1, 2, 3, 4, 5, 6, 7, 8.
सुलेमानेकि कटप मीन्जो चामेद्
अगरते सबाद्
सुलेमानेकि कटप मीन्जो चामे किताबेद् दुलेलेत्र-चामे गहन्डिकिद्, गड़हि चामे गहन्डिद् मलेह् पेलि बजो अन्ते पेलि मले बजो मोहारकेर पाड़प चामेद्। इब्रानि सबानो सुलेमानेकि नामित बीकुव्रु ई किताबेद् सुलेमानेकि चामेद् आनुव्रिद्।
ईव ईव चामे गहन्डिद् इस्राएलेरित गोसाञ्यि अन्ते अदिकि मलेरि मजि बॆहु संगालिन एदु बान्गि सबाद् आञ्य बुजारनेर, अन्ते मसिन पत्यारुर मसि अन्ते कलीसिया मजि बॆहु संगालिन एदु बान्गि सबाद् आञ्य बुजारनेर।
इन्द इन्द्रद्
पॆहला चामे १:१—२:७
दूसरा चामे २:८—३:५
तीसरा चामे ३:६—५:१
चवता चामे ५:२—६:३
पचमा चामे ६:४—८:४
चटमा चामे ८:५–१४
1
1 ईद् सुलेमानेकि पाड़प कटप मीन्जो चामेद्।
पॆहला चामे
पेलिद्
2 नीन निंग्कि तोरोकि चुमक़ेत ऎंगेन चुमक़ा*; निंग्कि मड़ मॆनेद् गा अंगूर-रसेन्ते कटप सोहानेद्! 3 निंग्कि महमहरो इसग़नुद् अपोकेत्रुद्, निंग्कि नामिद् पुदयप महमहरो इसग़नु चोवेद्, आ लग्केर बटगनिर निंगेन मड़ मॆननेर। 4 ऎंगेन निंग गुनि बन्देके ओया, लॆगा नाम बोंग़ेत; राजाह् ऎंगेन तंग्कि कोटलिक क़ेन्दकेह् ओचाह्।
पेलेर
लॆगा नाम अपोकारेत अन्ते निमकि मड़ मॆननो अपोकार लंगारेत। निंग्कि मड़ मॆनेत अंगूर रसेन कटत्रकेम पोग़ोलेत्रोम, गोट पेलेर निंगेनि से मड़ मॆननेर। 5 ओ यॆरुसलेमेकि पेलेर, केदारेकि पन्त्र जगे बागु तम्बु* चोव मड़ग़रोन, जे सुलेमानेकि राजमहलेनो बॆहु पड़दा चोव क़ॆसग़रोन। 6 एन मड़ग़रोन आ लग्केर ऎंगेन टुन्डोमा, इकनिकि बेरुद् ऎंगेन मड़ग़त्रयाद्। ऎंग उन्डग़लेर ऎंगेन रॊकारकेर ऎंगेन अंगूर-बगिचान क़ापु चोव डोकत्रयार; जे एन ऎंग्कि अंगूर-बगिचान* क़ापलेकेन। 7 ओ ऎंग्कि उगलिद् मड़ मॆनु दुलेलि, निंग्कि गहन्डिन इकानो चरात्रेने? नीन अदे इकानो कुक-चाप पहरानो कॊडत्रेने? ऎंगेन तॆंग़ा; ऎंगे निंग्कि संगालेरकि गहन्डि मजि चर्च कुदु* चोव डॊकोति इन्द्राञ्य बॆहिद्?
