2026 – वि बि एस पाटेद्
वि बि एस चामे 2026
| दिन | मूल सबाद् | मनन वचनेद् | बाइबिल पाटेद् | मिसनरि क़ेरि | आसोल दिनेद् | चामे सिकात्रपोद् | ||
| जॆजुव्र दिनेद् | गोसाञ्यि बहाक किरा | हॊसे 6:1 | जॆजुव्र दिने | सुम्ब्रार चामे अन्ते मूल चामे | ||||
| दिन 1 | पोदक़लो उगलित किरा | याक़ूबे 4:10 | यूना 1:1-3 | जेम्स ब्रेसर | सुम्ब्रार दिने | मनन वचन चामे, दिन 1 चामे | ||
| दिन 2 | गड़यान्ते किरा | रॊमिरि 12:11 | यूना 1:4-6 | एमि कारमेकिल | मेन्जग़रेन जोगय दिने | मनन वचन चामे, दिन 2 चामे | ||
| दिन 3 | गोसाञ्यि अडाक किरा | यूना 2:4 | यूना 1:7न्ते 2:10 | राबर्ट रैक्स | सुगि अन्ते सपा बॆहत्र दिने | मनन वचन चामे, दिन 3 चामे | ||
| दिन 4 | बीकुव्रपेक किरा | मलाकि 3:7 | यूना 3:1-4 | बिसाप ऎस्रा सरगुनम | बारात देसि | मनन वचन चामे, दिन 4 चामे | ||
| दिन 5 | डग्रहान्ते किरा | तॆयुव्रुरकि 3:19 | यूना 3:5-10 | कारल पेकारो | डयोसिस दिने | मनन वचन चामे, दिन 5 चामे।, अंगोचार चामे | ||
| दिन 6 | आड़ग़रेन्ते किरा | 2 अवाल गहन्डि 7:14 | यूना 4:1-8 | दुलेलि बोजेद् | ||||
| दिन 7 | मॆन्त्रोति किरा | यॆरेमिया 15:19 | यूना 4:10-11 | जांचेकि सपड़ारेद् | ||||
मूल सबाद्: गोसाञ्यि बहाक किरा
मूल सबान सिकात्र पहरा काजेक ओन्द्रपो सबाद्
मूल वचनेद्: लॆगा नाम यॆहोवा बहाक किरेत। हॊसे 6:1
(वि बि एस जॆजुव्र दिनेनो मूल सबान मक़ेरिन सिकात्र पहरा काजेक ओन्द्रोति बॆहु सबाद्)
गोसाञ्यिद् तमकि मलेरिन दुलेलेत्रिद् अन्ते गोट जोगेनो हों आ दुलेलिन एदिद् आञ्य बाइबिलेद् नमे सिकात्रिद्। गोसाञ्यिद् मड़ मॆनेद् आलग्कि तान मड़ मॆनिद् आबेरिन ऎवत्रोति उगलेयोलाद्। तान मड़ मॆनिद् आ मलेर तंगेन अम्बके गॆचे एक पहरा आबेर तंग बहाक किरोति कापे डॊकिद्, तंग बहाक किरोति बीकिद्, अन्ते आबेरिन बॆदकिद् एकिद् हों। अन्ते तंग्कि मलेर उगलिन किरत्रेर अदेनो आबेरिन गिनाराबलो, पाकननकिद्, अन्ते ईन्ज्रिद्। ई चोव दुलेलि गोसाञ्यिन नाम बाइबिलेनो टुन्डित। ई चोव गुन तानि नमकि गोसाञ्यिद्, गॆचे एकयार आ इस्राएल मलेरिन अदो नन्दु हों तंग बहाक किरोति हॊसे नबि पावा बीकयाद्, “ “लॆगा नाम यॆहोवा बहाक किरेत” (हॊसे 6:1)। ई पड़लाद् हि नमकि 2026 वि बि एसेकि मूल सबाद् लग्कि आदपेद्। मूल सबाद् “गोसाञ्यि बहाक किरा”। अंग्रेजिनो सड़केकि चिन्नानो बॆहु “U Turn” किरेकि पन्तेनो नमे अदो एड़ु बुजात्रेनिद्।
उकमेद्
“गुमेनारा” आञ्य बॆहु ई सब्देनो, गोसाञ्यिकि इयहेत्रप सबान बा उकमेन बुजयोति पारयित। पचे नियमेकि नबिर पावा तमकि मलेरिन गुमेनारोति मॆनिद् आञ्य उकमेन चिचाद् अन्ते अदे मान्योलार तानि आड़ग़रेद् बॆहिद् आञ्य हों गोसाञ्यिद् मलेरिन आग़त्रियाद्। पुने नियमेनो योहन्ना बपतिस्मेयु अन्ते ईसु मसि हों तमकि प्रचार-काजेनो गुमेनारा (मति 3:2; 4:17) आञ्य प्रचार ननयार। गुमेनाराबलो, क़न्जाबलो डोकुरिन आडोति मासुद् अन्ते चिचुद् ओरयारकिद् कॊडिद्। आलग्कि क़ेक़ल बागु क़न्जाबलो उजेन्ते गुमेनारकेर, गोसाञ्यि बहाक किरोति मॆनिद्।
मोकाद्
पापेन कुदकेर तंग बहान्ते तीरकेर एकु तंग्कि मलेरिन, गोसाञ्यि ओकड़ि सजान चियोलाद्। अदि बहान्ते चुरग़ु निन्दप दुलेलित, तंग्कि मलेरिक किरकेर बरोति अदो नन्दु मोकान चियिद्। पाप उजेक तमेन सोपचकेर डोकुर गोटेरिन इयेहेत्रिद्। अन्ते आ इयेहेत्रप सड़िन मॆन्जेकेर गुमेनारकेर उगलिन किरत्रनो अदो नन्दु मोकाद् चियुव्रिद्। कहावते 28:13 कुर्कप सबा चोव “तंग्कि पापेन नुडु नेह् गोटे तनयारेह् मला, जे अदे कबुलारकेह् अम्बिह् आह् चॆंग़जेन क़क़ेह्।“ गा बाइबिलेनो अवड ओजप सबाद्। ई चोव गोसाञ्यिकि चॆंग़जेन क़क़ोति उगलेयुर जरुर गोसाञ्यि बहाक किरोति मॆनिद्।
आसिकेद्
गोसाञ्यि चियिद् आ गोट आसिकेद् अदानिबलोद्। जे अदे ईन्ज्रोति तानु अदि संगाल कुदोति बॆहु नियमेन हों पूरात्रोति मॆनिद्। गोसाञ्यिकि कोलग़रेनो गोटेरि डोकोति मॆनिद् आलग्कि तान क़दक़ोडयाद् अदि संगाल मलेर कुदोति मॆनिद् आ नियमेन हों चिचाद्। नियमेन पूरात्रोलार आबेरिक गोसाञ्यिद् आसिकेन हों चियोलाद्। जे अदे ईन्ज्रोति उगलेयुर अदिन आस्रारकेर अदि बहाक किरनो दूरे आ आसिकेद् चियुव्रेनिद् आञ्य पावे मेन्जपेद्। ई पावनो एकोति उगलेयुर गोसाञ्यित आसिकेन ईन्ज्रोति गुमेनारोति बा गोसाञ्यि बहाक किरोति हि मॆनिद्।
गोसाञ्यि बहाक किरोति नमकि कलीसियाकि मक़ेरिन सिकात्रोति मॆनिद्। आलग्कि पचे नियमेन्ते ओर्त नबिकि उजे पावा सिकात्रनो एड़ु मॆनेनिद्। अहिकि नामिद् यूना, आह् गोसाञ्यिकि मड़ेन पूरात्रोति उगलेयाबलो, नीनेवे एकोति मॆन्जाद् अदे अम्बकेह् आह् तर्सीसेक एकोति ननया अदेनो यूनाक उगलिन किरत्रोति जक़्रो मॆन्जाद्। नीनेवे देसि मलेर मॆन्त्रप सबान मॆन्जेकेर तमकि पापेन्ते गुमेनारकेर, गोसाञ्यि बहाक किरोति उगलिन किरत्रोति जक़्रो मॆन्जाद्। बाचारपेरिन टुन्डकेह् अपोकाराबलो डोकु यूनाक, तंग्कि रॊकेन अम्बकेह् गोसाञ्यिकि दॆया नुन्जेन बुजारोति अदो केपोन्द उगलिन किरत्रोति जक़्रो मॆन्जाद्। आलग्कि यूनाकि उजेनो मॆन्जाद् आ अवालेन्ते सत दिने सतेन्डा मूल सबात सिकारु मक़ेर जरुर गोसाञ्यि बहाक किरेकि पन्तेनो ऎसा एड़ु सिकारेर। 2026 वि बि एस पावा अदेसि मक़ेरिन प्रबु ईसु मसि लग्कि जीतयेत। गोसाञ्यि निमेन आसिक ननान्देद्।
दिने 1 – पोदक़लो उगलित किरा
बाइबिल पाटेद्: यूना 1:1-3
मनन वचनेद्: प्रबु बहानो पोदक़लो उगलिताव मॆना अन्दे आद् निमेन मॆचग ननेनिद्। याक़ूबे 4:10
जॆजुव्र सबाद्
इक मलेन/मलनिन गोटे गोसाञ्यिद् सबा-कता बलो मेन्जोलाद्। तॆहोकि कोचोनो लॆहारेन्ते अगद हि ओर्तोनोन्देरि पन्तेनो गोसाञ्यिद् एन्डोन्द सबा-कतान बॆहत्रिह्। यूना 1:3 नमेन सिकात्रि आ चोव, नाम गोसाञ्यि बहान्ते एनोन्द गॆचे एकति कुरुमुट नननो गोटे, तान सबा-कता ननयाद् आ पावनो नमेन ओन्द्रोति गोसाञ्यिद् कुरमुट ननिद्। नाम पोदक़लो उगलि मॆन्जेकेत अदि बहाक किर पहरा, सहि पावनो सगा ओयोति कापा डॊकिद्। अनेके नाम गोसाञ्यि बहानो पोदक़लो उगलित किर पाव गहन्डिन सिकारेत।
1. गोसाञ्यि बहान्ते तीरनो गोटे गोसाञ्यिकि मड़ेन पूरात्रोति पोदक़लो उगलित किरा
यूना 1:3नेनो गोसाञ्यिकि नबि यूना, नीनेवेक एक्के अनो डॊकु मलेरिन गुमेनेत्रोति सबान मॆन्त्रोति गोसाञ्यिकि उकमेन अक़्क़े गोटे अदे अम्बोति उगलेचाह्। गोसाञ्यि बहान्ते तीरकेह् तर्सीसेक एकोति सबा-कता ननयाह्। यूना गोसाञ्यि बहान्ते बोंग़नो गोटे तंग बहाक बरोति गोसाञ्यि यूनान बीकिद्। चामे 139:7-10 पड़ला गहन्डिनो, “एन निंगेन्ते बोंग़ोति इकेनो एकोति पारयिन? अन्ते एन निंग अगदुन्ते इकोनो तीरोति पारयिन?” आञ्य दाऊदे अवडि आ चोव, यूनाकि ई चलारेनो एत्रिद्। नाम गोसाञ्यिकि उपस्तितिन्ते अम्बकेत एकनो गोटे, नमकि उजेनो गोसाञ्यिकि बीकुव्रेद् अन्ते अदिकि मड़ेद् बदलारलेनिद् आञ्य एदिद्। अदिकि मड़ेन पूरात्रोति पोदक़लो उगलित सोपयेद् हि नमकि जिमाद्।
2. बीचेनो अम्बके बोंग़नो गोटे गोसाञ्यिकि सगा ओयेक पोदक़लो उगलित किरा
यूना 1:3नेनो, यूना ओकड़ि अन्ते गोट उगलित गोसाञ्यिकि उकमेन्ते तीरके, नीनेवेक अड़साबलो तर्सीसेक बोंग़ोति अदयाह्। अहिकि अकबकारेद्, ओत काजेकि जिमानो सदारन मलेर सोचयनेर आ चोव सोचयेन एदिद्। यूनाकि अम्बके बोंग़ेद् गन्डि बागु दूरे मला जे गोसाञ्यिकि मड़ेन गिनारेन एदिद्। ईद् क़ड़ग़रेक अन्ते जवालेक दूरे अड़सत्रेनिद्। ओड़ेनो यूना तंगेन पोदक़लो ननले गोसाञ्यि बहाक किरया आ चोव, नाम हों नमकि उजेनो गोसाञ्यिकि मड़ेन पूरात्रोति पोदक़लो उगलित सोपयोति मॆनिद्। कहावते 3:5-6 “निंग्कि गोट उगलित यॆहोवान आस्रारा, अन्ते निंग्कि बुजयेनि आस्रारोमा। निंग्कि गोट पावनो यॆहोवान उगलेया, अन्ते आद् निंग्कि पावे सरयेत्रेनिद्।“ ई पड़ला चोव नाम गोसाञ्यिन आस्रारले पोदक़लो उगलित अदि बहाक किर पहरा आद् नमेन सगा ओयेनिद् अन्ते नमकि पावे सरयेत्रेनिद्।
