ेग़प-कमक्रे बा क़ेग़प-कमक्रनिकि मालिकेक ३४२ ग्राम* रुपान चियान्देह्, अन्ते आ बड़देद् चाचेत इन्ज पिटुव्रान्देद्। 33 इकेह् गोटे दरिन अरक़्क़ेह् कोलर्पे बॆहत्रिह्, बा दरिन अरक़्क़ेह् उटाबलो अम्बिह्, अन्ते बड़देद् बा गदाद् आ दरिनो उट्रिद् तानि, 34 आ दरिकि मालिकेह् उट्रप जानवर लग्केह् अदिकि दामेन अदिकि मालिकेक चियान्देह्, जे आ कॆयप जानवरेन तानहि ओजान्देह्। 35 इके गोटेकि बड़देद् नन मलेकि बड़देन मुगडिद् अन्दे मुगडुव्रप बड़देद् कॆयिद् तानि, आबेर उज डॊकु बड़देन बीसान्देर अन्ते क़क़प पेसान चाग्र नक़ान्देर; अन्ते कॆयप जानवरेन हों चाग्र नक़ान्देर। 36 जे आ बड़देद् अगदु मुगड सॆंग एकयाद् अदे अदिकि मालिकेह् आग़िह्, अन्ते गोटे आह् आ बड़देन चोन्जकेह् डोकत्रलाह् तानि, आ बड़देकि मालिकेह् बड़दे लग्केह् बड़देन किरत्रान्देह्, जे आह् कॆयप जानवरेन तानहि ओजान्देह्।