मलेह्
8 ओ पेलेरि मजि क़ॆसग़रो, आ जगेन नीन अन्डोमलेकि तानि, गहन्डिकि उस्वेन एड़कि काला, अन्ते बेडि-आवेरकि तम्बु अटगि निंग्कि बेडि-मक़ोन चरात्रा। 9 ओ ऎंग्कि दुलेलि, एन निंगेन परुनेकि लड़ायि-गाड़िनो लगात्रप मीन्जो गोड़ो गुनि जोकात्रिन। 10 निंग्कि साज-बाजेत साजप निंग्कि गलाद्, अन्ते पूनुत पूनप निंग्कि क़स्रुद् मीन्जोद्। 11 एन रुपाकि चिकमिक्रो चाच-मक़ो गहन्डित कुनयप सोनाकि साज-बाजेन निंग लग्केन मेन्जेन।
पेलिद्
12 राजाह् तंग्कि बॊजेनो ओकनो* ऎंग्कि मुर महमहरो इसग़नुद् तंग्कि चॆञ्येत महमहरयाद्। 13 ऎंग दुलेलिह् ऎंग्कि दूद मजि कॊडु मुर-चॆञ्येकि जोला-मक़ो चोवेह्। 14 ऎंग दुलेलिह् ऎंगे ऎनगेदिकि* अंगूर-बगिचानो पूदु मॆहन्दिकि तोपा चोवेह्।
मलेह्
15 ओ ऎंग दुलेलि, नीन क़ॆसग़रो! नीन क़ॆसग़रो! निंग्कि क़नुद् पॆरवाकि क़नु देनेद्।
पेलिद्
16 ओ ऎंग दुलेलि! नीन अपोकेत्रु! टुन्डा, नमकि साजिद् क़ेन-क़ज्रोद्। 17 नम अडाकि गुमो-कुटि गहन्डिद् सरो मनुकिद्, नमकि मॆसगेद् गोपार मनुकिद्।
2
मलेह्
1 एन सारोनेकि* गुलाब चोवेन, अन्ते दॊनि गहन्डिकि सोसने पूपु चोवेन।
2 अचु गहन्डि मजि सोसने पूपुद् बॆहिद् आ चोवहि, ऎंग्कि दुलेलिद् बटगनिरि मजि क़ॆसग़रोद्।
पेलिद्
3 डडेकि मनु गहन्डि मजि सेब मनुद् इलिद् आ चोवहि, ऎंग्कि दुलेलिह् दंगड़ियारि मजि डॊकिह्; एन अदिकि जुडानो गड़हि अपोकारले ओकिन, अन्ते अदिकि क़न्जपेद् ऎंग्कि टट एरेक ऎम्बेद्। 4 आह् ऎंगेन बॊज-कोटलिक क़ेन्दकेह् ओचाह्, अन्ते ऎंग मॆचे चोयत्रपेद् अहिकि मड़ मॆनेकि जन्डिदि से। 5 क़ायप अंगूरेत ऎंगेन क़ॆमडा, सेब क़न्जपेत ऎंगेन बज्रेत्रा; एन गा मड़ मॆन लग्केन नप्रान। 6 अहिकि लॆट्रा टॆटुद् ऎंग्कि कुक क़ोलग़रनो बॆहिद्, अन्ते अहिकि तिना टॆटुद् ऎंगेन बंगड़ेयिद्।
मलेह्
7 ओ यॆरुसलेमेकि पेलेर, नीम एन अपोकेत्र नक़ अमट ऎमकि मड़ मॆनेन ऎजत्रलोर बा चोयत्रलोर अदिक, ऎंगेन क़दक़ोडोति चंजु अन्ते क़व्रो चंजुकि नामिन पॆतेकेन मॆनिन।
दूसरा चामे
पेलिद्
8 ईद् ऎंग दुलेलिकि सडिद्! टुन्डा, आह् पहाड़ेनो बेगले अन्ते टॊकेनो लंगयले ऎंग बहाक बरिह्। 9 ऎंग्कि दुलेलिह् चंजु अन्ते क़व्रो चंजु-मक़ो चोवेह्। नाह् ऎमकि दॆवालिकि दुवारिनो इजेकेह् किड़कि पावे टुन्डिह् अन्ते टटयपे पावे तंग्कि मुद्रान क़ने तॆयिह्। 10 ऎंग दुलेलिह् ऎंगेन अवडिह्,
मलेह्