3. जोकेर बलो पावनो एकनो गोटे गोसाञ्यिकि चॆंग़जेन ईन्ज्रोति पोदक़लो उगलित किरा
यूना 1:3नेनो, यूना तर्सीसेक एकोति सुरु ननयाह्। ईद् गोसाञ्यिकि मड़ेन्ते तीरके गेचे बोंग़ु पावुद्। आह् चुन्चाह् ई पावुद् जोकेरबलो पावुद्। अन्ते ई चोव जोकेरबलो पावुद् नमकि उजेनो गोसाञ्यिकि सबा-कतान्ते तीरकेत नाम कुदु गलतिन एदिद्। गड़हि पहरानो ईद् ऎलचेत, तोकमोकारेत, अन्ते गोसाञ्यिकि सबा-कतान एड़ु बुजाराबलोत मॆनिद्।
यूना गोसाञ्यिकि चॆंग़जेक सोपचा आलग्कि, गोसाञ्यिकि दूस्रा मोकाद् अहेन नन्दु सहि पावनो ओन्द्रियाद्। चामे 23:3 “आद् ऎंग परानिन बड़येत्रिद्। आद् ऎंगेन तंग्कि नामि लग्कि दर्म पावनो सगा ओयिद्।“ नाम तीरकेत आ पावुद् एनोन्द डेरो मॆन्नो गोटे, गोसाञ्यिकि चॆंग़जेक पोदक़लो उगलित किर पहरा, आद् नमेन तंग्कि पावनो नन्दु ओचेकिद् सगारोति ओरयारकिद् डोकिद्।
ओंग्र सबाद्
गोसाञ्यिकि मड़ेक, सगा ओयेक, चॆंग़जेक पोदक़लो उगलित किरेत। गोसाञ्यिद् नमेन मेन्जयाद् अन्ते आद् नमेन ई क़ेक़लनो इन्द्रिक डोकत्रिद्? अन्ते अदिकि मड़ेद् इन्द्रुद्? लॆगा नाम गोसाञ्यिकि मड़ेन बुजारकेत उजत अन्ते गोसाञ्यिकि बिडयेन ओन्द्रेत।
दिन 1 – यूना हितिहास
चित्र 1 –यूना नबि मॆन्जाह् अन्ते इस्राएल देसिनो गोसाञ्यि सबान मॆन्त्र डॊकयाह्। पापेन्ते गुमेनारा आञ्य मॆन्त्र सॆंगयाह्।
चित्र 2 – दिनोन्द गोसाञ्यिद् यूना नबि गुनि क़ाव्र नक़ा। यॆहोवाद् अहिन अवडयाद्, नीन चोचेके बॆडो सहरे नीनेवेक काला, अन्ते अदिकि विरुदनो सबान मॆन्त्रोका; इकनिकि आबेरकि डग्रहाद् ऎंग अगदु अड़सयाद्।
चित्र 3 – ई नकसाद् इस्राएल देसि अन्ते नीनेवे सहरे इकेनो ओकिद् अदे एदिद्। नीनेवे असूर राजिकि एन्डोन्द मोटो सहरे मॆन्जाद्। यूना केड़ेत नीनेवेक एकोति मॆन्जाद्। नीनेवे सहरेद् बॆडो गाड़े सहरे मॆन्जाद्। (यूना 3:3) अन्ते आ सहरेद् टिगरिस आनुव्र मोटो नदि बिटेनो बॆचाद्।
चित्र 4 – नीनेवे सहरेनो डोकु मलेर पापेनो बड़ार एकयार। मल पिटेद्, बजे-नक़ेद्, क़ेसे तुन्देद् ईव ईव पापेनो बड़ार एकयार। (नाहुम 2:3; 3:1,3)
चित्र 5 – नीनेवेकि मलेर लंगवि पापेनो बड़ार एकयार। (नाहुम 3:4)
चित्र 6 – नीनेवेकि राजा इस्राएल मलेर गुनि राड मॆन्जेके डॊकयाह्। तंग्कि राजिन बड़ात्रोति इस्राएल देसि गुनि लड़ायारोति सोचले डॊकयाह्।
चित्र 7 – इस्राएञल देसि मलेर आसूर देसिकि मलेरिन ऎलच बड़ारयार। नीनेवे असूर देसिकि सहरे मॆन्जाद्।
चित्र 8 – इस्राएल देसि मलेर उगजो गोसाञ्यिन एड़वे डॊ)कयार।
चित्र 9 – नीनेकि मलेर मूरतिन एड़वे डॊकयार। आ लग्कि आबेर चेडात निन्दपेर मॆन्जार।
चित्र 10 –यूना नबि नीनेवेक एकोति एलचया अको बा सबान तॆंगनो आबेर गुमेनारेर अन्ते गोसाञ्यि आबेरिन माप ननेनिद् आञ्य सोचया अको आलग्कि गोसाञ्यिकि क़न-सरिन्ते बोंग़ोति तर्सीस एकोति सपड़ारक समद्र बिटेनो ओकु योप्पा सहरेक एकयाह्।
चित्र 11 – योप्पा सहरेन्ते बॆडो समुद्रेनो तर्सीसेक एकोति उगलेचले गोसाञ्यि अवडयाद् आ नीनेवे सहरेक एकोति अम्बके उलटा पावे एकयाह्।
चित्र 12 – तर्सीसेक एकु अम जाहाजेनो टिकेटेन क़ेग़ले (कन्दानेन चिचले) अरगयाह्।
दिन 1 – मिसनरि हितिहासेद्
जेम्स ब्रेसर (1886-1938)
जॆजुव्र सबाद्
मोका बरान्दे आञ्य कापा डोकेद् गा सॆतानेकि टाकयेनो एन्डोन्देद्। दिनेनि काजेन गोसाञ्यिकि ऎलचेत पूरात्रियाह् अन्ते ई क़ेक़लनो ईह् उजयाह् आञ्य नामिन किदेके हितिहासेन मेन्जोति मॆनिद् आञ्य सिकात्रेद्।
मक़ पहराद्:
1886मा बचेरिनो लन्डन सहरेनो मसि परिवारेनो जेम्स कुन्दयाह्। इहेकि तॆहो-तम्बाकोर इहेन मसि उजेनो पद्रत्रयार। आह् कजाक पड़चाह् अन्ते स्कूल पड़ायिनो गोट लन्डन सहरेकि ऎसा एड़ु पड़ुयु मक़ेरिनो ईह् हों ओर्त मॆन्जेकेह् उरक़ाह्। लन्डनेकि इमपीरियल कोलेजेनो 1906मा बचेरिनो इन्जिनियरिंग पड़च डोकयाह्। जेम्स केसयो पिन्डत्रु मॆन्जाह्, आलग्कि मक़ पहरन्ते हि मिटिंगेनो केसयोन पिन्डत्र सॆंगयाह्। गोसाञ्यिन ऎलचु तॆहोद् तंग्कि 5 जॆन मक़ेरिनो नेकेन गोटे ओर्तेन मिसनरि काजेक तॆयोति उगलेचाह् अन्ते अदि लग्कि कजाक सुम्ब्रार डॊकयाह्।
“आञ्य अवडोमा”
ऎसा एड़ु इन्जिनियर बनारोति जेम्स उगलेच डोकयाह्। तान उगलेच डोकयाह् आ चोव हि कोलेजेनो एड़ु नम्बरेन क़क़्क़े उरक़ाह्।
तंग्कि दंग़ड़ियाह् पहरनो “आञ्य अवडोमा” आञ्य नामि तानि एन्डोन्द किताबेद् क़क़ुव्रियाह्। आ किताबेन चीन देसिनो मिसनरि काजेन कुदु ओर्त मिसनरि आ किताबेन कुर्कयाह्। आ किताबेनो मिसनरि काजेकि दाम तानि पन्तेनो कुर्कपे मॆन्जाद्। ईसु मसि कुन्दयाह् अदि क़ोक़ 2000 बचेरि क़टनो गोटे ईसु मसिन आग़ाबलोर ई क़ेक़लऩो डॊकनेर, ई चोवेर ईसु मसिन आग़ोति पाद्रिरकि, मिसनरिरकि काजेद् आञ्य अवडोमा आञ्य आ किताबेनो कुर्कपे बॆच्चाद्। मिसनरिरकि उजे अन्ते मसि कलीसियाकि इतहासेन उगलि बिच्रले पड़योति जॆजयाह्। चीन देसिनो मिसनरि काजेन जॆजकेह् अनो एन्डोन्द संस्तान जॆजयाह् आह् हेटसन टेयलर उजेकि इतिहासेन किताब पावा आग़ोति जॆजयाह्। अपोकार सबान मॆन्त्र काजेकि पन्तेनो कीड़ेद् अहिकि उगलिन उटाद्।
दिनोन्द तंग्कि अडाकि मॆचति कोटलिनो सुम्ब्रार डोकयाह् अदेनो, चीन देसि मलेर लग्कि उगलिनो कजाक दुक्रारयाह् अन्ते तंगेन गोसाञ्यि काजे लग्कि सोपचाह्। सुम्ब्रार क़ोक़ गोसाञ्यि काजे लग्कि सोपचकेन आञ्य तॆहो बहानो अपोकारले तॆंग़ाह्। तॆहो आनि ब्रेसर हों तंग्कि गड़ दिनेकि सुम्ब्रारेन गोसाञ्यिद् मॆन्जाद् आञ्य गोसाञ्यिन पोग़ोलेत्रयाद्।
गोसाञ्यिकि काजे लग्कि उरक़ेद्
जेम्स ब्रेसर गोसाञ्यि काजे लग्कि उरक़ोति हों तारिक ननयार। बिदा ननोति जेम्स तॆहो आनि ब्रेसर अन्ते तंग़डो मिल्लि सन्डे हों बरचार। आबेर नन्दु बेटार नक़ोति गड़ बचेरि लगेनिद् अन्ते चिटि कुर्कनो हों अड़सोति गड़हि मॆहना लगेनिद् आञ्य हों अक़्क़ार। अन्ते गोटे आनि ब्रेसर गोसाञ्यिन पत्यारकिद् गॆचे देसिक गोसाञ्यि काजे लग्कि तंग़ादेन तॆयाद्। दुलेलि जेम्स एन इने ई लन्डन सहरेनो गोटेरिन्ते कजाक अपोकारकि डोकु मलनि मॆन्जेकेन डॊकिन आञ्य आनि ब्रेसरे कुर्किद् चिचा आ चिटिन जेम्स तंग्कि दोकड़िनो जोगचले बॆहत्रयाह्।
लीसु मसिरिन बॆटारोति सपड़ारेद्
चीन देसिनो बरमा देसिकि सिमा अटगे डेंगुवे आनुव्रु जोका सहरेनो अहिकि गोसाञ्यि काजेद् सुरु मॆन्जाद्। अनो 6 मॆहना चीन सबान सिकारयाह्। चीन सबानो प्रचार ननोति हों पारयले आनोन्द सिकायाह्। अन्ते लीस जाति मलेरि मजि काजेन कुदोति अनो एकोति ओरयारयाह्। मोका क़क़ुव्रिद् आनोन्द अमट क़ापा डोकेद् सॆयतानेकि टाकयेनो एन्डोन्देद्। गोसाञ्यि काजे लग्कि मोकान क़ापे डोकोति बाइबिलेद् नमेन इकोन्नो गोटे सिकात्रोलाद्, क़क़ुव्रि आ काजेन कुदोति हि उकम ननिद् आञ्य जेम्स ब्रेसर तग्कि डयरिनो कुर्के बॆहत्रियाह्। लीस मलेर डोक जगेक एकोति जॆजया अदेनो जेम्सेकि उम्रेद् 22 दूरे मॆन्जाद्। गड़ दिनि क़ोक़ बावोसान अटगि बॆहु टॊक गहन्डिक अड़सयाह्। आ जगेनो लाकोन्देन्ते बेसि लीस मलेर डोके सॆंगयार। ईबेर केपोन्द गोटे ईसु मसिकि अपोकार सबान मॆनोलार। इक मिसनरिर गोटे अनो अड़सोलार।
तिगे मलेर
