चामे 10

गोसाञ्यिकि सगार लग्कि सुम्ब्रारेद्

1 ओ यॆहोवा, नीन इन्द्रिक गॆचि इलनि? ऎमकि दुक गरि नीन इन्द्रिक नुडग़रनि?

2 डग्रहारकि दलयारेत दुकतार गाड़े दुक्रारनेर; आबेर ओत्रयार आ बान्देनो तामि दरुव्रान्देर।

3 डग्रहाह् गा तंग्कि उगलि मड़ेनो दलयारिह्, अन्ते लालचारुह् यॆहोवान डॆंगसेयिह् अन्ते पोद्रेयिह्।*

4 डग्रहाह् तंग्कि दलयारेनो यॆहोवान बॆदोमलाह् अन्ते आह् तंग्कि उगलिनो गोसाञ्यिद् मलाद्, आनिह्।

5 अहिकि गोट पावुद् जुगेक तनयारपेद्। निंग्कि सबान-आदेद् अहि क़नन्ते गाड़ेहि मॆचगेद्; आह् तंग्कि गोट राडेरि अगदु अड्रिह्।

6 आह् तंगेनो अवडिह्, एन इकोन्नो गोटे अबड़ारेन मला; एन इकोन्नो गोटे काकलिनो डॊकेन मला।

7 अहि तोरोनो सरापेयेद्, टगयेद् अन्ते डपटाद् निन्दपेद्; अहि तड़ते क़ोलग़रनो काकलेत्रेद् अन्ते बानाद् कॊडिद्।

8 आह् क़ॆप गोदानो अटेन ओकिह्, नुडग़र्पो जगेनो आह् टडाबलोन पिटिह्; आह् सगाबेयबलोरिन क़लवो बॆडो क़ने एरकेह् डॊकिह्।

9 कोसेद् तंग सुम्बिनो पतग़रकिद् ओकिद् आ चोव, आह् जरेन्ते लुलग़रकेह् बोंग़िह्। आह् दुकता मॆचे बेग उट्रोति बांग़िह्; आह् दुकतान अरग़ेनो अरग़त्रकेह् अहिन दरयिह्।

10 सगारबलोर पोलकेर उट्रनेर, दुकतार अहिकि बड़येत उट्रनेर।

11 डग्रहा मलेर तम उगलिनो अवडनेर, गोसाञ्यिद् अदे मोहरयाद्; आद् तंग मुद्रान उटिद्; आद् ऎमेन इकोन्नो गोटे टुन्डेनिद् मला।

12 ओ यॆहोवा, चोया अन्ते निंग बड़िन चोयत्रा; ओ गोसाञ्यि, दुकतारिन मोहरोमा।

13 डग्रहाह् गोसाञ्यिन इन्द्रिक पोद्रेयिह्? आह् तंग उगलिनो अवडिह्, आद् ऎंगेन सजा ननेनिद् मला।

14 जे नीन टुन्डनि; नीन गा काकलिन अन्ते उगलि-सारारेन टुन्डनि, अन्ते अदिकि तॊड़ेन निंग्कि टॆटुत ओयलि। दुकताह् गा निंगेनि ओडग़रिह्; नीनि से इन्ज-क़देरिन लान्डु।

15 डग्रहारकि अन्ते बानारकि बड़िन तुड़ग़ा; आबेर तमकि डग्रहान अदो कुदोमलार अनोन्द अमट आबेरकि डग्रहान बॆदकि अन्डेकि आबेरिन सजा नना।

16 यॆहोवाद् जुगा-जुगि राजाद्; नन गोसाञ्यिरिन ऎड़वु परि-तोकार अदिकि क़ेक़लेन्ते क़ॆरम्रेर।

17 ओ यॆहोवा, नीन दुक्रारुरकि सुम्ब्रारेन मॆन्जेकि; नीन आबेरकि उगलिन बड़येत्रेनि। 18 क़जेत मेन्जप मलेह् अदो डपतारलोह् अदिक, नीन इन्ज-क़देरकि अन्ते दुक्रारपेरकि सबान आजवि आदोति आबेरकि कूक्रपेन क़ॆदवे तॆयेकि मॆनेनि।


 *१०:३ बा: आह् लालचारुन आसिक ननिह्।

Shopping Cart
error: Content is protected !!