ओ ऎंग्कि दुलेलि, ओ ऎंग्कि क़ॆसग़रो, चोचेकि बरोवा। 11 टुन्डा, पन्य जॊगेद् कटयाद्, जड़ाद् तमारकिद् एकयाद्। 12 क़ेक़लनो पूपुद् एत्रिद्, पुजुकि पाड़ पहराद् अड़सयाद्, क़व्रो पॆरवाकि सडिद् नम देसिनो मॆन्द्रिद्। 13 डुम्बेरि मनुद् क़न्जत्रपेद्, अन्ते अंगूर-क़न्हेद् एग्रकिद् चॆञ्येन महमहरिद्। ओ ऎंग्कि दुलेलि, ऎंग्कि क़ॆसग़रो, चोचेकि बरोवा। 14 ओ गोगाकि कोलर्पेनो, टॊक कूड़ेकि, क़ॊरुकि नुडग़र्प जगेनो डॊकु ऎंग पॆरवा, निंग्कि मुद्रान ऎंगे एदा, निंग्कि सडिन ऎंगेन मॆन्त्रा; निंग्कि सडिद् गा ऎम्बेद्, अन्ते निंग्कि मुद्राद् क़ॆसग़रोद्। 15 अंगूर-बगिचान डग्रेयु चिगालो गहन्डिन अन्ते चिगालो-मक़ो गहन्डिन* दरया, नमकि अंगूर बगिचाद् गा एग्रपेद्।
पेलिद्
16 ऎंग दुलेलिह् ऎंग्किह् अन्ते एन अहिकिन; आह् सोसने पूपु गहन्डि मजि चरारिह्। 17 ओ ऎंग दुलेलि, माक़ोन्देकि पहराद् अड़स अन्ते ऊक़ेद् मसग़ अमट नीन किरके बरोवा, अन्ते क़ाड़प टॊकेनो बेगले बरु चंजु अन्ते चंजु-मक़ो चोव मॆना।
3
1 माक़े ऎंग्कि साजिनो ऎंग्कि उगलिद् मड़ मॆनिद् अहिन एन बॆदकेन; बॆदकेन अन्ते गोटे, एन अहिन अन्डलेकेन। 2 एन ऎंगेनो हि अवडकेन, एन अनेके चोचेकेन सहरेकि सड़केनो अन्ते पावु-कूड़ेनो चर्च कुदकेन ऎंग्कि उगलिद् मड़ मॆनिद् अहिन बॆदेन; बॆदकेन अन्ते गोटे, एन अहिन अन्डलेकेन। 3 सहरेनो चर्च कुदु क़ापुर ऎंगेन टुन्डयार। एन आबेरिन मॆन्जेकेन, नीम ऎंग्कि उगलिद् मड़ मॆनिद् अहिन टुन्डकेर आन्? 4 एन आबेरिन पुलोन्द कटकेन एक्केन आ गरिहि एन ऎंग्कि उगलिद् मड़ मॆनिद् अहिन अन्डेकेन; एन अहिन दरचकेन ऎंग अय्याकि अडाक अन्ते ऎंगेन कोचोन क़ेन्दयाद् अदिकि कोटलिक ओन्द्रकेन अमट अहिन एकत्रलेकेन। 5 ओ यॆरुसलेमेकि पेलेर, नीम एन अपोकेत्र नक़ अमट ऎमकि मड़ मॆनेन ऎजत्रलोर बा चोयत्रलोर अदिक, ऎंगेन क़दक़ोडोति चंजु अन्ते क़व्रो चंजुकि नामिन पॆतेकेन मॆनिन।
तीसरा चामे
पेलिद्
6 सूर, दुमेनि अन्ते क़ेग़ु-बीसुरकि गोट चोव महमहरो कुन्डोत मॆनु चॆञ्येकि मोग़ेकि गुमो गहन्डि चोव सुनसान डडेन्ते उरक़्क़ेह् बरिह् ईह् नेरेह्? 7 टुन्डा, ईद् तो सुलेमानेकि साजिद्! इस्राएलेकि बड़य सिपाहिरिनो तीन कॊड़ि जॆनेर अदे बेड़चकेर इलनेर। 8 ईबेर गोटेरि तड़वारिन क़ेन्दकेर लड़ायि लग्केर बाड़ितावेर; माक़ेकि ऎलच-कॊरो लग्किद् आबेरिनो ओर्तोनोन्देह् अंगेमंगे अतेरेन तंग बहानो बॆहत्रकेह् ओरयार्पेह्। 9 सुलेमान राजाह् तंग लग्केह् लॆबानोनेकि एड़ु कन्केत पलाकेन मेन्जत्रयाह्। 10 आह् अदिकि गुमो गहन्डिन रुपात, अदिकि ओक-जगेकि क़ॊक़तेन सोनात अदिकि कन्डोन क़ेसलो लुगात मेन्जत्रयाह्; अदिकि उलतेनो यॆरुसलेमेकि पेलेरित मड़ मॆनेत साजार्पेद्। 11 ओ सियोनेकि पेलेर, नीम उरक़्क़ेर सुलेमान राजान टुन्डा; अहिकि बॆद-दिनेनो, अहिकि उगलिकि कटप अपोकार दिनेनो अहिकि तॆहोद् अहिकि कुकनो अतत्रयाद् आ मुकुटेन अतपेह्।