लीस आदिवासि मलेर टॊक अरग पावनो डोके सॆंगयार आलग्कि सीन देसि मलेर ईबेरिन तिगे मलेर आञ्य बीकयार। जे ईबेर सीन देसिकि आदिवासि मलेर आञ्य इतिहासेद् अवडिद्। मंगोलिया मलेर लड़यनो जीतचार अदेनो ईबेर चीन देसिकि टॊकेक अक्रुव्रियार। जेम्स गोटेन्ते अगदु ईबेरकि सबान सिकारयाह् अन्ते आबेरकि सबानो अपोकार सबान तॆंग़ोति जॆजयाह्।
पॆहला बपतिस्मा गिरजाद्
1913मा बचेरि एप्रेल मॆहना 20 तारिकेनो डेंगुवे आनुव्रु जरना अटगि तंग्कि पॆहला बापतिस्मा गिरजान चलात्रयाह्। अदेनो तंग्कि जागु बितु, सिकात्रु, अमे चेन्दु टास बया हों बापतिस्मान ईन्ज्रयार।
गोट अवालेनो बरतारले डोकेद्
ब्रेसर आबेरकि लपे मोकेनो, चुये अतेनो, अन्ते आबेरकि दस्तूरेनो हों सिकारयाह् अन्ते अदि पावा आबेर गुनि संगालिन बड़येत्रयाह्। ताम एड़वे डोकयार अदे अम्बकेर ईसु मसिन ईन्ज्रयार। जड़ा पहरानो, पन्य पहरानो माक़ा गोडो, क़ेरु, किसु ईव ईवेद् अडानो हि डोकत्रयार। इ मादि हि जागुन लपोति मॆनिद्। एन कुसु अडानो हों अपोकारले डोकोति पारयिन आञ्य ब्रेसर अवडयाह्।
गोसाञ्यि काजेद् अन्ते परिवारेद्
ब्रेसर तंग्कि काजे पावे 129 परिवारेकि 600 न्ते बेसि मलेरिन मसि लग्कि जीतयोति पारचाह्। माटिलट टॊकेनो पाडोन्द गिरजा अडाद् हों इदग़रयाद्। लीस सबानो बाइबिलेन अनुवाद ननोति जॆजयाह् अन्ते मरकुस, योहन्नाकि अपोकार सबान अगदु अनुवाद ननयाह्। गड़हि अपोकार सबान मॆन्त्रुरिन लीस जातिन्ते जॆजयाह् अन्ते आबेरकि ट्रेनिंगेन हों चिचाह्। तंग्कि 43मा उम्रेनो (1929 बचेरि) गोसाञ्यि काजेन कुदु प्राक्सटयमन्ड ओड़गेरकि तंग़ादि राकसिन बिहा ननयाह्। ईबेर परिवार मॆन्जेकेर गोसाञ्यि काजेन कुदयार। गोसाञ्यिद् ईबेरिन केतरिन, एयलिन नामि इव्र पॆल मक़ेरिन चिचेकिद् आसिक ननयाद्।
तॆहोक कुर्कयाह् आ आक्रि चिटिद्
एन बाइबिलेन अनुवाद् नन काजेन, बाइबिल प्रचारेन हों मड़ मॆनिन आञ्य तंग तॆहोक तॆया आ चिटिनो कुर्केयाह्। कुक नामि ओर्त बयाकि संगाल लीस सबानो गोट पुने नियमेन अनुवाद नन ओंगकेन आञ्य हों कुर्कयाह्।
अचकायि जेम्स ब्रेसरेन मलेरिया बिमारि दरचाद्। जेम्स ब्रेसर अदे क़ेस जांच मॆनेन्ते अगदहि ब्रेन मलेरिया मॆन्जेकिद् दू दिनि कजाक मेद कोरचा अन्ते जवालारयाह्। बेहोस मॆन्जाह्, 1938, सितम्बर 25 तारिकेनो जेम्स तंग्कि 52 उम्रेनो ई क़ेक़लकि उजेन अम्बके तान मड़ मॆन्जा आ गोसाञ्यिकि कोलग़रिक पटयारोति एकयाह्।
सोचयोति
अडान मेन्जु इन्ज्रिनियर तंग्कि डिग्रिन पूरात्रकेह् गोसाञ्यि बाहाक किरया अदेनो पापेनो चोन्जुव्रप लीस मलेरिन चोग़ोति गोसाञ्यिद् अहेन काजेक ओन्द्रियाद् अन्ते अनो गोसाञ्यिकि राजिन मेन्जोति इन्ज्रिनियार बनारयाह्। आह् अनुवाद ननयाह् आ बाइबिलेद् हि अनेके अमट लीस मलेरिन गोसाञ्यिन आग़ोति सगाबॆयिद्। निंगेनो इनोरति जेम्स ब्रेसरेन टुन्डोति गोसाञ्यिद् क़ापा डोकिद्।
वि बि एस चामे 2026
दिन 2 – गडयान्ते किरा
बाइबिल पाटेद्: यूना 1:4-6
मनन वचनेद्: अन्ते काजेनो पन्यहा मॆनोमा, जे उमिगुमि मॆना; निमकि गोट उगलित प्रबुन सेवच डॊका। रॊमिरि 12:11
मनन वचनेन सिकात्र पदिद्:
जॆजुव्र सबाद्:
इस्राएल देसिनो यूना नामि ओर्त नबि डॊकयाह्। नीनेवे आनुव्रु मोटो सहरेन आड़ोति इयहेत्रप सबान यूना नबि पावा तॆयोति गोसाञ्यिद् उगलेचाद्। जे यूना नीनेवे सहरेन ऎलचले अन्ते एकोति तोकमोकारले गोसाञ्यिकि बीकुव्रेन्ते तीरके एकोति सबा-कता ननयाह्। नीनेवेक एकला तर्सीस आनुव्र सहरेक एकोति उगलेचेके अम जाजेत एके डॊकयाह्। ई नीनेवे सहरेद्, आ पहराकि मेसोपोटोमिया इनोरति ईराकेनो बॆच्चाद्। ई सहरेकि सामने तर्सीस सहरेद् इनोरति लेबनोन देसिनो बॆच्चाद्।
आह् बॆडो सम्द्रेनो अम जाजेत एके डोकयाह्। आ बॆडो सम्द्रेद् कजाक अपोलारयाद् अन्ते जहाजेन बजयाद्। अम जहाजेन चलात्रु मूला जहाजेनो डॊकु मलेरकि उजेन बाचात्रोति कजाक कुरुमुट ननयाह्।
ई चोव जवालेनो यूना जहाजेकि पिसति कोटलिनो क़न्द्र डॊकयाह्। अम जहाजेन चलात्रु अदे टुन्डकेह् अन्दवारयाह् अन्ते अहेन एजयाह् अन्ते जवालेकि पन्तेनो तॆंग़ा अन्ते तंग्कि गोसाञ्यिन सुम्ब्रारोति केवेजारयाह्।
गड़या अन्ते गोसाञ्यिकि बीकुव्रपेन गिनारेद्: बाइबिलेनो यूनाकि उजेद्, गोसाञ्यिद् अहेन नीनेवेक एकोति बीकयाद् अदेन्ते सुरु मॆनिद्। अहेकि गड़याद्, काजेन पूरात्राबलो, ऎलचेद्, आलसिन एदिद्। आद् अहेन गोसाञ्यिकि सडिन मॆनोति पॆहला जगेन चियाबलो गोसाञ्यिकि सबा कतान्ते तीरके बोंगोति ननिद्। नाम हों नमकि उजेनो गड़यारकेत डोकनो, आलसि मॆन्जेके कोडनो, गोसाञ्यि बहान्ते तीरकेत बोंगित। ईद् नमेन मोटो जवालेक अड़सत्रेनिद्। यूनाकि उजेनो आह् गोसाञ्यिकि बीकुव्रेन्ते तीरके एकया अदेनो अहेकि उजेनो मोटो जवालेन चिचाद्।
नमकि उजेनो गोसाञ्यिकि बीकुव्रेन्ते बोंगित अदेनो नमकि उजेनो अड़स्रो अवालेद् बरिद् अदे नाम टुन्डित। आ चोव यूनाकि पावनो हों अम जाजेनो मॊटो जवालेद् बरचाद्। गोसाञ्यिकि सबाकता गोटेनि नमकि एड़ु लग्कि हि बॆहिद्। अदेन्ते तीरकेत एकनो नमे गड़हि जवाले अन्ते तोकमोकारेद् बरिद्।
जवालेकि मदि पटयारेद्: यूना तर्सीस सहरेक एके डॊकयाह् अदेनो अहेक बरचा आ जवाले नमेन एन्डोन्द परानि बागु उगजोन सिकात्रिद्। आद् गा परानि बागु उजेनो उगलि बलो डॊकेद्। जटेके मादिनो अम जहाजे डुंगोति ननियाद् अदेनो, यूना जहाजेकि पिस्ति कोटलिनो क़न्द्र डॊकयाह्। यूना तंगे मॆनु जवालेन बुजाराबलो गोसाञ्यिकि सबान मानयाबलो डुंगोति ननयाह्। ई अवालेद् नमकि उजेनो एन्डोन्द सबान सिकात्रिद्। नाम गर गरि टाकयेद् जवालेद् बरिद् अदेनो परानि बागु उजेनो उगलि बलो क़न्द्र डॊकित। यूनाकि ई क़न्द्रेद् गा नमकि परानि बागु उजेकि असोल गुनेन ऎवत्राबलो डॊकोति मॆनेनिद् आञ्य इयेहेत्रिद्। जुदि नाम गोसञ्यि बहाक किरित तानु नाम एनोन्द जवालेनो डॊकनो गोटे नमेन गोसाञ्यिद् बड़येत्रोति अन्ते आस्रान चियोति पारयिद्।
गोसाञ्यि बहाक किरा: गर-गरि नाम गोसाञ्यिन अम्बके तीरनो गोटे, जुदि नाम नमकि गलतिन बुजारले गोसाञ्यि बहाक किरनो आद् नमेन ईन्ज्रेनिद् आञ्य यूनाकि उजेद् नमेन सिकात्रिद्। अम जहाजेन चलात्रु मूला यूनान क़न्द्रेन्ते ऎजयाह् अन्ते तंग्कि उजेन बाचात्रोति गोसाञ्यि बहानो सुम्ब्रारोति अवडयाह्। आ गरि यूना तंग्कि गलतिन कबुलारले गोसाञ्यि बहानो तंगेन सोपचाह्। नाम हों जवाल पहरानो अड़स्रो पहरानो अन्ते तोकमोकार पहरानो कटके एकित अदेनो, ऎलचेद्, उगलि तकुव्रेद् अन्ते आस्राबलोन अनुबव ननित। नाम एनोन्द जवालेनो डॊकनो गोटे जुदि नाम गोसाञ्यि बहाक किरित तानु आद् नमेन सगाबॆयेनिद् दूरे।
ओंग्र सबाद्: यूनाकि उजेनो मॆन्जाद् ई अवालेद् नमेन इदे उगलेत्रिद्, नाम अलसारके, गड़यारके डॊक पहरा, नाम गोसाञ्यिकि बीकुव्रेन्ते तीरके एकोति पारयित। जुदि ई चोवेन नाम नमकि उजेनो बुजारित तानि गोसाञ्यि बहक किरेत अन्ते आद् जरूर नमेन ईन्ज्रेनिद्।
दिन 2 – यूना हितिहास
चित्र 13 – जहाजेद् उरक़याद् अन्ते यूना जहाजेकि पिसति कोटलिक एक्केह् कन्द्रयाह्। गोटेनि एड़ु मॆनेनिद् आञ्य यूना सोच्चा।
चित्र 14 – गोसाञ्यिद् समुद्रे मॆचे बॆडो जटेकेन तॆयाद्; अन्ते आ जटेकेद् समुद्रेनो रागारयाद्, अन्ते जहाजेन बजको आद् डुंगेकि ऎलच-कॊरोनो जक़रयाद्। अनि जहाज-आवेर जहाजेकि बोजान पोपड़हा ननोति लग्केर आक-गहन्डिन समुद्रेनो चूटयार।
चित्र 15 – जे यूना ऎतकेह् जहाजेकि पिस्ति कोटलिक कोरचकेह् अन्ते कॊडकेह् एड़ु क़न्दरु मॆन्जाह्।
चित्र 16 – जहाज-आवेर ऎलचयार, अन्ते गोटेरि सगारोति अंगेमंगे गोसाञ्यिन कूक्रयार।
चित्र 17 – जहाजेन चलात्रुह् अहि बहाक अड़सकेह् अहिन अवडयाह्, इन्द्रद्? नीन क़न्द्र डॊकने, ईद् इन्द्रपद क़नकेद्? चोया, निंग गोसाञ्यिन कूक्रा; इन्द्राग़ि आ गोसाञ्यिद् नमेन चॆंग़जलिद् अन्ते नाम आडग़रलोत बरु!
