1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22, 23, 24.
20
बाचार्पो सहर गहन्डिद्
1 अनि यॆहोवाद् योसूवान इदिन अवडयाद्,
2 इस्राएलेरिन ईञ्य अवडा: एन मूसा पावे निमेन अवडकेन आ चोव, बाचार्पो सहरेन ओकत्रोति अवडा,
3 अन्दे से अनो मलेन काना-बेलि बा आग़ाबलो पिटुह् बोंग़क़ेह् बाचारले; अन्ते आ सहरेद् निमे तॊड़ेने ओयुकि टॆटुन्ते बाचारकेह् बोंग़ोति बाचार्पो मॆनेनिद्।
4 अन्ते इकेह् गोटे आ चोव सहरेकि एन्डोन्देक बोंग़ेह्, अन्ते आह् आ सहरेकि कोरपोनो इलान्देह्, अन्ते आह् आ सहरेकि बॆडवोरिन तंग्कि अवालेन कोलकेह् तॆंग़ान्देह्; अनि बॆडवोर अहिन सहर उले कोरत्रकेर तम मजि डॊकोति अहिक बहान चियेर।
5 अन्ते तॊड़ेन ओयुह् अहिन अक्र अड़सिह् तानि, आबेर अहिन ओत्रकेर सोपयोमान्देर, आह् गा तंग क़ॆपोन आग़ाबलो हि पिटयाह्, अन्ते अगदुहि अहिन नमग़रकेह् डोकलाह्।
6 आ मल-पिटुह् तुन्ग़र्पेरि अगदु सबान-आदेक बीकुव्रोमलाह् अमट, अन्ते आ जॊगति ऎड़वु-मजयेह् कॆयिह् आ अमट आ नगरेनिहि डॊकेह्; अदि क़ॊक़ जानि आ मल-पिटुह् तान बोंग़ाह् आ अडाक अन्ते नगरेक नन्दु किरेह्।
7 अन्देकेर आबेर नपतालिकि पहाड़-पटा गलिलेनो ओकु केदेसेन, ऎप्रायिमेकि पहाड़-पटानो ओकु सॆकेमेन, अन्ते यिहुदाकि पहाड़-पटानो ओकु हॆब्रोन नामि किर्यत-अरबान हों क़ाड़यार।
8 अन्ते यॆरीहोनो ओकु यरदानेकि आ पारे बेर-अरगो रूबेन-पलकाक बॆहु बहयारेकि डडेनो ओकु बेसेर सहरेन, गाद पलकाक बॆहु गिलयादेनो ओकु रामोत सहरेन, अन्ते मनास्से पलकाक बॆहु बासानेनो ओकु गोलानेन हों टहरेत्रयार।
9 मलेन काना-बेलि पिटुह् नेह् गोटे तुन्ग़र्पेरि अगदु सबान-आदेक बीकुव्रोमलाह् अमट, क़ेसुकि तॊड़ेन ओयुकि टॆटुत आ मल-पिटुह् पिटुव्रलोह् अन्ते आह् बोंग़ एक्केह् बाचारले अदिक, इस्राएलेर गोटेरि, अन्ते आबेरि मजि डॊकु परि-देसि मलेरि लग्कि हों क़ाड़ग़र्प सहर गहन्डिद् ईव ईवेदि से।