4
मलेह्
1 नीन क़ॆसग़रो, ओ ऎंग्कि दुलेलि, नीन क़ॆसग़रो! निंग्कि उटप परदा उले निंग्कि क़नुद् पॆरवा चोवेद्; निंग्कि कुक-तलिद् गिलयाद टॊकेनो ऎतु डडि एड़े गहन्डि चोवेद्। 2 निंग्कि पलुद् चरत्र क़ॊक़ नॊड़ुव्रकि उरक़प बेडि-गहन्डि चोव जिन्प्रोद्; आ गोटेदि पदिति बॆहिद् अन्ते अदेनो एन्डोन्द गोटे ऎवजलाद्। 3 निंग्कि तॆबोद् क़ेसलो मेरु चोवेद्, अन्ते निंग्कि तोरोद् मीन्जोद्; निंग्कि उटप परदा उले बॆहु निंग्कि गलाद् अनारेकि दुकड़ेयप चोवेद्। 4 निंग्कि क़स्रुद् दाऊदेकि मटे चोव मॆचगेद् अन्ते मीन्जोद्, अदेनो अजारजॆन सिपाहिरकि डाले गहन्डि चोव चॊरु पूनुद्। 5 निंग्कि एन्डिस बुकुद् सोसने पूपु गहन्डि मजि चरारु ऒस्रे चंजुमक़ो चोवेद्। 6 माक़ोन्देकि पहराद् अड़स अन्ते ऊक़ेद् मसग़ अमट एन मुर टॊकेनो अन्ते दुमेनिकि टॊकेनो एक्केन डॊकेन। 7 ओ ऎंग दुलेलि, नीन उरेतारे क़ॆसग़रो, निंगेनो टडाद् मला। 8 लॆबानोनेन्ते ऎंग संगाल एका, ओ ऎंग बॆदुव्रु-बटगनि! लॆबानोनेन्ते ऎंग संगाल एका; अमना पहाड़ेकि क़ॊरुन्ते, सॆनीर अन्ते ऎरमोन पहाड़ेकि क़ॊरुन्ते, कोसे गहन्डिकि सुम्बिन्ते, अन्ते चीता गहन्डिकि पहाड़ गहन्डिन्ते ऎतकि बरोवा*। 9 ऎंग्कि उगलिन निंग बजे बन्दकि, ओ ऎंग नुनि! ऎंग बॆदुव्रु-बटगनि! निंग्कि क़नोन्देति अन्ते निंग्कि क़स्रुनो बॆहु पूनुकि एन्डोन्द मोतित ऎंग उगलिन निंग बजे बन्दकि। 10 निंग्कि मड़ मॆनेद् एनोपान अपोकेत्रुद्, ओ ऎंग नुनि! ओ ऎंग बॆदुव्रु-बटगनि! निंग्कि मड़ मॆनेद् अंगूर-रसेन्ते गोटे एनोपान कटप एड़ुद्! निंग्कि इसग़नुकि महमहरोद् गोट चोव दुमेनिन्ते गोटे एनोपान कटप चॆञ्येद्! 11 ओ ऎंग बॆदुव्रु-बटगनि, निंग्कि तॆबोन्ते तेनि-रसेद् टोपयिद्, निंग्कि तड़ते क़ोलग़रनो तेनि-रसेद् अन्ते दूदेद् बॆहिद्; अन्ते निंग्कि डबाकि चॆञ्येद् लॆबानोनेकि चॆञ्य चोवेद्। 12 ओ ऎंग नुनि! ओ ऎंग बॆदुव्रु-बटगनि! नीन मुचप बगिचा, बेड़यप अम-जॊरा, अन्ते मोहर ननुव्रप अम-जारा। 13 निंग्कि बगिचाद् अनारेकि किड़ुद्, कटप क़न्जु मनुद्, महमहरो किड़ुद्, क़व्र पूपुकि किड़ुद्, 14 महमहरो किड़ुद्, केसरेद्, लवंगेद्, गोट चोव महमहरो मनुद्, मुर, अन्ते ऊद मनुद्, अन्ते गोट चोव कटप एड़ु महमहरो किड़ु बॆहु मीन्जो बगिचाद्। 15 नीन बगिचान अम-जॊराद् अन्ते उजनि अम-जॊराद् अन्ते लॆबानोनेन्ते बास्रु जॊरा।
पेलिद्
16 ओ गंगा-मोहाकि ताके, ऎज्रा! ओ पर्त-मोहाकि ताके, बरा! अदिकि महमहरोद् अगारोति ऎंग्कि बगिचानो ऊरा! ऎंग्कि दुलेलिह् तंग्कि बगिचाक बरचकेह् अहिकि कटप एड़ु क़न्जपेन मॊक़ान्देह्!