मिसनरि हितिहासेद् – एमि कारमेकिल
एमि कारमेकिल गन्डिनो जवाले बॆहिद् आञ्य दुक्रार डॊकयाद्, जे बड़बलो मादि अलसाराबलो गोसाञ्यि बहाक किरकिद् गोसाञ्यिकि अन्दवेत्रप सबाकतान बुजारकिद् अपोकारयाद् आञ्य सिकात्रपोद्।
“दुलेलेत्राबलो चियोति पारयित जे
चियाबलो दुलेलेत्रोति पोलत्रिद्।“
एमि कारमेकिलेकि मिसनरि काजेके जॆजुव्रेद्
इंगलान्द देसिनो मिललिसलो क़ॆपनो मसि पत्यारु डेविड अन्ते केतरिन आनुव्रु ओड़ग़ेर डॊकयार। आबेरकि कुन्दयार आ सात मक़ेरिनो मेग़रो नुनि एमि मॆन्जाद्। मक़ पहरन्ते हि एमि चॆंग़जुद् अन्ते गोसाञ्यिकि सेवा काजेनो बीरमॆनु नुनि मॆन्जाद्। एमि तंग्कि बटग पहरानो पॆल मक़ेरकि कोलेजेनो पड़चाद्। एमिकि संगालनिर अदिन, “ऎमकि क़न पुतलि नील रंगेनो बॆहिद् जे निंग्कि मड़ग़्रो रंगेनो बॆहिद् आञ्य अदिन अलक़ार। आग्लकि क़नकि रंगे बदलारोति एमि दिनेनि सुम्ब्रार सॆंगयाद् तानि गोटे बदलारोलाद्।
तम्बाको डबान मेन्ज 4 एन्डा मोटो दुकानेन चलात्र डॊकयाह्। दुकानेनो लाबेद् एड़ु बरलाद् अन्ते तम्बाको हों कॆचा। एमि तंग्कि क़ॆपनो पॆलेर लग्कि ऎतवार ताड़े माक़ोन्द किलासेन जॆजयाद्। ई किलासेद् ऎसा एड़ु चलारयाद्। ई गरि, चीना इनलेन्ड मिसन संस्ताकि मूला बया हेडसन टॆयलर केविक आनुव्र जगेनो प्रचार ननयाह् अदे मॆन्ज क़ोक़ तंगेन गोसाञ्यि मिसनरि काजेक बीकिद् आञ्य बुजारयाद्।
मिसनरि काजेन कुदा डॊकोति एमि उगलेच डॊकयाद्।
1887 बचेरि 20 उम्रेनो एमि चीन मिसन संस्ता पावा गोसाञ्यि काजेनो बिरग़रोति उगलेचाद्। चीन इनलेन्ड मिसन संस्ताक चिटिन कुर्कयाद्। तानि गोटे एमिन आ संस्ताद् ओयलाद्। एमि गोसाञ्यि लग्कि काजेन कुदोति नन पावे बॆदयाद्। अन्ते चर्च मिसन सोसयटिनो बिरग़रयाद्। मिसनरि चोव जपानेक एकयाद्। बिमारि मॆन्जेको आ काजेन अम्बकिद्, चर्च आफ इंगलान्द जॆन्ना मिसनरि सोसयटिनो बिरग़रयाद्। आ संस्ता एमिन स्रि लंग्का देसिनो सोलोनेनो जोका दिनि डॊकत्रकिद् बारात देसिनो बॆहु बेंगलुरेक तॆयाद्।
1895 एमि दकिन बारतेक अड़सयाद्। अन्ते तमिलनाड़ुनो, तिरुनलवेलि जिलानो डोनावूर क़ॆपनो गोसाञ्यिकि काजेन जॆजयाद्। मिसनरि काजेन चलात्र डॊकोति एमि कजाक जवालारयाद्। पैसाकि जवाले मॆन्जाद्। एमिक गोसाञ्यि बहानो बॆच्चा आ पत्यारेद्, गोसाञ्यिकि बीकुव्रेन मानयेद् एन्डोन्द बदलारेन बेवानो ओन्द्रोति लॆग-लॆगात्रयाद्।
डोनावूर पेलोसिप जॆजेद्
एमि डोनावूर क़ॆपिक अड़सयाद् आ जोका दिनेनोहि प्रिना आनुव्र ओर्त पॆलिन बॆटारयाद्। आद् हिन्दु मंन्दिर अडानो लंगवि काजेन (पतुरयार) कुदोति सपोग़रकिद् डॊकयाद् आबेरकि कुन्द मक़ेर क़व्रो मक़ेर आनुव्रयार। प्रिनाकि ई उजेन टुन्डकिद् एमि ई चोवेनो पसारकेर डोकु गोट मक़ेरिन बाचात्रेद् हि तंग्कि काजेद् आञ्य ईन्ज्रयाद्। डोनावूर पेलोसिपेन जॆजयाद्। ईद् ई चोव जवालेनो पसारकेर डॊकु मक़ेर लग्कि सुरु ननयाद्। ई डोनावूर पेलोसिप पावा इन्ज क़द मक़ेरकि जोगय अडा, स्कूले, गिन्जग़रपेरिन सम्ब्रेयचेकिद् एड़ु मसि बेवान चोयत्रयाद्। मिसनरि तामस वाकर, एमि कारमेकिल बायिन सिकात्रयाह् अन्ते काजेनो अदो बड़त्रोति पावे एदयाह्। मन्दिर अडानो डॊकु मक़ेरिन चोग़ काजेन कुदोति लॆग-लॆगात्रयाह्।
डोनावूर पेलोसिप बारातेकि संस्क्रतिन ईन्ज्रयार अन्ते बारातेकि चुये अते, लपे मोके, बारातेकि नामिन हि पिन्जयार। अटिकि तमिल सबान सिकारयाद्। एमि तंग्कि चमेन रंगचकि मड़त्रयाद्। 1913नो 130 मक़ेरिन सगाबॆचार। 1918नो मुड़स मक़ेर लग्कि जोगय अडान जॆजयाद्। 1916नो सिस्ट्रस आफ दि कामन लयफ आनुव्रु संस्तान कोलयाद्।
मंदिर अडानो चलार बॆच्चाद् आ लंगवि काजेन टकयोति एमिकि कुरमुटेद्
एमि कारमेकिल उजेद्, जवाले बरनो गोटे ऎसा काज तानि मॆन्जाद्। अदिन मंदिरेनो डॊकु गुरुर अन्ते सरकारि मलेर जवालेत्रोति जॆजयार। मन्दिरेनो डॊकु क़व्रो मक़ेरिन बाचात्रनो तम्कि काजे रुकारेनिद् आञ्य ऎलचयार। तंग्कि काजेनो ऎलचक़ोरो मॆन्नो गोटे एमि ऎलचाबलो अगवारयाद्। एमिकि ई ऎलचाबलो चलारेन गाड़ेर लॆग-लॆगात्रयार। एमि अम्बाबलो कुरुमुट ननकिद् गाड़े मक़ेरिन बाचात्रयाद् अन्ते आबेरिक अय्या लॆहारयाद्।
दुके बरनो गोटे एमिकि नुक्राबलो आस्रारेद्
गड़हि जवाले बरनो गोटे एमि तंग्कि पत्यारेनो बज्रारले डॊकयाद्। तंग्कि मिसनरि काजेनो सुम्ब्रारेकि बड़येन दूरे आस्रारकिद् डॊकयाद्। सुम्बरारेकि बड़येन पत्यारयाद्। तंग्कि काजे लग्कि सुम्ब्रारोति तंग गुनि काजेन कुदुरिन लॆग-लॆगात्रयाद्।
गोसाञ्यि बहाक ओयुव्रियाद्
एमिकि नुक्राबलो पत्यारेद् अन्ते गोसाञ्यिन दूरे आस्रारके डॊकेद् गा एमिन चिन्यु ओर्तोनोन्देरिन लॆग-लॆगात्रयाद्। एनोन्द जवाले बरनो गोटे एमि मलेरिक कुदयाद् आ सेवा काजेनो जोका गोटे बड़बलो मॆनलाद्। एमि पुने किताबेन कुर्केनो ऎसा अकिलतानि मॆन्जाद्। 35 किताबेन्ते बेसि अन्ते किताबेन कुर्कयाद्। एमि बारात बरचकिद् अदो तंग देसिक किरोलाद्। 55 बचेरि डोनावूरेनो मिसनरि काजेन कुदकिद् 1951नेनो एमि डोनावूरेनो हि कॆचाद्।
सोचयोति: डोनावूर पेलोसिफ अनेके हों चलार बॆहिद्। गड़हि मक़ेरकि जोगय अडा चोव चलार बॆहिद्। तंग्कि उजेद् अन्ते काजेकि एन्डोन्द नमुना चोव चलार बॆहिद्। गिन्जग़रपेर, गिनारुव्रपेरि मजि गोसाञ्यि काजेन कुदोति नमेन हो सोपयेत। गड़यान्ते किरेत अन्ते गोसाञ्यि लग्कि चाडवारले काजेन कुदेत।
वि बि एस चामे 2026
दिन 3 – गोसाञ्यि अडाक किरा
बाइबिल पाटेद्: यूना 2:1-10
मनन वचनेद्: एन ऎंगेनो हि अवडकेन, एन निंग क़न अगदन्ते अक्र ओत्रुव्रकेन; अन्ते गोटे एन निंग्कि पाक ऎड़व-अडानि से अदो टुन्डे डॊकेन। यूना 2:4
मनन वचनेन सिकात्र पदिद्:
जॆजुव्र सबाद्: गिरजाद् मसि मलेरकि गन्डिकि माकु अन्ते कोचलु चोव जोड़ग़रकि बॆहिद्। आटिनो सिकात्रुव्रु सबाद्, सबाकताद् बिदिन तॆंग़ेद्, अन्ते एड़ु पावे एदेद् ओर्तनोन्द मलेकि उजेन अन्ते असोल मॆन्जेके मक़ेरकि उजेन सोहजात्रिद्। उले चरयु बा अवेलिनो चरयु मलेह् पावे अक़्क़ेह् चरयिह्। जे ऊक़ेनो चरयुह् उट्रेह्। बाचारेकि पावे एदोति पॆहला सव बचेरिनो तूमा बारात देसिनो तमिलनाडुनो एड़व-अडान मेन्जयाह् आद् अनेके अमट ओकिद्। गिरजाद् एन्डोन्द अडाद् दूरे मलाद् गोसाञ्यिन जिमोति एन्डोन्द पाक-जगेद्। डाकटर बहाक एकनो सहि सलहान अन्ते आस्रान क़क़ित आ चोव गिरजानो गोसाञ्यि बहाक एकनो उजेनो पतयारेद् अपोकिद् अन्ते एड़ुन क़क़ित।
गिरजान नन्दु टुन्डोति जोकेरे मलाद् अको? गोसाञ्यि तंग्कि सबाकतान यूनात पूरात्रोति गन्डिबागुनो यूनाक बड़ेद् अन्ते लायके बॆच्चाद् अदे गोसाञ्यिद् टुन्डयाद् (यूना 2:4)। यूना समद्रेनो तूव्रकेह्, मक़ोन्द मॊटो मीनेत नुनग़व्रकेह् मीन-पुडानो तीन दिनि अमट डॊक पहरा गोसाञ्यि बहानो केवेजारयाह्। “एन निंग्कि पाक ऎड़व-अडानि से अदो टुन्डे डॊकिन।” आनयाह्। इदि पावेत आह् गोसाञ्यिकि पाक ऎड़व-अडाक किरोति उगलेचाह् अदे टुन्डित।
यूनाकि उगलेयेद् यॆरुसलम ऎड़व-अडा पन्तेनो बॆच्चाद्। यहुदि मलेरिक ऎड़व-अडाद् गोसाञ्यिकि डॊक जगेद् आनुव्रिद्। आलग्केह् यूना तान तंग्कि उजे बाचारेक क़ोक़ गोसाञ्यिकि ऎड़व-अडाक एकोति उगलेचाह्। गोसाञ्यिद् तंग्कि मलेरिन आग़िद्, इकेह् गोटे मसिकि नामिनो पॆडक़िह् आह् डग्रहान्ते तीरकेह् डॊकिह् (2 तिमुतियुस 2:19)। यूना गोसाञ्यिकि ऎड़व अडान गाड़े उगलेचाह् आञ्य यूना 2:4नो आग़ित। यॆरुसलमेकि ऎड़व-अडा यिहुदिरकि ऎड़व-जगेद् मॆन्जाद्। ऎड़व-अडा उले कोरचके गोसाञ्यिन ऎड़वेन आञ्य सोच्चार।
ऎड़व पदि लग्कि एन जोकेर अको? यूना 2:7 “7 ऎंग्कि उजेद् ऎंगेनो चदग्रो मॆन्जाद् अदेनो, एन यॆहोवान उगलारकेन, अन्ते ऎंग्कि सुम्ब्रारेद् निंग्कि पाक ऎड़व-अडाक, निंग बहाक, अड़सयाद्।“ यूनाकि चलारेन गोसाञ्यिद् चॆंग़जयाद् आलग्केह् यूना ऎड़व-अडान उगलारकेह् नन्दु किरोति उगलेचाह्। गिरजाक एकेद् एन्डोन्द दस्तूर चोव मला, अदेनो गोसाञ्यिन अन्डोति एन्डोन्द मॊक़ाद् जिम्रिद्। गिरजा अडानो पाक मॆन्जेके, एड़ु उगलित गोसाञ्यिन उगलारके डॊकपोद् जक़्रोद्। उगलि अन्ते बाहर हों पाक मॆन्जेकेत गोसाञ्यिन ऎड़वोति मॆनिद्। गिरजा अडाद् गा उगलिन सप्पा ननु जगेद् अन्ते सोहजा गोसाञ्यिन क़ाव्र-नक़ु जगेद् आनुव्रिद्। “एनि से पावुन” ईसु मसिह् दूरे हि गोसाञ्यि बहाक एकु एन्डोन्द पावुद्। नन इन्द्रे गोटे ऎड़वे-कुड़वेद् नमेन बाचात्रोति पोलिद्। ईसु मसिन अम्बकेह् नेरे गोटे गोसाञ्यि बहाक एकोति पोलनेर। ईसु मसि पावेत दूरे गोसाञ्यि बहाक अड़सोति पारयेत।
गोसाञ्यिकि आसिकेत निन्दप उजेद्: यूना 2:9 “जे एन गुनेन-ओज सडित निंगेन सावजेत ऎड़वेन, एन दिबिन ओचेकेन अदे पूरात्रेन, चोग़ेद् यॆहोवा बत्तेद्।“ गोसाञ्यिकि क़देर गिरजाक एक्केर गोसाञ्यिन सेवयोति मॆनिद् गोसाञ्यिद् एड़वनेर आ जगेन्ते आबेरिन आसिक ननेनिद्। ई मूल सबाति यहुदिर यॆरुसलमेकि ऎड़व-अडान मॆचग सोच्चार। यहुदि जातिकि 12 उम्र पूरारु गोटेरि ऎयनेकि क़देर लॆहारनेर (ऎयनेन पूरात्रोति जॆजनेर) अन्ते आबेर तमकि उजेनो केपोन्दोडि यॆरुसलमेकि परबेक एकोति मॆनिद्। अदो 12 मील गचि अटगे डॊकुर गोट परबेनो सामिल मॆनोति मॆनिद्। चामे 122:1 “लॆगा नाम यॆहोवाकि अडाक एकेत आनयार अदेनो अनि एन अपोकारकेन।“ एन्डोन्द बेवाकि मलेर गोसाञ्यिन सेवयोति एक पहरा उगजो परानि बागु अपोकिद् जरमारिद्।
ओंग्र सबाद्: यूना ऎड़व-अडान हि टुन्डे डॊकयाह्। आह् सम्द्रेनो डुंगया अदेनो, एन गोसाञ्यिकि ऎड़व-अडान नन्दु टुन्डोति पारयिन अको? आञ्य सोचले उगलि तकुव्रले बीकयाह्। ईद् अहेकि उगलिनो गोसाञ्यिकि ऎड़व-अडा मॆचे बॆच्चाद् आ कीड़ेन एदिद्। गिरजा अडाक एकु नाम यूना चोव गुमेनारले नमकि पापेन गोसाञ्यि बहानो कबुलारेत। नाम नमकि पापेन कबुलारनो से गोसाञ्यि नमेन माप ननोति गोसाञ्यिक मोकाद् क़क़ुव्रिद्। गोसाञ्यि अडाक बरु नाम गोसाञ्यि बहानो गुमेनारेत, सुम्ब्रारेत अन्ते गोसाञ्यि क़टेनिद् आञ्य पत्यारकेत डॊकेत।
दिन 3 – यूना हितिहास
चित्र 18 – जहाज-आवेर अवडर नक़ार, बरा, ई ऎलच-कॊरोद् नेक लग्किद् से उट्रयाद् अदे आग़लेत अदिक, लॆगा नाम चिटिन बिच्रेत! अन्देकेर चिटिन बिच्रको चिटिद् यूना नामिनो उट्रयाद्। अनि आबेर यूनान मॆन्जार, ऎमेन तॆंग़ा, ई ऎलच-कॊरोद् ऎम मॆचे नेक लग्किद् उट्रयाद्? निंगे इन्द्र काजेद्? अन्ते नीन इकेन्ते बरच डॊकने? निंग्कि देसिद् इन्द्रद्? निंग्कि पलकाद् इन्द्रद्? आनको आह् अवडेकिरत्रयाह्, एन इब्रानिन, अन्ते समुद्रेन अन्ते क़ेक़ले मेन्जु यॆहोवा मॆरग़नि गोसाञ्यिन सेवयिन। आह् तान यॆहोवा क़न-सरिन्ते बोंग़ाह् अदे अगदुहि आबेरिन अवड ओजयाह्; अनि आबेर अदि पन्तेनो अक़्क़ेर अदो गाड़े ऎलचकेर अहिन अवडयार, तॆबे नीन इदे इन्द्रिक कुदके? समुद्रेनो जटेकेद् अदो गड़हि रागार एकयाद्, अनि आबेर यूनान मॆन्जार, ई समुद्रेद् नम लग्किद् जिन्न् क़ॆरग़लिद् अदिक, एम निंगेन इन्द्रे कुदेम?