5
मलेह्
1 ओ ऎंग नुनि! ओ ऎंग बॆदुव्रु-बटगनि! एन ऎंग्कि बगिचाक बरचकेन; एन ऎंग्कि मुरे अन्ते ऎंग्कि महमहरोन तुनक़्क़ेन; एन ऎंग्कि तेनिन ऎंग्कि अड़पा मादि मॊक़्क़ेन; एन अंगूर-रसेन ऎंग्कि दूद मादि ओन्डेकेन।
संगालनिर
ओ संगालेर, लपा, ओ दुलेलिर, ऒना, अन्ते मड़ मॆनेत उड़दा।
चवता चामे (५:२—६:३)
पेलिद्
2 एन क़न्द्रकेन, जे ऎंग्कि उगलिद् ऎज्रपे मॆन्जाद्; मॆना! ऎंग्कि दुलेलिकि टोक टोकत्र सडिन मॆन्जेकेन।
मलेह्
ओ ऎंग नुनि, ओ ऎंग दुलेलि, ओ ऎंग पॆरवा, ओ ऎंग सालमे टडाबलो, ऎंग लग्कि बलिन कोला; ऎंग्कि कुकुद् गा सित्रित अन्ते ऎंग्कि कुक-तलिद् माक़े पोयु जड़ा-टोपयेत पोरग़र्पेद्।
पेलिद्
3 एन ऎंग्कि अंगान इचेकेन; एन अदे इकनाञ्य नन्दु अतेन? एन ऎंग्कि क़ॆडे नॊड्रकेन; एन अदे इकनाञ्य नन्दु गिदनार्प ननेन? 4 ऎंग्कि दुलेलिह् तंग्कि टॆटुन बलिकि उदक्रो पावे ताड़चाह्, अन्ते ऎंग्कि उगलिद् अहि लग्किद् कीड़वारयाद्। 5 एन ऎंग्कि दुलेलि लग्केन बलिन कोलोति चोचेकेन, अन्ते बलिकि दरयपो गहन्डि मॆचे ऎंग्कि टॆटुन्ते मुरद्, अन्ते ऎंग्कि अंगलिन्ते महमहरो मुरद् टोपयाद्। 6 एन ऎंग्कि दुलेलि लग्केन बलिन कोलकेन, जे ऎंग दुलेलिह् डोकलाह्, उरक़ुह् मॆन्जाह्; अहिकि अवडप सबात एन क़ोन्दकेन। एन अहिन बॆदकेन जे अहिन अन्डलेकेन; एन अहिन बीक्केन जे आह् ऎंगेन अवडेकिरत्रलाह्। 7 सहरेनो चर्च कुदु क़ापुर ऎंगेन टुन्डकेर ऎंगेन बजयार अन्ते उड़ात्रयार; सहरेकि दॆवालिन क़ापु आबेर ऎंग्कि चादरेन ओचार। 8 ओ यॆरुसलेमेकि पेलेर, नीम ऎंग्कि दुलेलिन अन्डनेर तानि, अहिन आद् मड़ मॆन लग्किद् नप्राद् आनोति क़दक़ोडोति निमेन मॆनिन।
पेलेर
9 ओ पेलेरि मजि कटप क़ॆसग़रो, निंग्कि दुलेलिह् नन दुलेलिरिन्ते इन्द्रनो कटप एड़ुह्? नीन ऎमेन इन्देकि उकम ननोति निंग्कि दुलेलिह् नन दुलेलिरिन्ते इन्द्रनो कटप एड़ुह्?