चित्र 19 – आनको यूना आबेरिन अवडेकिरत्रयाह्, नीम ऎंगेन पॆतेकेर समुद्रेनो चूटा, अन्दे से समुद्रेद् निम लग्किद् जिन्न् क़ॆरग़ेनिद्; ई बॆडो जटेकेद् गा ऎंग लग्किदि से निम मॆचे उट्रयाद् अदे एन आग़िन। अन्ते गोटे जहाज-आवेर जहाजेन समुद्रे बिटेक अड़सत्रोति तमकि गोट बड़ेत केवचार, जे आबेर पोलार, इकनिकि समुद्रेद् अदो गड़हि रागार एकयाद्। अनि आबेर यॆहोवान कूक्रयार, ओ यॆहोवा, ई मलेकि उज लग्कि ऎमेन आडोमा, टडाबलोकि क़ेसकि कसुरेन ऎम मॆचे ऒन्दोमा; इकनिकि ओ यॆहोवा, नीन निंग्कि मड़ चोव इन्देकि कुदकि। अन्ते आबेर यूनान पॆतेकेर समुद्रेनो चूटयार।
चित्र 20 – अन्ते यूनाह् समुद्रनो चूटुव्रयाह् अदेनो, गोसाञ्यिद् मक़ोन्द बॆडो मीने यूनान नुन्ग़ोति अड़सत्रयाद्;
चित्र 21 – अन्ते रागारु समुद्रेद् आपोलारोति अम्बयाद्। इदे टुन्डकेर जहाज-आवेर मॆरग़नि गोसाञ्यिन अदो गड़हि ऎलचयार, अन्ते आबेर यॆहोवान जानवरेन मॊचकेर ऎड़वयार अन्ते दिबिन ओचार।
चित्र 22 – अन्ते यूना आ मीनुकि कोचोनो तीन दिनि उल्लि माक़ि डोकयाह्। यूना गोसाञ्यिन सगार लग्के कूक्रके सुम्ब्रारयाह्। पाक एड़व अडान उगलारयाह्। (यूना 1:17; 2:4)
मिसनरि इतिहासेद् – राबर्ट रेयक्स जूनियर
मूल सबाद्: मक़ेर मक़ेरकि मसि दोलेनो एड़ु एड़ु सबान सिकारनेर अन्ते गिरजा मॆनेद् ऎसा जक़्रोद् अदे बुजयनेर। मक़ेरकि उगलि-जवालेन एड़ु सबाकतात मक़ेरकि मसि दोलेनो मसि पन्तेनो तिलत्रित। ईसु मसि पन्तेनो सिकात्रले मक़ेरिन कलीसियानो, बेवानो, अन्ते अडानो हों एड़ु परानि बागु क़न्जपेन चिय जोकेर बनात्रित।
राबर्ट रैक्सेकि कुन्देद् अन्ते परिवार-जिमाद्
इंगलान्द देसिनो क्लोसेस्टर आनुव्र जगेनो रोबर्ट रेयक्स अन्ते मेरिडिरु ओड़ग़ेरिक सितम्बर 1736नो रोबर्ट रेयक्स जूनियर कुन्दयाह्। अहेक तम्बाको नामिन हि पिन्जयार। मक़ पहरान्ते हि तॆहो तम्बाकोरकि सबान दरचले गिरजा अडाकि काजेनो दियान चिचले पदरयाह्। तंग्कि 31 उम्रेनो दिसम्बर 23, 1767 बचेरि राबर्ट रेयक्स आनड्रिके बायिन बिहा ननयाह्।
पत्यारेद् अन्ते गोसाञ्यिकि काजेद्
ईसु मसि पन्तेनो अपोकार तॆंग़ेद् गा पत्यारुर गोटेरिकि जिमाद्, अन्ते आ काजेद् पाद्रिरकि दूरे आञ्य सोचयाबलो तंग्कि चापियत्र काजेन कुदकेह् लन्डन सहरेकि जेल अडानो ऎक्केह् गोसाञ्यिकि काजेन कुदकेह् अपोकार सबान बिलचाह्। राबर्ट रैकस डॊकया आ अमलेनो इंगलान्द देसिद् कीड़वारकिद् जवालारयाद्। 25% मलेरि टकातावेर मॆन्जाद्। 75% मलेर कीड़वारकेर डॊकयार। ई अमलेनो क़ेक़लकि गड़ जगेन्ते मलेरिन गुलामि बनात्रकेर इंगलान्द देसिक ओन्द्रयार। गुलामिरकि उजे ऎसा जवाले मॆन्जाद्। गुलामिरकि अडा मलेर (मक़ेर अन्ते मॊटोर) गोटेरि दिनोन्देनो 18 गन्टा अमट काजेन कुदोति मॆन्जाद्।
मक़ेरकि मसि दोलेन चोयत्रोति सगाबॆयुर
केपोन्द राबर्ट रेयक्स लन्डन सहरेनो डॊकु कीड़वारकि क़ॆपे कटके एकयाह् अदेनो डॊकु मलेरिन टुन्डकेह् दुक्रारयाह्। ऎसा जोका कमिर अडा, सकडा पावु, ऎसा चॆन्चाद्, पोकेरिकि गन्डा-अमु, गदड़ानो केलारु मक़ेर, पापेनो डॊकु मलेर, ओन्कु मलेरकि डानि सबेरकि ओलग़ सड़िद्, उजेकि आस्राबलो डॊकु मलेर। ईव ईवेन टुन्डकेह् राबर्ट रेयक्स बया दुक्रारयाह्। पापेद्, अनुसासन बलो उजेन बदलेत्रोति मॆनिद् आञ्य रेयक्स बया अंगोचारयाह्।
दिनोन्द जेल अडानो डॊकु मलेरिन सिकात्रले कीड़वार मलेर डॊकयार आ क़ॆपे कटके एके डॊकया अदेनो, आटिकि मक़ेर गिदनानो केलार डोकयार अन्ते गादेन रेयक्स बया मॆचे ओर्त नुना चूटयाह् अन्ते तंग अडाक बोंग़ एकयाह्। उगलि-दुक्रारयाह् जे रेयक्स बया रॊकाराबलो ईसु मसिकि दुलेलिन एदयाह्। अदे टुन्डकेर आटिकि अदेसि मक़ेर अमे ओन्द्रकेर चिचार। आ दिने रेयक्स बया आ मक़ेरिन बाइबिल सबान सिकात्रले ऎम्बेन बिलचाह्।
मक़ेरकि मसि दोलेन (सन्डे स्कूलेन) जॆजेद्।
मक़ेर सप्ताकि सो दिनेनो कम्पेनिनो काजेन कुदकेर इतवारे दूरे चुटिनो डॊकयार, इदे अक़्क़ेह् रेयक्स बया मक़ेरकि मसि दोलेन सुरु ननोति अंगोचारयाह्। आ चोव आह् जुलाइ महिना 1780 बचेरिनो मेरिडिक नामि ओर्त बायिकि अडानो पॆहला मक़ेरकि मसिदोलेन सुरु ननयाह्। सुरुनो मक़ेर दूरे जमारयार; अदेसि दिनि क़ोक़ नुनिबेर हों कोरोति जॆजयार। ई मक़ेरकि मसि दोल पावेत मक़ेरकि उजेद् हों बदला रोति जॆजयाद्।
अनुसासनेन मेन्जेद्
मक़ेरकि मसि दोलेकि चलात्र-पदिद् पन्तेनो रेयक्स बया कुरकयाह्, अदेनो माक़ोन्द 10 बजे मक़ेर अम्बाबलो बरोति मॆनिद्। दुलेलि, मड़मॆनेद्, आदर ननेद्, अनुसासन, एड़ु गुने ईव ईवेन आग़ाबलो डॊकु मक़ेरिन कुरकोति, पड़योति, गनित सिकात्रकेह् अन्ते आबेरिन उगजोन, आजविन, जिमान अन्ते एड़ु गुनेन हों सिकात्रयाह्।
आबेर 12 बजे अमट इस्कूलेकि पाटेन पड़येर, अदि क़ोक़ अडाक ऎक्केर जागुन लपकेर 1 बजे नन्दु मक़ेरकि मसि दोलेक बरोति मॆनिद्। अदि क़ोक़ मक़ेरकि मसि दोलेकि बाइबिल पाटेन, 1 बजेन्ते 5 बजे अमट पड़योति मॆनिद्। इस्कूल ओंग्रनो किर पहरा जे चिरक़ाबलो तम तम अडाक किरोति मॆनिद्। ई चोव चलारनो मक़ेर उजेकि अनुसासनेन सिकारयार।
मक़ेरकि मसि दोलेकि मूल सबाद्
ईसु मसिकि अपोकार सबान तॆंग़नो बॆवानो बॆच्चाद् आव आव डग्रहा चलारेन आड़ग़रिद् आञ्य रेयक्स बया अंगोचारकेह् कुरमुट नन्केह् काजेन कुदयाह्। पड़याबलो लाक लाक मक़ेर डोकयार, आबेरिन रेयक्स बया सुरु ननयाह् आ मक़ेर दोल पावेत नमकि ई सि अयनो चलारिद् “ग्रेस टूसन सेन्टर” ग्रेस पड़ायिद् चोव आबेर वचने अन्ते पड़या कुर्कोति हों सिकारयार
अनुसासनेनो बदलारेद्
19 सव बचेरिनो मक़ेरकि मसि दोलेद् बेवानो मॊटो बदलारेन ओन्द्रयाद्। 1840 नो इंगलान्द देसिनो सरकार इस्कूलेनो एड़ु पड़यत्रयार आलग्कचकि मक़ेरकि गिरजानो बाइबिल पड़ायि दूरे सिकात्रयार। गाड़े मक़ेर मक़ेरकि गिरजानो सिकारयार।
इदि पावेत गोट मक़ेरिक इस्कूल पड़ायिद् अन्दाड़े चियुव्रयाद्। गिरजा अडानो मक़ेर एड़ु गोसाञ्यिन सेवयोति मक़ेरकि गिरजा काजवा मॆन्जाद्। राबर्ट रेयक्स बया 1811 बचेरिनो अप्रेल महिना 5 तारिक तंग्कि 74 उम्रेनो कॆचाह्।
गुमेनारा: अगदु मक़ेर मक़ेरकि गिरजा पावेत गिरजाक एकयार। इनोर इंगलान्द देसिद् गोट दुनिया लग्कि एन्डोन्द आसिक तनि देसिद् आनुव्रिद्। इदिकि कारुनेद् मक़ेरकि गिरजाद्। ईद एनोन्द मॊटो ऎवग़लेट काजेद्। ओर्त गोसाञ्यिकि मलेह् इन्देकि अवडिह् “पहराद् दामतानि अदे बुजारकेर उजोमलेकेर तानि ओलग़ेर चेरि” पहरान बॆडो बीत बुजारकेर गिरजाक अम्बाबलो ऎक्केर मक़ेरकि मसि दोलेनो ईसु मसि पन्तेनो सिकारकेर आसिकतावेर बनारित।
वि बि एस चामे 2026
दिन 4 – बीकुव्रपेक किरा
बाइबिल पाटेद्: यूना 3:1-4
मनन वचनेद्: नीम निमकि बॆडवोरकि दिनेन्ते जॆजकेर ऎंग्कि उकम गहन्डिन मानयलेकेर आव आवेन्ते तीरकेर एक्केर। लस्क्रेरकि यॆहोवाद् अवडिद्, ऎंग बहाक किरा, अन्दे से एन हों निम बहाक किरेन; मलाकि 3:7
मनन वचनेन सिकात्र पदिद्:
जॆजुव्र सबाद्: गोसञ्यिद् बीकिद् आ पावुद् आसिकतानिद्। अदिनो अम्बके नन पाविक कोरेद् ऎलचक़ोरोद्। नन्दु आ एड़ु पाविक एकेद् अपोकिद्। यूनाकि उजेनो ईदि चलारयाद्। “नीनेवेक काला” आञ्य गोसाञ्यिद् अवडयाद् जे यूना आ सबान अम्बकेह् तर्सीसेक एके डॊकयाह्। आ पावनो मीनकि पूडानो जवालारकेह् डॊकयाह् अदि क़ोक़ गोसाञ्यि बहाक किरयाह्। अगदु गोसाञ्यिकि सड़िन अम्बकेह् डॊकयाह् जे जवालेक क़ोक़ गोसाञ्यिकि सड़िन मॆन्जाह्। यूना गुमेनारयाह् अदि क़ोक़ “नीनेवेक काला” आञ्य गोसाञ्यिद् अवड़ क़ोक़ दूसरा केप बीकुव्रपेन ईन्ज्रिह्। अनेके इन्द्र गोटे उलटा-पुलटा अवडा बलो सबान मानचाह्। आह् मीनकि पूडानो जवालारकेह् एड़ु पाटेन सिकारयाह्।
अदेसि पहरा जवालेद् अन्ते काकलि गोटेनि नमेन गोसाञ्यिकि पावनो चरयोति अगुवेत्रु चोव (इस्रायेलेरिन मिस्र-आवेर सतात्रयार) आ चोव बॆहेनिद्। नाम नमकि गोसाञ्यिकि सडिन मॆनोति मॆनिद्। अन्ते अदिकि मड़ेन पूरात्रोति मॆनिद् ईदि से गोसाञ्यिकि उगलेयेद्। ऎवजप-तंग़ादे तम्बाकोकि उगलेयपेना कीड़ेत, पेसा बलो जवालार पहरानो हि उगलारयाह्। पाक परनिकि सबान मॆन्जले दिनेनि चलारोति गोसाञ्यि नमेन बीकिद्। जुदि नाम गोसाञ्यिकि सडिन मॆनाबलो डॊकित तानि जवालेद् बा जवालेत्र मलेर पावेत नन्दु गोसाञ्यिकि सडिन मॆनोति किरकि बरोति सिकात्रुव्रित। नाम ओर्तोनोन्देत गोसाञ्यिकि सडिन मॆनलेत अन्ते अदिकि पावनो चलारोति आद् नन्दु मोक़ान क़टिद् अन्ते नमेन मड़मॆनिद्, दॆयान एदिद्, चॆंग़जिद् इकनिकि गोसाञ्यिद् नमकि अब्बाद्।
इने हों गोसाञ्यिद् नमेन तंग्कि आसिकेनो तान बीकिद् अदेनो नाम नन्दु बीकुव्रपेनो चलारलेत अदिक नमे क़ापे डॊकिद्। ऎवत्रकेत आ बीकुव्रपेनो गोसाञ्यि गुनि संगालिन ओजोति बीकिद्। यूना नबि गोसाञ्यिकि सडिन मॆन्जले, चोचेकेह् नीनेवेक एकयाह्। गोसाञ्यिकि सडिन मॆनोति नाम उगलेयोति मॆनिद्। जुदि नाम डेरो पावे चलारित तानि गोसाञ्यि बहाक, किरोति मॆनिद्। गुमेनारेदि से गोसाञ्यि बहाक किरेद्। नमकि पापेन्ते डग्रहान्ते तीरकेत गोसाञ्यि बहाक किरेदि से गुमेनारेकि पावुद्। नमकि उजेनो इक जगेनो उट्रकेत अदे जांच ननलेत अन्ते अदे सरयेत्रले गोसाञ्यिकि क़नसरि एड़ुन कुदेदि से गुमेनारेद्। ई चोव यूना सरयेत्रले सबान दरचाह् अदिकि पन्तेनो यूना 2 मूलिनो पड़यित। गुमेनारेद् बॆहनो गोसाञ्यिद् अन्ते अदिकि चॆंग़जेद् हो बॆहिद्। यूना 3:1केनो उगलिनो जुन्जुव्रले गोसाञ्यि बहानो यूना किरयाह् अन्ते से गोसाञ्यि नन्दु दॆयान एदयाद्।
ननेर पावेत गोसाञ्यि तंग्कि मड़ेन पूरात्राबलो गुमेनारे लग्कि से नन्दु मॊकान चियिद्। पॆहला काजेनो यूना हारचाह् तानि गोटे गोसाञ्यिद् अबेन नन जगेक तॆयलाद्, जे अहेक नीनेवेक हि एकोति अवडयाद्, हल्लेलुया! गोसाञ्यि बहाक किरनो एवत्रपे गोट आसिकेन नन्दु क़क़ेत। ऎवत्रपे बीकुव्रपे, सबाकता, उजेद्, आदरे अन्ते पोग़ोलेन गोटेनि गुमेनारनो नन्दु क़क़ेत। गोटेनि बदलाराबलो अगदु चोव चियुव्रेनिद् अदेनो सिञ्याड़िद् हों बॆहेनिद्।
ओंग्र सबाद्: इन्ते दिनेनो नाम इकेनो डॊकित अदे सोचयेत। गोसाञ्यिकि बीकुव्रप चोव चलारित तानि अपोकिद्। जे गोसाञ्यिन अम्बके गॆचि एक्के आसिकेन एवत्रकेत तानि अनेके हि गोसाञ्यि बहाक किरेत। उगजो गुमेनारेति अदिकि क़ॆड़े दरयेत। चॆंग़जु गोसाञ्यिद् नमेन अम्बाबलो नमकि गोट आसिकेन, एड़ुन, पहरान, मोकान नन्दु नमे क़टेनिद्। गोसाञ्यि बहाक किरनो नमे गोटेनि नन्दु क़क़ुव्रेनिद्।
दिन 4 – यूना हितिहास
चित्र 23 – अनि गोसाञ्यिद् मीने उकम ननयाद्, अन्ते आद् यूनान क़यकेनो तुरवकिद् तॆयाद्। गोसाञ्यिकि सबाद् यूनाक दूसरा केप ईञ्य मॆन्द्रयाद्: नीन चोया, अन्ते बॆडो सहरे नीनेवेक काला, अन्ते एन निंगेन तॆंग़िन आ सबान आ सहर मलेरिन मॆन्त्रोका।
चित्र 24 – अनि यूना यॆहोवाकि सबा चोव चोचाह् अन्ते नीनेवेक एकयाह्।
चित्र 25 – नीनेवे बॆडो गाड़े सहरे मॆन्जाद्। आद् तीन दिनि पावनोन्द डम्बे मॆन्जाद्।
चित्र 26 – यूना सहर उले कोरचकेह् दिनोन्द पावनोन्द एकयाह्; अन्ते आह् मॆन्त्रले अवडयाह्, कॊड़यिस दिनि अदो बॆहिद्, अदि क़ॊक़ नीनेवेद् आडग़रेनिद्।
चित्र 27 – अनि नीनेवे-आवेर गोसाञ्यिन पत्यारयार, अन्ते उगोसोति गोटेरि नियारेच नक़ार, अन्ते बॆडो मलेन्ते जोक जोका अमट गोटेरि तमकि गुमेनारेन एदोति टाटेन चूचार।
मिसनरि हितिहासेद् – अब्बा बिसप एज्रा सरगुनम
मूल सबाद्: गोसाञ्यिकि बीकुव्रप चोव अपोकार सबान तॆंग़ले गोट देसिनो कलीसियान इदोति मॆनिद् आञ्य उगलेचले ईसु मसिकि सेवा काजेन एड़ु तुम्ग़लेत कुदयाह् आ मॊटो मले चोव सोपयोति गुमेरारा।
एज्राकि कुन्देद् अन्ते तॆहो-तम्बाकोर एज्रान सोपयेद्: तामस उवाकर आनुव्रु विदेसि मिसनरि बया तमिलनाडुकि तूतकुडि जिलानो पन्नयविलय क़ॆपनो गोसाञ्यिकि काजेन कुदे डॊकयाह् अदेनो, मनुवेल बया अन्ते अहि डानि तंगामेरि ओड़ग़ेर गोसाञ्यि ईसु मसिन पत्यारकेर कोरचार। ईबेरिक 1938नो जूलाई मॆहना 19 तारिकेनो ओर्त मुड़स मक़ेह् कुन्दयाह्। मक़ेह् कुन्दयाह् आ दिने तम्बाकोह् बाइबिलेनो ऎज्राकि किताबेन पड़च डॊकयाह्। अन्ते तंगे मुड़स मक़ेह् हि कुन्देह् अन्ते अहेक ऎज्रा नामिन पिन्जेन आञ्य उगलेचकेह् ‘ऎज्रा’ आञ्य पिन्जयाह्।
ऎज्राकि मक़-पहरा: मीन्जो नदि, कज्रि मनुद्, तामलि मनुद्, कमिर-अडाद्, बहोन्देनो डॊकु मॊटो परिवारेद् आञ्य मीन्जो एत्रु क़ॆपुदि आ पन्नयविलय। ऎज्रा तंग्कि तम्बाकोकि सेवा काजेनो अरिगरि पत्रिकान बिलचले सगाबॆचाह्। तान इन्टर पॆहला बचेरिनो पड़य पहरा तंग्कि उजेनो मोद्रोति पोलु एन्डोन्द अवाले मॆन्जाद्। तंग्कि 11 मा इन्टर पॆहला बचेरि परिचाकि रिजालट दिने अड़सको पेल मॆनेह् आञ्य ऎलचकेह् कज्रि मन मॆचे अरग़ेक ओकेतयाह्। रिजलटे उरक़ाद् तान पास मॆन्जाह् अदे अडा मलेर अन्ते 11 जॆन उन्डग़लेर हों तामलि मनु पिसि बरचकेर ‘अड़े नीन पास मॆन्जेके’ आञ्य चिरक़ार। अदि क़ॊक़ से ऎज्रा तंगेन तामलि मन मॆचा हि तंगेन गोसाञ्यि काजे लग्कि सोपचाह् अन्ते पिसि ऎतयाह्। “कज्रि कोरोक अड़सयाह्, गोसाञ्यिकि टॆटे दरचले अदिक, अदिकि काजेन कुदोति तंगेन सोपचले बेवाकि डग्रहान तूवयाह् नमकि ऎज्रा”
सेवाकि ट्रेनिंगेद्: तम्बाको तंग़ादेन तिरुनेलवेलिन्ते रेल गाडिनो चेन्नाई सहरेक तॆय्याह्। तंग्कि 16 बचेरिनो ओ एम एस संस्तानो Madras Theological Seminary and College नो गोसाञ्यि काजे लग्कि ट्रेनिंगेक ऎकयाह्। उम्रेनो जोका मॆन्जाह् आलग्कि बाइबिल कोलेजेनो पड़योति क़क़लाह्। जे क़ोक़ आ कालेजेनोहि पड़चले तंगेन गोसाञ्यि काज लग्कि ओरयेत्रयाह्।
परिवार उजेद्: 1962 ऎज्रा बया मंगलम बायिन बिहा ननयाह्। मलेर मॆचा कीड़े, चाडवारेद्, कुरमुटेत अम्बाबलो सयकिलेनो अयपाक्कम, विल्लिवाक्कम, कोलडि, पोरुर, कीलपाक्कम अन्ते चेन्नायकि गड़हि जगेनो आबेर गोसाञ्यिकि काजेन कुदयार। सनिचार ताड़े सयकिलेनो प्रचार काजे लग्केर एके सॆंगयार। मंगलम बायि कमिर अडाकि क़ेक़ले गोबारित ओत्रले सप्पा ननयाद्। अन्ते बया अम्बाबलो गुरार सॆंगयाह्। माक़े आटिनोहि क़न्द्र-बिजेर अन्ते नन दिने गिरजान चलात्रकेर अडा ताड़े सुम्ब्रारकेर इव्रेर हों अडाक किरेर। 10 बचेरि क़ोक़ कदिरोलि अन्ते मदियोलि आञ्य इव्र पॆल मक़ेरिन गोसाञ्यिद् आबेरिक चिचाद्।
कलीसियान सुरु ननेद्: चेन्नाई मेरिनानो (समुद्र बीटेनो) एन्डोन्द मॊटो जगेनो गोटा दुनियानो गोसाञ्यिकि काजेन कुदु मॊटो बय बिल्लि ग्रहाम सबन तॆंग़ाह्। ऎज्रा बया आ सबान मॆन्जेकेह् उगजो बाचारेन अन्ते ईसु मसि गुनि एड़ु संगालिन ओजेकि काजवान बुजारयाह्। आ सबादि से क़ोक़ति दिनेनो ऎज्रा बयाक गोसाञ्यि लग्कि गाड़े कलीसियान इदोति सगाबॆचाद्। 1957-1958 बचेरिनो चॆन्नाईक अटगे पोरूर आनुव्र जगेनो ऎज्रा आड़ग़रेर आलग्केह् ऎज्रा बया कलीसियान गाड़े जगेनो इदोति उगलेचाह्। ऎज्रा बया एड़ु अगुवेत्रु आञ्य अक़्क़ेर ओ.ऎम.ऎस संस्ताद् अन्ते विदेसि मिसनरिर हों ताम अगुवेत्रु डॊकयार आव आव जिमा काजेन ऎज्रा बयाक 1972नो सोपचार। ऎज्रा जिमान ईन्ज्रकेह् क़ोक़ ई सि अय काजेद् बडार एकयाद्। कलीसियाद् लॆक्येनो अन्ते पत्यारेनो बडारोति जॆजयाद्। अन्ते 1974 बचेरिनो उतर बारतेक मिसनरिरिन तॆयेकेह् ई सि अय काजे-सिमान बडात्रयाह्। गुजरात, मुम्बाई, ओडिसा, बंगाल, आन्द्रा, अन्ते जारकन्ड आनके गोसाञ्यि काजे बडार एकयाद्।
कलीसियाकि बडारेद्: सुरु सुरुनो 1974 बचेरिनो 100 कलीसियान तुमंगल चोव अंगोचारकेह् तान एकु गोट जगेनो एन्डोन्द अंगलिन एदले (100 कलीसिया बनारोति इसारा संगाल एदले) सुम्ब्रारकेह् अन्ते सुम्ब्रेत्रकेह् गुरारयाह्। आद् पूरार क़ोक़ तंग्कि एन्डिस अंगलिन एदले 200 कलीसियान इदोति सुम्ब्रारयाह्। आद् हों 1980नो पूरारयाद्।