पेलिद्
10 ऎंग्कि दुलेलिह् बिडयुह् अन्ते बड़येह्; अहिकि बराबॆरि नेह् गोटे मलाह्*। 11 अहिकि कुकुद् कटप एड़ु सोना चोवेद्, अहिकि कुक-तलिद् जॆक्रि, अन्ते क़ाक़े चोव मड़ग़रोद्। 12 अहिकि क़नुद् अमेत निन्दप नदि बिटेनो डॊकु, दूदेनो नॊडुव्रप पॆरवा चोवेद्, अन्ते पदिति टहरार्पेद्। 13 अहिकि गलाद् महमहरो चॆञ्यु अर-आड़ि, महमहरो पूपु गहन्डि चोवेद्, अहिकि तॆबोद् सोसने पूपु चोवेद्, अन्ते अदिन्ते महमहरो मुरेद् टोपयिद्। 14 अहिकि बड़िद् मोति गहन्डित लगार्प सोना अंगटि अतपेद्; अहिकि गन्डिद् नीलम आनुव्रु नीलग्रो चाचेत असयप अति-पलु चोव मीन्जोद्। 15 अहिकि क़ॆडुद् एड़ु सोनाकि मूलिनो इलप जिन्प्रो गुमो-कुटि चोवेद्, अहिकि मुद्राद् लॆबानोन पहाड़ चोव अन्ते सरो मनु गहन्डि चोव कटप एड़ुद्। 16 अहिकि तोरोद् कटप ऎम्बेद्, आह् उरेतारे क़ॆसग़रोह्। ईहि से ऎंग्कि दुलेलिह्, ओ यॆरुसलेमेकि पेलेर, ईहि से ऎंग्कि संगालेह्।
6
पेलेर
1 ओ पेलेरि मजि कटप क़ॆसग़रो, ऎंग्कि दुलेलिह् इकानो एकयाह्? निंग्कि दुलेलिह् इक पावे एकयाह्? एम हों निम संगाल अहिन बॆदलेम।
पेलिद्
2 ऎंग दुलेलिह् तंग्कि गहन्डिन चरात्रोति अन्ते सोसने पूपे तुन्ग़ोति तंग्कि बगिचाक, महमहरो चॆञ्यु बगिचाक एकयाह्। 3 एन ऎंग्कि दुलेलिकिन, ऎंग्कि दुलेलिह् ऎंग्किह्; आह् सोसने पूपु मजि तंग्कि गहन्डिन चरात्रिह्।
पचमा चामे
मलेह्
4 ओ ऎंग दुलेलिह्, नीन तिरज़ा सहर चोव क़ॆसग़रो, यॆरुसलेम सहर चोव मीन्जो; जन्डि उड़यार्प लस्क्रे चोव ऎलच-कॊरो। 5 निंग्कि क़ने ऎंगेन्ते तीरत्रा, आद् गा ऎंगेन मुहयिद्; निंग्कि कुक-तलिद् गिलयाद टॊकेनो ऎतु डडि एड़े गहन्डि चोवेद्। 6 निंग्कि पलुद् नॊड़ुव्रकि उरक़प बेडि-गहन्डि चोव जिन्प्रोद्; आ गोटेदि पदिति बॆहिद् अन्ते अदेनो एन्डोन्द गोटे ऎवजलाद्। 7 निंग्कि उटप परदा उले बॆहु निंग्कि गलाद् अनारेकि दुकड़ेयप चोवेद्। 8 तीन कॊड़िजॆन रानिर, अन्ते चार कॊड़िजॆन चुड पेलेर, अन्ते अदानिबलो बटगनिर डॊकलेर अको। 9 जे ऎंग पॆरवाद्, ऎंग सालमे टडाबलोद् ओर्तक़दि से; आद् तॆहोक ओर्तक़दि तंग़ादिद्; आद् तंगेन कुन्दत्रयाद् अदिक जोवाद्। गोट बटगनिर अदिन टुन्डकेर अदिन गाड़े एड़ु आनयार, रानिर अन्ते चुड-पेलेर अदिन पोग़ोलेत्रयार। 10 बिलपु चोव क़ॆसग़रो, बेरु चोव बिडयु, अन्ते जन्डि उड़यार्प लस्क्रे चोव ऎलच-कॊरो बिज-मॆरग़ि चोव बिडयु ईद् नेद्? 11 दॊनिनो क़न्जप क़न्जपेन टुन्डोति, अंगूर-क़न्हेद् चूलकिद् किड़ुद् पूदिद्, अनारेद् पुतिद् बा मला अदे हों आग़ोति बादामेकि बगिचाक एक्केन। 12 एन उगलेयिन अदेन्ते अगदुहि ऎंग्कि मड़ेद् ऎंगेन गोड़ो-गाड़िनो ऎंग्कि राज-तंग़ाद बहानो ओकेत्र चोव ननयाद्।
पेलेर
13 ओ सूलमीत-आनि, किरा, किरा! एम निंगेन टुन्डलेम अदिक, किरा, किरा!