यसाया 60:22 “निमेनो ऎतपेह् अजारोन्द, अन्ते गोटेरिनो कटप ऎतपेह् बड़य मल-तोका लॆहारेह्। यॆहोवान एनि से इदिकि सहि पहरानो इदिन ऒकड़ि पूरात्रेन।“ ई वचन चोव 2000 बचेरिकि अगदु 1000 कलीसियान इदोति तुम्गलारयाह्; आ चोव 1998 जनवरि मॆहना 1000 कलीसियाकि आक्रि कलीसियान उदगटन ननयाह्। 2005मा बचेरिनो 2000 कलीसियाद् इदुव्रयाद् अन्ते 10 एन्डा अंगलिन एदले सुम्ब्रारले 10,000 कलीसियान टुन्डोति गोसाञ्यिद् सगाबॆचाद्। गोसाञ्यिकि बड़येद् अन्ते ऎज्रा बयाकि गोसाञ्यिद् चिचाद् आ तुम्ग़लेद् अन्ते अगुवेत्रेदि से इदिकि कारुने मॆन्जाद्।
1993मा बचेरिनो परवरि 14 तारिक गोट दुनियान अपोकेत्रले ई सि अय कलीसियान एड़ु अगुवेत्रु मॆन्जेकेह् पॆहला बिसप, अगुवेत्रु बिसप, अन्ते मूला बिसप, मेग़रो बिसप 30 बचेरि अमट बिसप मॆन्जाह्। नेरे गोटे ई चोव मॊटो काजेन कुदलार, जे पादर बिसप ऎज्रा सरगुनम कुदयाह्।
बेवा लग्कि एड़ु काजेन कुदेद्: मक़ पहरा तंग्कि क़ॆपनो मॆचग जाति अन्ते पिस्ति / ऎतो जाति आञ्य बेवानो बॆच्चाद् आ डग्रहान टुन्डकेह्, क़ोक़ति दिने ऎतो जातिरिक एड़ुन कुदोति मूल मॆन्जेके काजेन कुदयाह्। अन्ते 1997-1998नो रेलवेनो मूल बनारया, 1997-2000नो तमिलनाडु बारतितासन युनिवरसिटि सेनट मॆम्बर बनारकेह् मलेरिक गाड़े सगाबॆचाह्। अन्ते गाड़े ईन्जक़द मक़ेरकि जवालेन बुजारकेह् आबेरिक 7 जगेनो हेपि होम अन्ते मॆर्सि होमेन कोलयाह्। अन्ते आबेरिक पुन उजेन चिचाह्। तंग्कि कुन्दप दिनेन “ऎतो जातिर लग्केह् गड़हि चीजे अन्दाड़े बिलचाह्। अन्ते पड़यु कीड़वा मक़ेरिक अन्दाड़े लपटापेन अन्ते पड़योति पीस पेसान हों चिचेके सगाबॆचाह्। तमिलनाड़ुनो दूरे मला उतर बारातेनो इन्द्र गोटे मॊटो गटना मॆन्जाद् तानि ओकड़ि सगाबॆचले आ मलेरिन बाचात्रले मसिकि अपोकार सबान आग़ोति सगाबॆचाह्।
बिसप ऎज्रा बेवानो “क़ावोति पोलु गिन्जग़रपेरि लग्कि तान क़ावयाह्”। ऎलचाबलो आबेरि लग्कि सबान चोयत्रयाह्। इहिकि मसि प्रचार काज संगाल बेवाकि आजवि पन्तेकि काज लग्केह् तंग्कि 65 मा कुन्दप दिनेनो मनात्र पहरा आ पहराकि मुक्य मंत्रि स्रिमान करुनानिदि बिसप ऎज्रान “आजवि लग्कि लड़ायारु बिसाप” आञ्य नामिन चिचाह्।
गोसाञ्यि काजेनो टाकयेद्: बिसप ऎज्रा गोसाञ्यिकि काजेनो पोपड़हात जीतयेन क़क़लाह् सुरु दिनेन्ते हि गाड़े टाकयेद् अन्ते जवालेत क़क़्क़ाह्। उतर जिलानो मसि पत्रिकान बाटय पहर अहेन राड़-मलेर बजयार अन्ते अक्रयार। गन्डिनो नुन्ज्रुव्रले ऎज्रा दुक्रारयाह् अन्ते बीकुव्रपेनो गाड़े सवाले चोचाद्। आ पहरा “ऎंग्कि उजेन गोटे सोचयेनला” आनुव्र वचनेत गोसाञ्यि बिसप गुनि क़ाव्रनक़याद्। ई ववने बिसपेकि काजेनो चाबि चोव बॆच्चाद्।
चॆन्नाइनो कीलपाक्कम कलीसियानो पाद्रि काजेन कुदे डॊकयाह् अदेनो एन्डोन्द चाय दुकानेनो चाय ओन्ड डॊकयह्, आ पहरा आटिनो ओर्त राड़े अहेन बजयाह्। कुकनो ऎसा नुनज्रुव्रकेह् बाचारयाह्। अन्ते 1999 नो गुजरातेनो सिन्तिया जिलानो ई सि अय कलीसियान राड़ेर जवालेत्रयार अदेनो बिसाप ऎज्रा अनो ऎक्के 10 दिनि अमट लपाबलो लड़ायारले बाचात्रयाह्। तंग्कि उजेन गोटे मॊटो सोचयाबलो लड़ायारयाह् अदेत अदि क़ोक़ नन कलीसियाद् राड़ेरित जवालेत्रुव्रलाद्।
ऎज्राकि अदानिबलो दुलेलि उगलिद्!
एड़ु चॆंग़ज गुनेद्! सगाबॆयु उगलिद्,
गोसाञ्यिन मॆचग ननले, ननेरिन मड़ मॆन्जले,
तंगेन ऎतो ननले एदु मलेरिनो नमकि बिसाप ऎज्रा गोट पहरा अगुवारकेह् डॊकिह्।
गोसाञ्यि-काजेक सोपयेद्: गाड़े तुमंगलेत गोसाञ्यिकि काजेनो गड़हि जगेनो कलीसियान इदले जीतयेन क़क़्क़ाह्। नमकि ई सि अय अब्बा बिसापे एज्रा सरगुनम। आह् 2024मा बचेरिन सितम्बर 22 तारिकेनो कॆचाह्। अहेकि तुमंगलेद् अदो “लाकोन्द कलीसियाद् अन्ते करोडोन्द पत्यारु मलेर”। इदे पूरात्रेद् गा ई सि अय कलीसियकि जिमाद्। गोसाञ्यिद् तंगेन बीकयाद् अदेत बारात देसिकि गोट क़ॆपनो अन्ते सहरेनो कलीसियान इदयाह्, आलग्केह् आह् अनेके अमट असोल बिसापे, मसि सेवके, प्रचारके, अन्ते अब्बा बिसाप मॆन्जेकेह् अपोकार सबान तॆंग़ेनो, मलेरिन गोसाञ्यि बहाक ओन्द्रेनो अन्ते कलीसियान इदेनो एड़ु नमुना मॆन्जेके डॊकिह्।
वि बि एस चामे 2026
दिन 5 – डग्रहान्ते किरा
बाइबिल पाटेद्: यूना 3:5-10
मनन वचनेद्: नीम निमकि पापेन्ते गुमेनारकेर गोसाञ्यि बहाक किरकेर बरा, अन्दे से आद् निमकि पापेन माप ननेनिद्। तॆयुव्रुरकि 3:19
मनन वचनेन सिकात्र पदिद्:
जॆजुव्र सबाद्: नीनेवे सहरे मॆस्पोतोमिया देसिकि मचे सहरेद् (जर्मार्प 1:11) असूरेकि राजदानि सहरेद्। ई सहरेनो डग्रहाद् अन्ते पापेद् निन्दपेद् मॆन्जाद्। यूना 1:2 सहरेकि पादेx अन्ते डग्रहाद् आ मलेरिन डग्रहा उजेक तुकयाद्। अन्ते आ अमलेकि इस्तार आनुव्रु गोसाञ्यिकि नादेद् हों अनो बॆच्चाद्। आलग्कि ई सहरेनो गोसाञ्यित गिनारपे नादेन ऎड़वे अन्ते डग्रहा-उजेद् हों बेसि चलारयाद्। गोसाञ्यिद् नीनेवे सहरेकि डग्रहा पापेन टुन्डकिद् दुक्रारयाद्। आ मलेर पापेन्ते गुमेनारोति मॆनिद् आञ्य गोसाञ्यिद् उगलेचाद्।
नीनेवेकि मलेरिन आबेरकि डग्रहान्ते बाचात्रकिद् आबेरिक पाक उजेन चियोति गोसाञ्यिद् उगलेचाद्; आलग्कि गुमेनारेकि सबान तॆंग़ोति यूना नबिन गोसाञ्यिद् ई सहरेक तॆयाद्। यूना नबिह् आबेरिन इयहेत्रले, सहरेकि आड़ग़रेन एदले आबेरिक गुमेनारेकि जक़्रोन सिकात्रयाह्।
आ देसिकि राजाह् अन्ते गोट मलेर हों ताम ताम तमकि डग्रहा पापेन अन्ते बाना काजेन अम्ब्बकेर किरोति अन्ते गुमेनारोति उकम ननुव्रयार। उकमेन मानचकेर गोसाञ्यिन पत्यारयार। यूना 3:5 उपासि मॆन्जेकेर, पोदक़लो, उगलित सुम्ब्रारकेर गोसाञ्यिकि दॆयान क़क़्क़ार। यूना 3:10 उपासिद् गा लपाबलो डॊकेद् दूरे मला जे आद् डग्रहान अम्बके गोसाञ्यि बहाक किरेद्। नीनेवे सहरेकि मलेर डग्रहान अम्बकेर गोसाञ्यि बहाक किरयार।
इने नाम इन्द-इन्द्र डग्रहान अम्बोति मॆनिद्? आ अमलेनो डॊकुर अन्ते इनोरतेरिन हों पुन जमानेकि (मोबाइलेकि) डग्रहाद् बराबर राजननिद्। आलग्कचकि क़नकि लालचिन अम्बके गोसाञ्यि बहाक किरोति नमकि क़नु कलवारि क्रूसेन टुन्डान्देद्।
नादेन ऎड़वेद्, लंगविद्, बानापोग़ोलेद्, जाहों क़ावेद्, दलयारेद्, इकेसिद्, रॊकेद्, कानि ओजेद्, लालचिद्, पेसाकि लालचिद्, डपटाद्, पसयेत्रेद्, कड़क़ेद् विरुदेनो क़ावेद्, ई चोव डग्रहान अम्बकेर नीनेवे सहरेकि मलेर गोसाञ्यि बहाक किरयार आ चोव नाम हों नमेन सोपयेत। नमकि गुमेनारेद् नमकि सरापेन बदलेत्रेनिद्। यूना 3:10
ओंग्र सबाद्: बाचारेद् इस्रायेल मलेरकि दूरे मला, जे तमकि डग्रहान अम्बकेर गोसाञ्यि बहाक किरु गोट मलेरकिद्। नीनेवे मलेरकि गुमेनारेद् अन्ते गोसाञ्यिकि चॆंग़जेन नाम गोट पहरा उगलारोति मॆनिद्।
दिन 5 – यूना हितिहास
चित्र 28 – ई कब्रेद् नीनेवेकि राजाक अड़सको, मूला मलेर गुनि मॆन्ज ओच्र नक़ा। इस्राएल गोसाञ्यि प्तेनो
चित्र 29 – आह् तंग्कि राज-कन्डोन्ते चोचाह् अन्ते तंग्कि राज-पिन्देड़ेन पुचयाह्, अन्ते तान टाटेन चूचेकेह् ओड़मेनो ओकेतयाह्। अन्ते आह् नीनेवेनो राज-मॆन्त्रपेन, तंग अन्ते तंग्कि कोटवारेरकि उकम चोव, ईञ्य मॆन्त्रयाह्: गोट मलेर, जानवरेद्, ऒयु-बड़देद् अन्ते गहन्डिद्, गोटेदि इन्द्रे गोटे टट एरोमान्देद्; आबेरिक इन्द्रे गोटे लपोति बा अमे ऒनोति हों बॆहोमलाद्। मलेर अन्ते जानवरेद् टाटेन ऒंग्रान्देर, अन्ते आबेर गोसाञ्यिन बॆडोहि सडित सुम्ब्रारान्देर, गोटेरि अंगेमंगे डग्रहा पावेन्ते अन्ते तमकि टॆटुत कुदु डपटा काजेन्ते गुमेनारान्देर। 9 नेद् आग़िद्? इन्द्राग़ि गोसाञ्यिद् तंग्कि उगलिन बदलेचकिद् तंग्कि रॊकेन किरत्रलिद्।
चित्र 30 – आबेर तमकि डग्रहा पावेन्ते गुमेनारयार अदे गोसाञ्यिद् टुन्डयाद् अदेनो, आद् आबेरि मॆचे उटत्रेन आन ओजयाद् आव आव दुक पन्तेनो तंग्कि उगलिन बदलेचाद् अन्ते अदे कुदोति अम्बयाद्।
चित्र 31 – यूना इदेत गड़हि क़ोपलयाह्, अन्ते आह् रॊकारयाह्। आह् यॆहोवान सुम्ब्रारनेह् अवडयाह्, ओ यॆहोवा, एन ऎंग देसिनो डोक्केन अदेनो, इदिनि से अवडलेकेन अन्दे यान्?
मिसनरि क़ेरि – कार्ल पेक्कर
मूल सबाद्: नीन ऎंगे एड़ु पड़ायिन क़टनो, ऎंग्कि उजेन निंगे सोपचले निंग्कि काजेन कुदेन आञ्य गोसाञ्यि बहानो अंगोचारले अदिन अम्बाबलो अन्ते डग्रहान गिनारले सोहजा जुगा जुगि उजेक किरेद्।
मक़ पहरा अन्ते पड़ायिद्
कार्ल पेक्कर एन्डोन्द कीड़वा अडानो कुन्दयाह्। आह् तंग्कि इस्कूल पड़ायिन ओंगयाह् अदि क़ोक़ कोलेजेक ऎक्केह् पड़योति पेसाबलो जवालार डॊकयाह्। तम्बाकोह् मला, आलग्केह् आह् तंग्कि रन्डयनि तॆहोन अन्ते बटगनि उन्डग़लनिन हों पोसयोति लग्केह् मॊटो लोहा दुकानेनो काजेन कुदयाह्। आ बेरनित जोका जोका पेसान तुन्ग़ाह् अन्ते तंग्कि मन्द्र पड़ायि लग्केह् कोलेजेनो सुरु पिसेन चिचाह्। आ पहरा गोसाञ्यि बहानो ईञ्य अंगोचारयाह्, “नीन ऎंगे एड़ु पड़ायिन क़टनो, एन ऎंग्कि उजेन निंगे सोपचले निंग्कि काजेन कुदेन।
1916नो आह् 22 बचेरि उम्रताव मॆन्जाह्। अन्ते आह् पिलतेलपिया कोलेजेनो मन्द्र पड़ायिन पड़च डोकयाह् अदेनो क़ेक़लकि मॊटो लड़ायि चलार बॆच्चाद्। आ लड़ायिनो नुन्जुव्रयार आबेरिन मन्द्र ननोति गाड़े डाक्टरेरकि जक़्रो मॆन्जाद्। आ चोव सगाबॆयु पड़च डॊकु डाकटरेरकि अन्दाड़े पड़ायिद् क़क़ुव्रयाद्। अन्ते लपेद् अन्ते डॊकोति होस्टलेन हों सगाबॆचार। आलग्केह् कार्ल पेक्कर पोपड़ात तंग्कि मन्द्र पड़ायिन पूरात्रयाह्।
बिहाद् अन्ते गोसाञ्यि काज लग्कि चिटिद्
1922नो मरिया बायिन बिहा ननयाह्। बिहा पहरा तान गोसाञ्यि बहानो अंगोचारयाह् अदे तॆंग़केह् तंगे ईसु मसिह् दूरे पॆहल जक़्रो आञ्य बुजात्रयाह्। अदे मरिया बायिद् हों लॆग-लॆगात्रयाद्। बिहा क़ोक़ अमेरिका देसिनो पयर सहरेनो डाकटर काजेन कुदे डॊकयाह्। आह् एड़ु डाकटरे आञ्य आटि पाटि मलेर अवडयार। चारलस हार्लबोर्ट मिसनरि बहान्ते गोसाञ्यि काजे लग्कि एन्डोन्द चिटिन क़क़्क़ाह्।
बीकुव्रपेक सबान दरयोलाह्
आप्रिकाकि कास्को जगेनो चारलस बयाकि बहु एलिसबेत मोर्स हालबोर्ट डाकटर काजेन कुदे डॊकयाद्। आद् अचकाहि कॆचाद् आलग्केर आटिनो मन्द्र काज लग्केर डाकटरेरकि जक़्रो मॆन्जाद् आञ्य आ चिटिनो कुर्कपे मॆन्जाद्। कार्ल पेक्कर एकोति उगलेचाह्। जे तंग्कि तॆहोकि पचग पहरानो अदे जोगयोति मॆनिद् आनकेह् तान आप्रिका देसिक मिसनरि मॆन्जेकेह् एकोति पोलेह् अदे चिटि पावेत आग़त्रयाह्। जे आ चारलस बया नन्दु नन्दु चिटि कुर्कले बुजात्रयाह् अन्ते कार्ल पेक्कर बया 1928 बचेरिनो तंग्कि एड़ु काजे कमयेन अम्बकेह्, गोसाञ्यि लग्केह् आप्रिका देसिकि डडेनो डॊकले काजेन कुदोति एकयाह्।
काटवानो पॆहला प्रचार काजेद्:
आप्रिका देसिकि कासको डडेनो काटवा आनुव्र जगेनो अगदु डॊक्केह् गोसाञ्यिकि काजेन सुरु ननयाह्। अनो कमिर अडानो से डॊकपो मॆन्जाद्। कार्ल पेक्कर बायिकि डानि मेरि बायि आ कमिर अडान सजात्रकिद् मीन्जो ननयाद्। 6 बजेरि आटिनो डोक्केह् गोसाञ्यिकि दुलेलिन मलेरिक बिलचाह्।
हास्पताल अडान इदेद् अन्ते पाक दिनेन मानयेद्
1934नो ओसा आनुव्र जगेनो एन्डोन्द जोका हास्पताल अडान इदयाह्। अन्ते इटुरि डडेकि मलेर सगाबॆचार। दिनोन्देनो 200 जॆनेर आटि पाटि क़ॆपिन्ते ई हास्पतालेक बरचार अन्ते नॆकुव्रयार। सुगिन क़क़ोति बरु मलेरिक गोसाञ्यिकि दुलेलि अपोकार सबान तॆंग़ार। क़ॆपकि डग्रहा परानिद् अन्ते गुरु मलेरकि काजेन्ते आ मलेरिन कार्ल पेक्कर बया मन्द्र काजेत अन्ते गोसाञ्यिकि दुलेलित बाचात्रोति पारचाह्। डाकटर काजेनो गाड़े पहरान करचेत्रनो गोटे सनिचार अन्ते इतवारेनो गोट पहरान प्रचार काज लग्केर करचेत्रयार।
अपोकार सबाम सहि तरिकानो मलेरिन सिकात्रयार। आह् तानहि चित्र-किताबेन मेन्जयाह् अन्ते क़ेरि पावेत सिकात्रयाह्। अदेत आ मलेरिन अपोकार सबान तॆंग़ोति ट्रेनिंग चिचाह्। मलेर हों आ चित्र किताब पावेत एड़ु अपोकार सबान ननेरिन तॆंग़ोति पारचार अदेत कार्ल पेक्कर बया ऎसा अपोकारयाह्।
आह् तंग्कि डाकटर काज पन्तेनो इन्देकेह् अवडयाह् “ईसु मसिकि अगदु योहन्ना बापतिस्मेयु इकनानि ओरयेत्रले चिचाह्, आ चोव ऎंग्कि ई डाकटर काजेद् हों ई मलेरिक एन अपोकार सबान तॆंग़ोति अन्ते अदे आबेर उगलि बिच्रले मॆनोति हों सगाबॆयिद्” आञ्य अवडयाह्। तान उजिह् आ जगेनो गोसाञ्यिन ननेर संगाल गुनेन ओजोति तंगे हों कुदपो जिमाद् बॆहिद् अदे अक़्क़ेह् काजेन कुदयाह्।
मुगड़ रॊग-तावेर मजि मन्द्र-काजेद्
इटूर डडेनो डॊकु मुगड़-रोगतावेर कार्ल पेक्करकि डाक्टर काजेन अक़्क़ेह् इलाजे लग्केर बरचार। अदो उजनो इन्द्रगोटे काजेक बरोलाद् आञ्य बेवानो गिनारुव्रपेरिक अहिकि दुलेलि अन्ते चॆंग़जेद्, दॆयाद् उजेनो एन्डोन्द अपोकिन अन्ते पुन मतलबेन क़टयाद्। आबेरिन्ते 1000 न्ते गोड़ेर मसिक कोरचार। दिनेनि पत्यारुरकि लॆकयेद् बड़ार एकयाद् आलग्केह् 1100 हेकड़ जगेन मुगड़ो रोगतावेर लग्कि हास्पलालेन मॆन्जयाह्। अन्ते अदेनो 4000 जॆन मुगड़ो रोगतावेरिन डॊकत्रयाह्। अन्ते मन्द्र ननयाह्। मुगड़ो रोग पन्तेनो पड़ायि ननुर हों अमेरिका देसिन्ते अहि बहाक ऎक्केर, आ मलेर संगाल डोक्केर गाड़े पड़ायिनो अगुवारयार। बचेरि ताड़े ओसा हास्पतालेनो कार्ल पेक्कर 4000 आप्रेसनेन अन्ते 500 मक़ेरिन कुन्दत्र पहरा सगाबेच्चाह्। आ एनोन्द गाड़े कुरुमुट ननयाह् अको? म्बा।
पगला मलेरिन जोगयेद्
पगलारपेर आप्रिकानो बूतेत दरवार्प मलेर आञ्य अडामलेरित अन्ते बेवात गिनारुव्रकेर एकलेत्रव्रयार। जॆ कार्ल पेक्कर बया तंग्कि हास्पतालेनो पगलारपेरिन ओन्द्रले इलाज ननयाह्। आप्रिका देसिनो गोटेन्ते पॆहला पगला-मलेरकि हास्पताले ईद हि मॆन्जाद्।
1960नो देसिकि बाचारे लग्कि मॆन्जाद् आ लड़ायिनो सिम्बास गोरिला मलेर कार्ल पेक्कर बयाकि अडान, हास्पतालेन कोटयार। तान बाचारोति पूरब आप्रिकाक ऎक्केह् अदेसि बचेरि डॊकयाह्। अन्ते संस्ताद् ई बयान 70 बचेरि आव मॆन्जाह् आलग्केह् अराम मॆनोति अवड़को गोटे तंग देसिक किरोति अम्बयाह्। आप्रिका देसि ऎंग्कि देसिद्, अमेरिका किरकेन एकोति उगलेयोकेन अन्ते अरा, मॆनोकेन हों आनकेह् अम्बाबलो गोसाञ्यि लग्केह् काजेन कुदयाह्। अन्ते ऎंगे इने आक्रि दिने मॆन्नो गोटे अदे एन काटिनो करचेत्रेनला आञ्य अरिगरि अवड सॆंगयाह्।
ओसानो लड़ायिद् ओंग्र क़ोक़ पूरबेन्ते ओसाक किरयाह्। अनो गोरिल्ला मलेर नास ननयार आ अडान अन्ते हास्पतालेन सरयेत्रकेह पुन लॆहात्रयाह्। आ काजेन ओंगोति बचेरोन्द मॆन्जाद्, तानिगोटे तकाराबलो काजेन पूरात्रयाह्।
गोसाञ्यि लग्कि क़ोयद् अन्ते सोपयेद्
1966नो तीन क़ेप कार्ल पेक्कर बया बुकु-नुनजेत बा उगलि कोन्डाकि रोगेत जवालारयाह्। जे सरयार क़ोक़ अदो काजेन कुदयाह्। तंग्कि 83 मा उम्रेनो कासको एरियान्ते नन्दु अमेरिका देसिक किरयाह् अन्ते अनो ‘मन्द्र पावेत अपोकार सबान तॆंग़ु सॆन्टरेन सुरु ननयाह्। अदि पावेत गाड़ेरिक ट्रेनिंगेन चिचले मिसनरि बनात्रकेह् आप्रिका देसिक तॆयाह्।
60 बचेरि मन्द्र पावेत डाकटर मिसनरि मॆन्जेकेह् काजेन कुदयाह्। आ कार्ल पेक्कर बया पन्तेनो ओर्त कासको मलेह् “गाड़े मिसनरिर ईसु मसि पन्तेनो ऎमेन सिकात्रयार, प्रचार ननयार जे कार्ल पेक्कर ईसु मसि चोव उजकेह् एदयाह्” आञ्य गोहायिन तॆंग़ाह्।
सोचयोति
जोक़्रोतानि ई देसिनो निंग्कि पड़ायिन, बड़ेन गोसाञ्यिकि काज लग्कि काजेक ओन्द्रा गोसाञ्यि लग्कि गाड़ेरिन संगालेरिन मेन्जोति गोसाञ्यिद् इने निंगेन बीकिद्।