पेलिद्
निमे सूलमीत-आनिन इन्द्रिक टुन्डोति बॆहिद्? आद् गा लस्क्रिस मजि लड डॊकिद्।
7
मलेह्
1 ओ राजा-तंग़ादि, जुतान अतप निंग्कि क़ॆडुद् एनोपान मीन्जोद्! निंग्कि बेड़यप क़ोसग़ेद् बाड़ि काजेन कुदुकि साज-बाज चोवेद्। 2 निंग्कि कुडेद् बिरग़र्प अंगूर-रसेत निन्दप गूलि कटोरि चोवेद्, निंग्कि बुडाद् सोसने पूपुत बेड़यप गोहमेकि क़ोपप चोवेद्। 3 निंग्कि एन्डिस बुकुद् ऒस्रे चंजुमक़ो चोवेद्। 4 निंग्कि क़स्रुद् अति-पलेत मेन्जप मटे चोवेद्, निंग्कि क़नुद् हॆसबोन सहरेकि बतरबीम नामि पाटके अटगि ओकु पोकारि गहन्डि चोवेद्, निंग्कि मुञ्युद् दमिस्क सहर सोहजा इलु लॆबानोनेकि मटे चोवेद्। 5 निंग्कि कुकुद् कर्मेल पहाड़ चोव सिञ्याड़िद्; निंग्कि कुक-तलिद् बिडयु क़ेसलो चोवेद्, अदिकि चरय-पिन्डा गहन्डिनो दरवार्पेह्। 6 ओ अपोकेत्रु ऎंग्कि दुलेलि, नीन एनोपान क़ॆसग़रो! नीन एनोपान मीन्जो! 7 निंग्कि मॆचगेद् तालमि मनु चोवेद्, अन्ते निंग्कि बुकुद् अंगूरेकि गोपा चोवेद्। 8 एन तालमि मनिक अरगकेन अदिकि गोपा क़न्जपेन दरयेन आनिन; अनेके हों निंग्कि बुकुद् अंगूरेकि गोपा चोव, अन्ते निंग्कि मुञ्युकि गपेद् सेब क़न्जपेकि महमहरो चोव मॆनान्देद्! 9 निंग्कि तोरोकि चुमक़ेद् तॆबो अन्ते पलु पावे जीर जीरा ऎतु कटप एड़ु अंगूर-रस चोवेद्*।
पेलिद्
10 एन ऎंग्कि दुलेलिकिन, अन्ते अहिकि मड़ेद् ऎंग मॆचेहि बॆहिद्। 11 ओ ऎंग दुलेलिह्, एका, लॆगा नाम बहयारेक उरक़ेत। लॆगा नाम क़ॆपनो डॊकेत*। 12 लॆगा नाम माक़ोन्द हि अंगूर-बगिचाक एकेत; अंगूर-क़न्हेद् चूलकिद् अदिकि पूपुद् जोप्ररिद् बा मला, अन्ते अनारेकि किड़ुद् जोप्ररिद् बा मला अदे हों टुन्डेत। आटिनोहि एन ऎंग्कि मड़ मॆनेकि अन्दाड़े चियप गहन्डिन निंगे चियेन। 13 दूदा क़न्जपेद्* महमहरिद्, नमकि बलि गहन्डि अटगि पुन अन्ते पच गोट चोव कटप एड़ु क़न्जपेद् बॆहिद्। ओ ऎंग दुलेलि, एन आव आवेन निंग लग्केन बॆहत्रकेन।
8
1 नीन मान ऎंग अय्याकि दूदेन ओन्डेके पद्रप ऎंगडो मॆनो अनि एन निंगेन सद्रि जिम्र नक़लेन अन्ते निंगेन चुमक़लेन, अन्ते नेह् गोटे ऎंगेन दापयलोह्। 2 एन निंगेन क़ेन्दकेन ऎंग अय्याकि अडाक ओयलेन, अन्ते आद् ऎंगेन सिकात्रलिद्*, एन निंगे महमहरो अंगूर-रसेन अन्ते ऎंग्कि अनारेकि रसेन हों ऒनोति चियलेन। 3 अहिकि लॆट्रा टॆटुद् ऎंग्कि कुक क़ोलग़रनो बॆहलिद्, अन्ते अहिकि तिना टॆटुद् ऎंगेन बंगड़ेयलिद्।
मलेह्
4 ओ यॆरुसलेमेकि पेलेर, नीम एन अपोकेत्र नक़ अमट ऎमकि मड़ मॆनेन ऎजत्रलोर बा चोयत्रलोर अदिक, ऎंगेन क़दक़ोडोति मॆनिन।
चटमा चामे
पेलेर
5 तंग दुलेलिन अड़ुरले सुनसान डडेन्ते बरु ईद् नेद्?
पेलिद्
सेब मनु क़ोलग़रनो एन निंगेन ऎजकेन, अदिनो हि निंग इज्जोद् निंगेन कुन्दत्रोति कुड-ओक नुन्जेत डोकयाद्; आद् तो निंगेन कुड-ओक नुन्जेत कुन्दत्रयाद्। 6 नीन ऎंगेन निंग्कि उगलिनो मोहर चोव अन्ते निंग्कि बड़िनो मोहर चोव ओजा; मड़ मॆनेद् गा कॆय चोव बड़येद्, मड़ मॆनेद् कॆयपेर जगे चोव बड़तानिद्। अदिकि नरेद् चिचकि नरे चोवेद्, अन्ते गाड़े पक्रप चिच देनेद्। 7 गड़हि अमुद् मड़ मॆनेकि चिचे तवोति पारयोमलाद्, बानि गहन्डिद् हों अदे डुंगत्रोति पारयोमलाद्; इकेह् गोटे तंग अडाकि गोट बीतेत आ मड़ मॆनेन क़ेग़ोति कुरुमुट नननो गोटे आद् उरेतारे पोद्रेयुव्रेलिद्*।
पेलिकि उन्डग़लेर
8 नमे ओर्ति चुड उन्डग़लनिद् डॊकिद्, अन्ते अदिक बुकुद् अदो जोकाद्; आद् बॆदुव्र जोकेर दिनेनो अदि लग्केत नाम इन्द्रे कुदेत? 9 आद् डड़ोन्द दॆवालिद् तानि, नाम अदि मॆचे रुपाकि मटेन मेन्जेत; जे आद् दुवारिद् तानि, अदिन सरो मनुकि पटि गहन्डित गेरचकेत जोगयेत।
पेलिद्
10 एन दॆवालिन, अन्ते ऎंग्कि बुकुद् मटे गहन्डि चोवेद्, अनि एन ऎंग दुलेलिकि क़ननो दॆयान क़क़्क़ेन*। 11 बाल-हामोन नामि जगेनो सुलेमानेक बहोन्द अंगूर-बगिचाद् बॆच्चाद्; आह् आ बगिचान सम्ब्रेयुरिक अदिकि क़न्जपे लग्कि अजारोन्द सेकेलेन* ओन्द्रोति सोपचाह्। 12 जे ऎंग्कि अंगूर-बगिचाद् ऎंग लग्कि दूरेहि से बॆहिद्; ओ सुलेमाने, आव आव अजारोन्द सुकिद् निंग्किद्, अन्ते अदिकि ई सविस सुकिद् क़न्जपेन सम्ब्रेयुरकिद्।
मलेह्
13 ओ बगिचा गहन्डिनो डॊकुर, ऎंग्कि संगालेर निंग्कि सडिन मॆन्ज डॊकनेर; ऎंगेन हों अदे मॆन्त्रा।
पेलिद्
14 ई ऎंग दुलेलि, दड़ेपड़े मॆना, अन्ते महमहरो पहाड़ गहन्डिनो डॊकु चंजु अन्ते क़व्रो चंजु-मक़ चोव मॆना।
*१:२ इब्रानिनो: आह् अहिकि तोरोकि चुमक़ेत ऎंगेन चुमक़ान्देह्।
*१:५ केदार पलका अरबेनो डोकयार आ पलका बागुर, आबेर मड़ग़रो तम्बुनो डोकु मॆन्जार। चामे १२०:५ पड़लान टुन्डा।
*१:६ अंगूर-बगिचाकि मतलबेद् जुद-जुदाद्; इनो ईद् आ पेलि पन्तेकिद्।
*१:१४ ऎनगेदिद् कॆयप-समुद्रेकि बेर-उट्रो बजो ओकु डड-पन्त्रेकि बगिचाद्, आद् मक़ेन-कुन्दत्रु सबा गुनि जोकारिद्।
*२:१ सारोनेद् इस्राएलेकि बेर-अरगोकि समुद्रे बागु जगेद्
*२:१५ चिगालोद् आ बटगनिकि मड़ मॆनेन क़क़ोति कुरुमुट ननु नन दंगड़ियारि गुनि जोकारिद्।
*५:१० बा: जिन्प्रोह् अन्ते क़ेसोह्; आह् दस अजार जॆनेरिनो सिञ्याड़ेह्।
*७:९ बा: निंग्कि तोरोद् कटप एड़ु अंगूर-रस चोव मॆनान्देद्!
*७:११ बा: क़व्रो पूपु गहन्डि मजि डॊकेत।
*७:१३ दूदा क़न्जपेद् मन्दरु बागु महमहरो क़न्जपेद्, मुन्दोति जॊगेकि मलेर इदेत मड़ मॆनेद् बडारिद् अन्ते मक़ेन कुन्दत्रेद् मेन्जग़रिद् आञ्य उगलेचार। जरमार्प ३०: १४–१६ पड़लान टुन्डा।
*८:७ बा: आह् उरेतारे पोद्रेयुव्रलेह्।
*८:१० बा: अनि ऎंग दुलेलिह् ऎंगेन उरेतारे पद्रपेद् आञ्य उगलेयिह्।
*८:११ सेकेलोन्देद् बा सुकियोन्देद् दिनोन्देकि बेरनिद् अनोन्देद्।